An t-Urr Niall Seathach, Eaglais Shaor Chalanais bho 1995 - 2/2

Available for 5 days

Anns an t-seirbheis cluinnidh sibh na sailm agus an leughadh a leanas: Salm 91: 1-2 air fonn Kilmarnock agus ' s e Murchadh MacLeòid a tha os cionn na seinn le taic bho choitheanal Eaglais Shaor a' Chnuic. Salm 130: 7-8 air fonn Walsall agus 's e Coinneach M MacLeòid a tha os cionn na seinn le taic bho choitheanal Eaglais Shaor Steòrnabhaigh. Leughadh: Isaiah 41: 1-29 Ceann-teagaisg: Isaiah 41:10 Rugadh an t-Urr Niall Seathach ann an 1936 ann an sgìre Bhruaich Chluaidh ann an Glaschu. Is ann à Ille a bha athair agus à Tolastadh a' Chaolais ann an Leòdhas a bha a mhàthair. Dh'fhuiling an teaghlach aige aig àm an dàrna cogaidh nuair a chaill iad an dachaigh ann an spreadhadh. Ghluais iad a Leòdhas còmhla ri càirdean a mhàthar agus bha iad a' fuireach ann an Tolastadh a' Chaolais gus an do cheannaich iad taigh anns an Rubha. Chaidh Niall Seathach tron fhoghlam ann an Sgoil a' Chnuic agus ann an Sgoil MhicNeacail ann an Steòrnabhagh. Dh'fhàg e an sgoil aig aois 15 agus chaidh e gu ruige Feachd an Adhair agus ceangailte ri sin, chuir e seachad ùine ann an Sasainn, Drochaid an Easbaig agus ann an Ùige, Eilean Leòdhais. Dh'fhàg e Feachd an Adhair nuair a bha e bliadhna thar fhichead agus chaidh e air adhart airson na ministrealachd, a' tilleadh gu foghlam ann an Oilthigh Obar Dheathain agus às dèidh sin gu Colaiste na h-Eaglaise Saoire ann an Dùn Èideann. Chaidh a phòsadh ris a' chiad choitheanal ann an Eaglais Shaor Ulapul ann an 1968. Chaidh e às an sin gu Eaglais Shaor Chille Mhaille, a dh'Inbhir Pheofharain agus mu dheireadh gu Eaglais Shaor Chalanais, an coitheanal mu dheireadh a bh' aige mus do leig e dheth a dhreuchd. Ged a dh'fhàg e an sgìre, thug e ainm a' bhaile leis agus sin an t-ainm a th' air an taigh aige ann an Drochaid Sguideil. Tha Niall Seathach pòsta aig Dolina à Pabail agus tha dithis chloinne aca, Sìne agus Tormod. Nuair a gheibh e mionaid dha fhèin tha Mgr Seathach toilichte ùine a chur seachad anns a' ghàrradh, a' cur a h-uile seòrsa lus agus a' feuchainn ri beagan fois is sàmhchair fhaighinn. Bidh e cuideachd ag èisteachd ri ceòl clasaigeach.