Bhuinneadh màthair Mhgr Thrump do Leòdhas

Thuirt e na bu tràithe gum biodh e air ùl a chuir ris an iomairt aige gus raon mòr goilf a stèidheachadh faisg air Obar Dheathain mura b' ann à Alba a bha a mhàthair, nach maireann.

Bhuinneadh a mhàthair, Màiri NicLeòid Thrump do dh'Àird Thong ann an Leòdhas, agus rinn i eilthireachd dha na Stàitean Aonaichte anns na 1930an.

Air dha tadhal air taigh a mhàthar, chaidh e a dh'Obar Dheathain gus bruidhinn ri rannsachadh poblach mu na planaichean aige son an raoin ghoilf, air Oighreachd Menie, a chosgadh £1bn.

Diùltadh

A' bruidhinn ann an Steòrnabhagh, thuirt Mgr Trump: "Mur b'e gur ann à Alba a bha mo mhàthair, an robh mi air mo chùl a chur ris an làraich seo? Saoilidh mi gun robh.

"'S e as coireach gun deach mi an sàs ann, an fhaireachdainn a th' agam do dh'Alba.

"Mur b'e gur ann an Alba a rugadh mo mhàthair, cha robh mi air an gnothach a thòiseachadh," thuirt e.

Dhearbh e cuideachd gun robh e gu bhith a' bruidhinn ri Comhairle nan Eilean Siar mu dheidhinn a bhith a' dèanamh obair leasachaidh air Caisteal Leòdhais ann an Steòrnabhagh.

Mairidh an rannsachadh ann an Obar Dheathain, a dh' iarr ministearan Albannach, beagan mhìosan.

Ghairm Riaghaltas na h-Alba na planaichean a-steach an-uiridh as dèidh mar a chaidh an diùltadh le comataidh aig Comhairle Shiorrachd Obar Dheathain.

Tha buidhnean àrainneachail agus luchd-strì ionadail air an sgeama a chàineadh, fhad 's a tha ceannardan gnìomhachais air an taic a chur ris.