Dyna ddiwedd ein llif byw, diolch am ddilyn.

Bydd sylwebaeth o gêm Cymru v Montenegro i'w glywed ar BBC Radio Cymru brynhawn dydd Sadwrn, gyda'r gic gyntaf am 16:30.

Ffynhonnell y llun, CBDC

Dywedodd prif hyfforddwr Cymru, Rhian Wilkinson, wrth siarad ar Match of the Day Wales:

"Dydw i ddim yn meddwl y gallwn ni ddweud celwydd am y perfformiad, ond dw i'n falch ein bod ni wedi aros yn y gêm, mae timau da yn dod o hyd i ffordd i wneud hynny.

"Cafon ni ddiwrnod gwael ac fe ddaethon ni drwyddi - dydyn ni heb wneud hynny bob tro yn y gorffennol.

"Doedden ni ddim ar ein gorau o ran ein pasio ag ati, ond mae'n bwynt da ac yn fan cychwyn i'r ymgyrch.

"Byddwn ni'n parhau i ganolbwyntio ar amddiffyn y darnau gosod. 'Dw i heb edrych yn ôl ar y goliau eto felly dydw i ddim eisiau dweud beth aeth o'i le, ond doedden ni ddim yn ddigon cryf.

"Rydyn ni hanner ffordd drwy'r camp yma - mae yna feysydd i'w gwella, ac mae'n rhaid i ni eu trwsio.

"Rwy'n meddwl fod ein eilyddion wedi cael effaith ar y gêm, ac mae hynny'n beth cadarnhaol arall. Pan ddechreuon ni chwarae trwy ganol y cae roeddech chi'n gallu gweld ein safon.

"Roedden ni'n gwybod y byddai'n frwydr, felly mae cael pwynt oddi cartref yn ganlyniad da."

Ffynhonnell y llun, CBDC

Kath Morgan
Cyn-gapten Cymru ar BBC Radio Cymru

'Dw i'n gwybod y bydd y merched yn siomedig gyda'u hamddiffyn heno, doedd e ddim yn ddigon da ar y lefel yma.

Os ydyn ni'n chwarae fel 'na dydyn ni ddim yn haeddu ennill gemau, ond mae'r ffaith bod Elise Hughes wedi rhoi ei phen ar y bêl rhwng dau amddiffynnwr... chwarae teg iddi.

Ond nid dyma'r safon fydd yn ein harwain ni i Gwpan y Byd, mae angen i'r safon fod yn llawer gwell. Rydyn ni wedi crafu pwynt ac rwy'n ddiolchgar am hynny, ond mae pawb yn gwybod bod angen i ni fod yn well na heno.

Gwennan Harries
Cyn-ymosodwr Cymru ar Match of the Day Wales

Byddan nhw (Y Weriniaeeth Tsiec) yn teimlo fel eu bod wedi colli'r gêm, tra byddwn ni'n teimlo fel ein bod ni wedi ennill.

Yn siarad ar raglen Match of the Day Wales ar BBC2, dywedodd Katie Sherwood, cyn-chwaraewr ganol cae Cymru:

"Fe gymerwn ni'r pwynt... a diolch byth i ni fod yn glinigol reit ar ddiwedd y gêm.

"Roedd e'n berfformiad gwael o ystyried yr hyn rydym yn ei ddisgwyl gan y tîm - roedd disgwyliad i ddechrau'n gryfach.

"'Dw i'n meddwl bod y Weriniaeth Tsiec di bod yn well o ran angerdd heno - roedden nhw eisiau'r fuddugoliaeth yn fwy na ni."

Roedd yn ymddangos fod Cymru am golli gêm agoriadol yr ymgyrch yma, ond fe wnaeth Elise Hughes gipio pwynt hynod o werthfawr ym munud olaf amser ychwanegol.

Yn ôl Kath Morgan ar Radio Cymru roedd hon yn gêm 'poenus i'w gwylio ar adegau', ond fe fydd ochenaid o ryddhad yn ystafell newid Cymru wedi'r diweddglo cyffrous.

Kath Morgan
Cyn-gapten Cymru ar BBC Radio Cymru

Fi ffaelu credu beth dwi newydd ei weld!

Dihangfa lwyr i Gymru! Roeddwn i wir yn teimlo fod y gêm yma wedi rhedeg i ffwrdd!

Cymru'n sgorio wedi 93 munud o chwarae!

Ymosodwr Crystal Palace, Elise Hughes, sy'n sgorio gyda'i phen yn dilyn croesiad gan Gemma Evans.

Mae'r tîm cartref yn rheoli'r gêm yn dda ar hyn o bryd.

Maen nhw'n chwarae'n gorfforol ac yn atal Cymru rhag ymosod yn effeithiol.

Does dim llawer o amser ar ôl gan Gymru i newid pethau...

Helen Ward
Cyn ymosodwr Cymru ar BBC Radio Wales

'Dw i'n hoffi newidiadau Cymru, 'dw i'n meddwl eu bod yn cynnig rhywbeth gwahanol i ni wrth symud ymlaen.

Mae Mared Griffiths wedi cael dechrau gwych i'w gyrfa gyda Chymru; mae hi'n edrych fel bygythiad bob tro mae hi ar y cae.

Mia Ross ac Esther Morgan sy'n cymryd lle Angharad James a Lily Woodham.

Hayley Ladd sydd bellach yn gapten, gyda naw munud o'r chwarae yn weddill.

Golwr y Weriniaeth Tsiec, Olivie Lukášová, yn gwneud arbediad godidog o ergyd gan Carrie Jones.

Mae'r gêm yn egnïol a chorfforol ar hyn o bryd.

Tereza Krejcirikova sy'n taclo Ceri Holland yn gryf, wrth i'r chwarae wibio o un pen y cae i'r llall.

Dyma gyfnod allweddol nawr.

Mae Cymru wedi bod ymhell o fod ar eu gorau, ond mae dal amser i hawlio canlyniad da o'r gêm yma.

Mae Hayley Ladd yn clirio'r bêl oddi ar y llinell!

Mae Mared Griffiths - sy'n dathlu ei phen-blwyddyn 19 oed heddiw - ac Elise Hughes wedi cymryd lle Hannah Cain a Rachel Rowe.

I'r tîm cartref, mae Andrea Staskova yn cymryd lle Michaela Khyrova.

Mae dros 20 munud o'r gêm yn weddill, ac felly mae gan Gymru ddigon o amser i daro'n ôl.

Yn ystod y munudau diwethaf rydym wedi gweld mwy o chwarae ymosodol gan Gymru.

A fydd Rhian Wilkinson yn gwneud mwy o newidiadau i'r tîm yn fuan?

Kath Morgan
Cyn-gapten Cymru ar BBC Radio Cymru

Am yr ail dro yn y gêm mae Cymru angen dod yn gyfartal.

Fe wnaeth gormod o unigolion Cymru gamgymeriadau gyda'r bêl a wnaethon nhw ddim digon i'w chlirio.

Y realiti yw, os collwn ni fan hyn mae'n mynd i fod yn flêr a chymhleth i guro'r grŵp.

Mae'r gêm yn galw allan am Mared Griffiths - rhywun sydd heb ofn ac sy'n fodlon saethu at y gôl.

Mae'r Weriniaeth Tsiec yn mwynhau cyfnod o chwarae da, gan ddod yn agos at roi'r bêl yn y rhwyd am y drydedd tro.

Fe aeth ergyd Jana Zufankova heibio'r gôl yn y pen draw.

Croesiad o'r dde, a Chymru yn methu'n glir a chlirio'r bêl.

Ymosodwr Slavia Prague, Jana Žufánková, sydd rhywsut yn cael y bêl i gefn y rhwyd gan ddefnyddio'i chlun.

Amddiffyn hynod siomedig gan Gymru unwaith eto.

Mae Cymru yn ennill dwy gic gornel yn syth ar ôl ei gilydd yn dilyn cyfnod o chwarae cadarnhaol.

Caiff y ddwy eu clirio gan y Weriniaeth Tsiec, ond dyma ddechrau gobeithiol i'r ail hanner.