وزیراعظم پر جوتا پھینکنے کی کوشش
ہندوستان کی ریاست گجرات کے شہر احمد آباد میں ایک جلسے کے دوران وزيراعظم منموہن سنگھ پر جوتا پھینکنے کی کوشش کی گئی ہے۔
وزيراعظم منموہن سنگھ احمد آباد میں ایک انتخابی ریلی سے خطاب کر رہے تھے اور ان کی تقریر کے آغاز کے چند منٹ بعد ہی اگلی قطار میں موجود ایک شخص نے وزيراعظم کی طرف جوتا پھینکا۔ تاہم سٹیج اور بھیڑ کے درمیان فاصلے کی وجہ سے وہ جوتا سٹیج تک نہيں پہنچ سکا۔
تاہم وزیراعظم کے سکیورٹی اہلکاروں نے اس شخص کو اپنی گرفت میں لے لیا اور نامعلوم مقام کی طرف لےگئے۔ تاحال یہ معلوم نہیں ہو سکا ہے کہ وہ شخص کون تھا جس نے وزيراعظم کی جانب جوتا پھینکا تھا۔
بھارت میں حال ہی میں سیاسی رہنماؤں پر جوتا پھینکے کے دو واقعات پیش آئے ہیں۔ ان واقعات میں پہلے تو وزيرِخارجہ پی چدمبرم پر ایک صحافی نے اس وقت جوتا پھینکا تھا جب وہ دلی میں ایک نیوز کانفرنس میں صحافیوں سے خطاب کر رہے تھے۔ جرنیل سنگھ نامی صحافی کا کہنا تھا کہ ان کا یہ عمل سنہ انیس سو چوارسی میں ہوئے سکھ مخالف فسادات کے سلسلے میں کانگریس کے رہنما جگدیش ٹائٹلر کو مرکز تفتیشی ادارے سی بی آئی کی جانب سے کلین چیٹ دیے جانے پر احتجاج تھا۔
اس کے بعد بھارتیہ جنتا پارٹی کے وزیر اعظم کے عہدے کے امیدوار لال کرشن اڈوانی پر ریاست مدھیہ پردیش کے کٹنی علاقے ميں جوتا پھینکا گیا تھا۔ اس وقت وہ ایک انتخاجی مہم میں تقریر کر رہے تھے اور ان کی پارٹی کے مقامی صدر نے انہیں لکڑی کی کھڑاویں دے ماری تھیں۔
