Tiraamp nagaa dhaammate, 'wanta hojjechuuf as dhufne hojjenneerra' jedhe

Pireezidantiin US Donaald Tiraamp aangoo gadhiisuun dura haasaa xumuraa taasiseen “wanta hojjachuuf as dhufne hojjenneerra, dabalataanis hedduu hojjenne,” jedheera.

Haasaa daqiiqaa 20 'Youtube' irratti gadhiifameen “lola cimaa fi ulfaataa loleera…sababiin isaa kana akkan godhuuf na filattani,” jechuun dubbateera.

Tiraamp bu’aa filannoo Sadaasaa darbee kan Joo Bayidan itti injifate hin simanne ture. Haasaa isaa kanaan garuu bulchiinsi haaraa akka milkaa'uuf ni kadhannaaf jedhe.

Joo Baayidan Roobii (har’a) pireezidantii ta’uun ni muudama.

Jala bultii sirna muudamaa isaa Baayidan lammilee US 400,000 dhibee Covid-19 lubbuu isaanii dhabaniif yaddannoo biyyaaleessa raawwate.

Kibxata galgala namoota dhibee kanaan lubbuu isaanii dhaban yaadachuuf duungoon 400 Waashigtan DC, gamoo Lincoln Memorial duratti ibsameera.

Guyyootiin xumuraa bulchiinsa Tiraamp kan yaadatamu hokkora deeggartoonni isaaa US Kaappitool humnaan seenuun kaasaniinidha.

Hokkora kana kakaasuun aangoorraa akka kaafaman kana himataman Tiraamp seenaa Ameerikaa keessatti pireezidantii al lama aangoorraa akka kaafaman himataman ta'aniiru.

Yoo kan itti murtaa'u ta'e lammata akka sadarkaa kamittuu aangoo mootummaaf hin dorgomne dhorkamuu malu

Tiraamp maal jedhan?

Donald Tiraamp haasaa isaa xumuraa kanaan maqaa pireezidanti aangoo irraa fudhatu takkaayyu hin kaasne.

“Hokkorri siyaasaa haleellaa wantoota nuti akka lammilee Ameerikaatti kabajnu irratti taasifamudha. Kun fudhatama hin qabu” jedheera.

Haasaa isaa kana irratti Tiraamp bulchiinsi isaa “seenaa addunyaa keessatti diinagdee isa guddaa” ijaareera jedhe.

Gabaan qoodni ykn sheeriin dhaabbilee US (stock market) weerara koronaavayirasii irraa bayyaannateera jedhe.

Ta’us garuu diinagdeen biroo rakkoo keessa jiru. Muddee keessa namootni hojii irraa ari’amuun isaanii bu’aa hojii irratti dhiibbaa uumeera.

“Ajandaan keenya wa’ee bitaa ykn mirgaa hin turree, waa’ee Ripaablikaanii ykn Dimokraatii hin turre, kan ture garuu waa’ee waan gaarii biiyyattidha, kun ammo wa’ee guutttumaa biyyattiidha,” jedhe.

Aangoo yeroo gadhiisuutti sadarkaa fudhatamummaa (approval rate) %34’n yoo ta’u, kun seenaa pireezidantoota aangoo gadhiisanii keessatti isa xiqqaadha.

Sirna kakuu raawwannaa Joo Baayidan irratti kan hin argamne Donaald Tiraamp kana gochuun seenaa Ameerikaa keessatti nama lammaffaadha.