د ایران بهرنیو چارو وزیر عباس عراقچي وايي د دغه هېواد نوی روحاني مشر مجتبی خامنهيي روغ رمټ دی او وضعیت په بشپړه توګه مدیریت کوي.
هغه د ټېلېګرام یوه پیغام کې لیکلي: "موږ چمتو یو چې د سیمې له هېوادونو سره د هغو اهدافو په تړاو څېړنو لپاره یوه کمېټه جوړه کړو چې بریدونه پرې شوي. زموږ بریدونه په سیمه کې یوازې د امریکا اډې او ګټې په نښه کوي."
ښاغلي عراقچي لیکلي چې دا څرګندونې یې له العربي الجدید شبکې سره په مرکه کې کړې.
نوموړی تور پورې کړی چې په عربي هېوادونو کې پر ملکي سیمو بریدونو کې ښايي اسرائيل لاس ولري چې له ایران سره د دغو هېوادونو اړیکي خراب کړي.
د ایران بهرنیو چارو وزیر لیکلي "امریکایانو زموږ شاهد ته ورته ډرونونه جوړ کړي - لوکاس نومېږي، په بشپړه توګه دې [شاهد] ته ورته دي او د هغو په وسیله عربي هېوادونو کې پر اهدافو بریدونه کوي."
نوموړي ټینګار کړی چې ایران "تر اوسه د سیمې هېوادونو کې هېڅ یوه غیر نظامي یا استوګنیزه سیمه نه ده په نښه کړې."
عباس عراقچي د داسې احتمالي "سیمهییز نوښت، چې جګړه ورسره په عادلانه توګه پای ومومي، هرکلی کړی" خو ویې ویل تر اوسه د جګړې درېدو لپاره داسې کوم ابتکار نه دی مطره شوی.
هغه د جګړې پای په دې پورې تړلی وباله چې د بیا نه تکرارېدو تضمین او غرامت ورکړل شي.
امریکا، اسرائيل او د خلیج هېوادونو چې په دې جګړه کې زیانمن شوي، تر اوسه دغه څرګندونو ته غبرګون نه دی ښودلی.
د یادونې ده چې د متحدو ایالتونو دفاع وزیر پیت هېګسېټ څو ورځې مخکې ادعا کړې وه، چې د ایران نوی مشر مجتبی خامنهيي "ټپي" دی.