بی بی سی نیوز ویب سائٹ کو ایوارڈ
بی بی سی نیوز ویب سائٹ کو دو ہزار آٹھ میں ممبئی حملے کی خبریں بریک کرنے اور مجموعی کوریج پر آن لائن نیوز ایسوسی ایشن کا انٹرنیٹ ایوارڈ دیا گیا ہے۔
آن لائن جرنلزم ایوارڈ دینے کا فیصلہ کرنے والے منصفین نے بی بی سی کی سائٹ کو بروقت اپ ڈیٹ کیے جانے، کوریج کی وسعت اور سایٹ سے سوشل میڈیا کو ہم آہنگ کیے جانے کو سراہا ہے۔
اس ایوارڈ کے لیے بی بی سی نیوز کے ساتھ ہیوسٹن کرنیکل کو طوفان ’ایکے‘ کی کوریج اور نیویارک ٹائمز کو دی ہڈسن طیارے کے گرنے کی کوریج کے لیے نامزد کیا گیا تھا۔
نیو یارک ٹائمز کو نیوز میں مجموعی طور پر بہتر ہونے کے لیے مخصوص سب سے بڑا ایوارڈ دیا گیا۔
بی بی سی نیوز اس کیٹیگری کے لیے اور اس کے نامہ نگار مارک ایسٹن کے یو کے بلاگ کو بلاگ کی کیٹیگری کے نامزد کیا گیا تھا۔
آن لائن جرنلزم کے اس ایوارڈ کی ابتدا مئی سنہ دو ہزار میں سان فرانسیسکو سے ہوئی اور اس کا اہتمام آن لائن نیوز ایسو سی ایشن اور یونیورسٹی آف میامی کا سکول آف کمیونیکیشن مشترکہ طور پر کرتے ہیں۔
منصفین کا کہنا ہے کہ بی بی سی کی ویب سائٹ اطلاعات کے بنیادی ذرائع کے اعتبار انتہائی با وسائل ہے اور اس کی ہر پوسٹ سینکڑوں لوگ اپنے ردِ عمل کا اظہار کرتے ہیں۔
بی بی سی نیوز منصفین کے الفاظ میں ’بظاہر انتہائی سادہ دکھائی دینے والی اس سائٹ کے بلاگ بہت سے معاملوں کا احاطہ کرتے ہیں اور بخوبی کرتے ہیں‘۔
End of سب سے زیادہ پڑھی جانے والی
بی بی سی نیوز کے فیچر ایڈیٹر گلز ولسن نے ایوارڈ وصول کرتے ہوئے کہا کہ ’اتنے کڑے حریفوں کے ہوتے ہوئے بریکنگ نیوز میں سر فہرست ہونے کا ایوارڈ کا حاصل کرنا پوری ٹیم کے لیے ایک بڑا اعزاز ہے‘۔
