ஜிம்பாப்வேவை வீழ்த்தியதுடன் இந்தியா படைத்த 3 சாதனை என்ன?

டி-20 உலகக் கோப்பையின் சூப்பர்-8 போட்டியில், ஜிம்பாப்வே அணியை இந்தியா 72 ரன்கள் வித்தியாசத்தில் வீழ்த்தியது.

ஜிம்பாப்வேவுக்கு 257 ரன்கள் இலக்காக இந்தியா நிர்ணயித்தது. இந்த இலக்கை துரத்திய ஜிம்பாப்வே அணியால் 20 ஓவர்களில் 6 விக்கெட் இழப்புக்கு 184 ரன்கள் மட்டுமே எடுக்க முடிந்தது.

ஜிம்பாப்வே அணியின் தொடக்க வீரர் பிரையன் பென்னட் 97 ரன்கள் எடுத்து ஆட்டமிழக்காமல் இருந்தார், ஆனால் அவரது இன்னிங்ஸ் அணிக்கு வெற்றியை உறுதி செய்யவில்லை. இந்தியா தரப்பில், அர்ஷ்தீப் சிங் நான்கு ஓவர்களில் 24 ரன்களுக்கு மூன்று விக்கெட்டுகளை வீழ்த்தினார்.

சென்னையில் நடைபெற்ற இந்தப் போட்டியில், முதலில் பேட்டிங் செய்த இந்தியா 20 ஓவர்களில் நான்கு விக்கெட் இழப்புக்கு 256 ரன்கள் எடுத்தது.

இந்திய அணி சார்பாக ஹர்திக் பாண்ட்யா மற்றும் அபிஷேக் சர்மா அரைசதம் அடித்தனர்.

இந்தியாவுக்கு அரையிறுதி வாய்ப்பு என்ன?

குரூப் 1-ல் இந்தியா மற்றும் வெஸ்ட் இண்டீஸ் அணிகள் தற்போது சமமான புள்ளிகள் பெற்றுள்ளன.

ஞாயிற்றுக்கிழமை கொல்கத்தாவில் நடைபெறும் போட்டியில் இந்தியா வெஸ்ட் இண்டீஸை வீழ்த்தினால், இந்தியா அரையிறுதிக்கு (இறுதி நான்கு அணிகளில்) முன்னேறும்.

தென்னாப்பிரிக்கா வெஸ்ட் இண்டீஸை ஒன்பது விக்கெட்டுகள் வித்தியாசத்தில் தோற்கடித்து, இந்த தொடரில் அனைத்து போட்டிகளையும் வென்றுள்ளது. தென்னாப்பிரிக்கா மற்றும் இங்கிலாந்து அணிகள் இன்னும் ஒரு போட்டி மீதமிருக்கும்போதும் ஏற்கனவே அரையிறுதிக்கு தகுதி பெற்றுள்ளன.

ஜிம்பாப்வே ஆட்டம் எப்படி?

இந்தியாவின் 257 ரன்கள் இலக்கைத் துரத்திய ஜிம்பாப்வே அணி, பவர்பிளேயில் விக்கெட் இழப்பின்றி 44 ரன்கள் எடுத்து மெதுவாகத் தொடங்கியது.

ஆனால் விரைவாக ரன்கள் எடுக்க வேண்டிய அழுத்தத்தில், ஜிம்பாப்வே அணி 7வது ஓவரின் இரண்டாவது பந்திலேயே முதல் விக்கெட்டை இழந்தது.

இரண்டு போட்டிகளுக்குப் பிறகு இந்திய அணிக்குத் திரும்பிய அக்சர் படேல், மருமானியை அவுட்டாக்கினார். அவர் 20 பந்துகளில் 20 ரன்கள் எடுத்தார்.

மற்றொரு தொடக்க ஆட்டக்காரர் பிரையன் பென்னட் அதன் பிறகு விரைவாக ரன் எடுக்க முயன்றார். ஒன்பதாவது ஓவரில் இரண்டு சிக்ஸர்கள் மற்றும் ஒரு பவுண்டரி உட்பட 17 ரன்கள் எடுத்தார்.

10வது ஓவரின் மூன்றாவது பந்தில் டியான் மேயர்ஸை வீழ்த்தி வருண் சக்ரவர்த்தி ஜிம்பாப்வேவின் இரண்டாவது விக்கெட்டை வீழ்த்தினார்

ஆனால் பிரையன் பென்னட் தொடர்ந்து களத்தில் இருந்து 34 பந்துகளில் அரைசதம் அடித்தார். இந்த உலகக் கோப்பையில் இது அவரது மூன்றாவது அரைசதமாகும்.

பிரையன் பென்னட்டுக்கு கேப்டன் சிக்கந்தர் ராசா நல்ல உறுதுணையாக இருந்தார். இருவரும் மூன்றாவது விக்கெட்டுக்கு 41 பந்துகளில் 72 ரன்கள் பகிர்ந்து கொண்டனர்.

இருப்பினும், 31 ரன்கள் எடுத்திருந்தபோது சிக்கந்தர் ராசாவை அர்ஷ்தீப் சிங் ஆட்டமிழக்கச் செய்தார்.

இறுதியில் 20 ஓவர் முடிவில் ஜிம்பாப்வே அணியால் 184 ரன்கள் மட்டுமே எடுக்க முடிந்தது.

இந்தியாவின் ஆட்டம் எப்படி?

இந்தியா 20 ஓவர்களில் நான்கு விக்கெட் இழப்புக்கு 256 ரன்கள் எடுத்தது. இதன் மூலம், இந்த உலகக் கோப்பையில் அதிகபட்ச ஸ்கோரைப் பெற்ற சாதனையையும் இந்தியா படைத்தது. டி20 உலகக் கோப்பை வரலாற்றில் இந்தியா தனது அதிகபட்ச ஸ்கோரையும் பதிவு செய்தது.

இந்திய அணி தரப்பில் அதிகபட்சமாக அபிஷேக் ஷர்மா 55 ரன்களும், ஹர்திக் பாண்ட்யா 50 ரன்களும் குவித்தனர்.

ஹர்திக் பாண்ட்யா 23 பந்துகளில் 50 ரன்கள் எடுத்து ஆட்டமிழக்காமல் இருந்தார். திலக் வர்மா ஆட்டமிழக்காமல், 16 பந்துகளில் 44 ரன்கள் எடுத்தார்.

தொடக்க ஆட்டக்காரர்களாகக் களம் இறங்கிய சஞ்சு சாம்சன் மற்றும் அபிஷேக் சர்மா, அதிரடி தொடக்கத்தை வழங்கினர். இதனால் 3 ஓவர் முடிவில் இந்திய அணி 46 ரன்களை எடுத்தது.

சஞ்சு சாம்சன் 2 சிக்ஸ் மற்றும் 1 போர் அடித்த நிலையில், 24 ரன்களுக்கு அவுட் ஆனார்.

சஞ்சு சாம்சன் மற்றும் அபிஷேக் சர்மா இடையேயான முதல் விக்கெட்டுக்கு 48 ரன்கள் கூட்டணி இந்த உலகக் கோப்பையில் இந்தியாவுக்கான சிறந்த தொடக்க கூட்டணியாகவும் அமைந்தது.

அடுத்து களம் இறங்கிய இஷான் கிஷன் உடன் கூட்டணி சேர்ந்து அபிஷேக் சர்மா தனது அதிரடியை தொடர்ந்தார்.

இதனால் பவர் ப்ளே (6 ஓவர்) முடிவில் இந்திய அணி 1 விக்கெட் இழப்பிற்கு 80 ரன்கள் எடுத்தது.

அபிஷேக் சர்மா 26 பந்துகளில் தனது அரைசதத்தை எட்டினார். அபிஷேக் சர்மா அரைசதத்தில் மூன்று பவுண்டரிகள் மற்றும் நான்கு சிக்ஸர்கள் அடங்கும்.

நல்ல ஃபார்மில் இருந்த இஷான் கிஷன் 24 பந்துகளில் 38 ரன்கள் எடுத்து அவுட்டானார். இரண்டாவது விக்கெட்டுக்கு இஷான் கிஷானும் அபிஷேக் சர்மாவும் 42 பந்துகளில் 72 ரன்கள் சேர்த்தனர்.

இதற்கிடையில், கேப்டன் சூர்யகுமார் யாதவ் 13 பந்துகளில் மூன்று பவுண்டரிகள் மற்றும் இரண்டு சிக்ஸர்கள் உட்பட 33 ரன்கள் எடுத்து ஆட்டமிழந்தார்.

இந்திய அணியில் 2 மாற்றம்

சென்னை சேப்பாக்கத்தில் நடந்த இந்தப் போட்டியில் டாஸ் வென்ற ஜிம்பாப்வே கேப்டன் சிகந்தர் ராஸா பந்துவீச்சை தேர்வு செய்தார்.

இந்தப் போட்டிக்கு இந்திய அணி 2 மாற்றங்கள் செய்திருக்கிறது. அக்‌ஷர் பட்டேல் வாஷிங்டன் சுந்தருக்குப் பதிலாகக் களம் இறங்கினார்

சஞ்சு சாம்சன் ரிங்கு சிங்குக்குப் பதிலாக பிளேயிங் லெவனில் இடம் பெற்றார்.

சஞ்சு சாம்சன் கீப்பராக செயல்படுவார் என்று இந்திய கேப்டன் சூர்யகுமார் யாதவ் டாஸின் போது தெரிவித்தார்.

"நான் டாஸ் வென்றிருந்தாலும் பேட்டிங் தான் தேர்வு செய்திருப்பேன்" என்றும் சூர்யகுமார் தெரிவித்தார்.

அணியில் யார் யார்?

இந்தியா பிளேயிங் லெவன்

அபிஷேக் ஷர்மா, சஞ்சு சாம்சன், இஷான் கிஷன், திலக் வர்மா, சூர்யகுமார் யாதவ், ஹர்திக் பாண்டியா, ஷிவம் துபே, அக்‌ஷர் பட்டேல், அர்ஷ்தீப் சிங், வருண் சக்ரவர்த்தி, ஜஸ்ப்ரித் பும்ரா

ஜிம்பாப்வே பிளேயிங் லெவன்

ததிவானஷே மருமானி, பிரதன் பென்னட், டியன் மேயர்ஸ், ரயன் பர்ல், சிகந்தர் ராஸா, டோனி முன்யோங்கா, டசிங்கா முசெகிவா, பிராட் எவன்ஸ், டினோடெண்டா மபோசா, பிளெஸிங் முசர்பானி, ரிச்சர்ட் நகரவா

- இது, பிபிசிக்காக கலெக்டிவ் நியூஸ்ரூம் வெளியீடு