په تېر کې هم پاکستان د افغانستان د پلازمېنې کابل په ګډون په يو شمېر ولایتونو کې هوايي بریدونه کړي چې ګڼ ولسي خلک په کې وژل شوي او ټپیان شوي وو.
پاکستانی حکومت تور لګوي چې هلته د "سختدریځۍ په لویو پېښو کې ککړه ډله" تحریک طالبان پاکستان په افغانستان کې د طالبانو د حکومت له ملاتړه برخمنه ده.
خو د طالبانو حکومت د پاکستان دا تورونه ردوي چې ګواکې د افغانستان خاوره دې د پاکستان پر ضد کارېږي.
د یکشنبې شپې له برید وړاندې، د تېر ۲۰۲۵ کال د نومبر پر ۲۵مه هم پاکستان په خوست، پکتیکا او کونړ ولايتونو هوايي بريدونه کړي وو.
د طالبانو د حکومت ویاند ذبیح الله مجاهد ویلي وو چې پاکستان په خوست کې پر یوه کور هوايي برید کې لس ښځې او ماشومان وژلي او کونړ او پکتیکا کې یې هم په هوايي بریدونو کې څلور نور کسان ټپیان کړي.
په ځواب کې یې د پاکستان د پوځ ویاند ویلي وو چې پاکستاني پوځ ملکي وګړي نه په نښه کوي او له مخکینۍ خبرتیا پرته برید نه کوي.
تر هغې وړاندې د ۲۰۲۵ کال د اکټوبر پر نهمه شپه، د افغانستان د دفاع وزارت ویلي وو چې پاکستان د افغانستان هوايي قلمرو "نقض" کړی او په کابل او پکتیکا کې یې هوايي بریدونه کړي. چې ورپسې د اکټوبر پر لسمه او ۱۱مه شپه د دواړو هېوادونو ترمنځ په بېلابېلو ځایونو کې پر یوه بل ډزې هم وشوې.
د پاکستان پوځ ویلي وو چې له افغان ځواکونو او وسله والو سره په دې نښتو کې ۲۳ پاکستاني سرتېري وژل شوي وو.
له هغه راهيسې د دواړو هېوادونو تر منځ سوداګري هم په ټپه درېدلې.
د طالبانو حکومت او پاکستان وروسته د قطر او ترکیې په منځګړیتوب دوحه کې د اوربند هوکړه لاسلیک کړه. ورپسې استانبول کې په دویم پړاو خبرو کې یوازې د اوربند پر غځېدو سلا وشوه، خو د نورو اختلافونو حل لپاره درېیم پړاو مذاکرات وشول خو بې پایلې پای ته ورسېدل.
پاکستان د طالبانو له حکومته غواړي چې په افغانستان کې د پاکستاني طالبانو پر ضد عمليات وکړي او دوی ته ليکلی ضمانت ورکړي چې په پاکستان کې به بريدونه نه کېږي.
د طالبانو حکومت هم پر خپل دې دریځ ټینګ دی چې نه غواړي د پاکستان په کورنیو چارو کې ښکېل شي او دا چې ټيټيپي او نورې وسله والې ډلې د پاکستان خپله مسله ده.
د تېر ۲۰۲۵ کال په اګسټ کې هم پاکستان په خوست او ننګرهار کې بریدونه کړي وو. هغه مهال پاکستان په ډاګه دغه بریدونه نه وو منلي خو د طالبانو حکومت په کابل کې د پاکستان د سفارت سرپرست وراحضار کړی و او دا یې د پاکستان کار بللی و.
له هغه وړاندې هم په خوست، کونړ او پر ډیورنډ کرښه نورو سیمو کې ورته بریدونو مرګ ژوبله اړولې وه. له هوايي بریدونو وړاندې هم د پاکستان له لوري ډېورنډ کرښې ته پر په څېرمه سیمو بریدونو وخت ناوخت مرګژوبله اړوله.
