Mae adeiledd y Ddaear yn cynnwys y gramen, y fantell, y craidd allanol a'r craidd mewnol. Mae'r gramen a'r rhan uchaf o'r fantell wedi'u torri'n blatiau tectonig. Datblygodd y gwyddonydd o'r Almaen, Alfred Wegener, ddamcaniaeth drifft cyfandirol i esbonio sut cafodd mynyddoedd eu ffurfio.

Mae cyfansoddiad yr atmosffer wedi newid ers i'r Ddaear ffurfio 4.5 biliwn o flynyddoedd yn ôl. Mae prosesau naturiol a gweithgareddau dynol wedi newid ein hatmosffer, ac yn dal i'w newid heddiw.