Mae'r Ddadl Fawr ar ben - ond rhwng hyn a'r etholiad bydd digon o straeon gwleidyddol ar Cymru Fyw wrth i'r ymgyrchu barhau.

Bydd y cyfri yn digwydd eleni drannoeth yr etholiad - y cyfan yn fyw ar lif byw Cymru Fyw o 07:00 ar 8 Mai.

Tan hynny bydd holl straeon yr etholiad ar wefan Cymru Fyw.

Diolch am eich cwmni. Nos da.

Ffynhonnell y llun, Getty Images

17:00 ar 28 Ebrill - Dyddiad cau ar gyfer ceisiadau i bleidleisio drwy ddirprwy

7 Mai - Diwrnod y bleidlais

17:00 ar 7 Mai - Cyfle olaf i gasglu papur pleidleisio newydd drwy'r post os bydd y gwreiddiol wedi'i ddifetha neu wedi mynd ar goll

17:00 ar 7 Mai - Dyddiad cau ar gyfer ceisiadau brys drwy ddirprwy

8 Mai - Cyfri'r pleidleisiau

"Roedd yna gwpwl o enghreifftiau heno o bobl yn siarad ar draws ei gilydd," meddai'r sylwebydd Richard Wyn Jones ar raglen Gwleidydda.

"Oedd o'n flêr.

"Dwi ddim yn trio beirniadu'r gwleidyddion, gan fod ganddyn nhw bwyntiau yr oedden nhw angen eu gwneud.

"Ond roedden nhw'n ymddangos yn ddiurddas.

"Dwi ddim yn meddwl bod y bobl oedd yn gwylio a gwrando yn meddwl 'Mae hyn wedi fy ngoleuo i'.''

Wrth i etholiad y Senedd agosáu, pwy ydy'r bobl sy'n gobeithio bod yn brif weinidog nesaf Cymru?

Dros yr wythnosau diwethaf mae Cymru Fyw wedi cyhoeddi proffil o arweinwyr y prif bleidiau yng Nghymru.

Cliciwch yma i ddarllen mwy am arweinwyr Plaid Cymru, Reform, y Blaid Lafur, y Democratiaid Rhyddfrydol, y Blaid Werdd a'r Ceidwadwyr Cymreig.

Ffynhonnell y llun, Getty Images

Roedd 60 o bobl o bob cwr o Gymru yn rhan o'r gynulleidfa a dyma oedd gan Gethin, Cody, Gwyn ac Alaw i'w ddweud wedi'r ddadl.

Elgan: "Sai'n meddwl bo' fi lot callach o fod 'ma. Pawb yn addo hyn, addo'r llall ond neb gyda ryw gynllun credadwy, manwl o ran beth yn gywir oedden nhw am wneud."

Gethin: "Ro'n i wedi joio heno, lot o siarad siop gan bobl ond oedd sens yn dod mas o gegau rhai."

Cody: "Oedd lot i gymryd mewn, ond fi'n meddwl i fi, roedd lot o excuses, do'n nhw ddim yn ymddiheuro, dim yn cymryd y bai."

Aaron: "Oedd y ddadl yn eithaf da ond trueni.. oedden nhw i gyd yn sôn le oedden nhw eisiau hala'r arian, ond neb yn dweud o le mae'r arian yn dod."

Dyma argraffiadau mwy o fyfyrwyr Jomec ar ôl gwylio yn y Stafell Sbin heno.

Dywedodd Ifan: "O’n i’n meddwl bod hi'n ddadl danllyd - lot o fynd nôl a 'mlan rhwng yr arweinyddion a cynrychiolwyr o’r pleidiau.

"O'dd sawl peth sydd yn becso pobl ar lawr gwlad o amaeth, costau byw a'i iaith Gymraeg.

"Odd hi’n ddadl barchus ar y cyfan a dadl gobeithio a fydd yn helpu pobl i 'neud eu penderfyniad nhw wedyn ar y 7fed o Fai."

I Beca, roedd angen mwy o sôn am sut fyddai'r pleidiau yn cefnogi myfyrwyr.

"O ran addysg dwi’n meddwl ella 'sa mwy o sôn wedi bod am sut ‘sa’n nhw’n helpu i gefnogi pobl ifanc efo pethe fel taxes.

"Dwi'n meddwl odd e’n dda clywed amrywiaeth o safbwyntiau gan pobl gwahanol.

"Ag odd o’n ddiddorol clywed am faint o bobl oedd yn poeni amdan amaethyddiaeth a sut wedyn ‘sa’r pleidiau yn helpu cefnogi nhw."

Roedd un o'r cwestiynau heno yn cyfeirio at bwerau'r Senedd.

Beth mae Senedd Cymru yn ei wneud? Ac ar beth mae £25bn yn cael ei wario?

Mared Parry a BBC Bitesize sydd yn esbonio.

Wedi awr a hanner o ddadl, mae Bethan Rhys Roberts yn dweud ei bod hi wedi mwynhau cadeirio'r noson.

Wrth siarad ar bodlediad Gwleidydda BBC Radio Cymru, dywedodd:

"Roedd hi'n fywiog. Gobeithio aeth hi ddim yn rhy flêr.

"Roedd cymaint o ddwylo i fyny a'r sêr, wrth gwrs, yw'r gynulleidfa a'r profiadau personol.

"Mae pobl yn teimlo'n ddirdynnol am y pynciau yma a dyna sy'n dda am ddadl fel 'na.

"Roedd y tensiwn yn yr 'stafell yna i'w deimlo ac roedd 'na wefr yna ac roedd hi'n fraint cael bod yna."

Mae criw o fyfrwyr Jomec wedi bod yn gwylio'r ddadl heno a dyma oedd gan rhai ohonyn nhw i'w ddweud.

Dywedodd Efa: "Ro'n i'n meddwl fod e'n ddiddorol iawn ond do'n i ddim yn gweld bod lot o sôn am fyfyrwyr neu topics sy'n berthnasol i bobl ifanc. Roedd lot o ffocws ar amaeth a doedd hwnna ddim yn berthnasol i fi achos fi'n fyfyrwraig yn y ddinas, so o ni'n gobeithio bydde fwy o sôn am broblemau mae pobl ifanc yn delio gyda fe.

Dywedodd Betsan: "Dwi'n teimlo 'mod i heb gael fy nghynrychioli mor dda a 'swn i wedi licio, ella bod ffordd oedd y ddadl wedi ei chreu bach yn anodd er mwyn tynnu pethau newydd ac ro'n i'n teimlo bod Reform yn cael gormod o sylw, ac er mod i'n cefnogi Plaid Cymru, dwi'm yn siŵr pam 'swn i wedi gallu pleidleisio Plaid heddiw achos doedd dim llawer o sgwrs gan Rhun yn fan'na.

Ychwanegodd: "Hefyd materion am yr iaith Gymraeg a diwylliant, ella roedd hwnna yn destun peryg achos doedd Reform ddim yn cynnig ymddiheuriad a chwaith oedd neb yn rili herio nhw'n ddigon da dwi'm yn meddwl.

Roedd Sami o'r farn hefyd nad oedd pobl ifanc wedi cael digon o sylw.

"Dwi'n teimlo ein bod wedi cael ein tangynrychioli, fel unigolyn sy'n byw mewn ardal eithaf dinesig a hefyd yn fyfyriwr yng Nghaerdydd.

Roedd prif ffocws y ddadl ar amaeth ac ar gefn gwlad. Fel myfyriwr beth am gostau byw myfyriwr, beth am y pethau sy'n ein hwynebu ni?

"Roedd hi'n ddadl dda ac o'n ni wedi dysgu lot am fwriadau'r pleidiau ond falle ond roeddwn i fel unigolyn ffili uniaethu gyda dadl y pleidiau."

Richard Wyn Jones
Athro Gwleidyddiaeth Cymru

Mae'r sylwebydd, yr Athro Richard Wyn Jones, yn credu bod dadl yn 'rhan o liw' yr etholiad.

Er hyn, dyw e ddim yn credu bydd y gwleidyddion heno wedi newid llawer ar farn y gynulleidfa.

Gwrandewch ar ei holl sylwadau ar bodlediad Gwleidydda BBC Radio Cymru a fydd ar gael yn fuan.

Fe wnaeth Helen Jenner, dirprwy arweinydd Reform UK yng Nghymru, wrthod ymddiheuro am sylwadau diweddar Nigel Farage am y Gymraeg.

Fe gafodd arweinydd y blaid yn y DU ei feirniadu fis Mawrth am ddisgrifio pobl Cymru fel "siaradwyr estron" (foreign) mewn neges fideo.

Yn dilyn sylwadau gan aelod o gynulleidfa Y Ddadl Fawr fe alwodd arweinydd y Democratiaid Rhyddfrydol yng Nghymru Jane Dodds sawl gwaith am ymddiheuriad gan Helen Jenner.

Mewn ymateb, dywedodd dirprwy arweinydd Reform UK yng Nghymru: “’Da chi’n wirioneddol meddwl bod hynny’n bwynt pwysig pan mae gymaint o bethau eraill” gan ychwanegu bod angen deall cyd-destun y fideo.

Mae'r rhestr lawn o ba bleidiau ac ymgeiswyr annibynnol sy'n sefyll ym mhob etholaeth i'w gweld yma.

Un bleidlais fydd gennych ar 7 Mai (neu cynt os ydych wedi dewis pleidleisio drwy'r post) ac fe fyddwch yn pleidleisio i blaid nid i unigolyn - heblaw bod unigolyn yn sefyll yn annibynnol.

Mae pob plaid wedi dewis trefn yr ymgeiswyr ar eu rhestrau.

Rhys Owen
Gohebydd gwleidyddol Golwg

"Dydy hi ddim yn syndod bod iechyd ‘di bod y peth cynta' i'r ddadl ffocysu arno ac wedi amlygu barn ymhlith y pleidiau.

"‘Dan ni’n gweld safbwynt falle fel rhoi mwy o bwyslais ar ofal cymdeithasol - Jane Dodds yn benodol yn sôn hynny.

"Ond wrth gwrs ma’r cwestiwn parhaol am y rhestrau aros i'r Blaid Lafur a hynny heddiw ar ddiwrnod cyhoeddi'r ffigyrau.

"Dwi’n meddwl bod e’n ddiddorol bod Helen Jenner wedi dweud wrth Rhun ap Iorwerth 'ti’m yn gallu stopio siarad am Nigel Farage'.

Mae’n amlwg bod y ddau yn ymwybodol bod y gwagle rhwng y ddwy blaid wedi lleihau.

Reform UK

Dywed Helen Jenner, dirprwy arweinydd Reform UK yng Nghymru bod ffermwyr yn “cael eu hamro ac yn boddi mewn gwaith papur”.

Mae gormod o ganolbwyntio ar sero net a’r amgylchedd, meddai, a “dim digon ar gynhyrchu bwyd”.

Democratiaid Rhyddfrydol Cymru

Dywed arweinydd y Democratiaid Rhyddfrydol yng Nghymru, Jane Dodds bod ffermwyr yn deall yr amgylchedd “yn well nag un proffesiwn arall” a’u bod wedi cael blynyddoedd o ansicrwydd sy’n effeithio ar iechyd meddwl.

Mae angen “sicrwydd arian a rhaglen i ffermwyr ifanc”.

Iechyd oedd pwnc cyntaf y noson.

Dyma beth oedd gan y gwleidyddion ar y panel i ddweud mewn ymateb i gwestiwn am wella'r rhestrau aros a chael gwared ar ofal mewn coridorau.

Plaid Cymru

Yn ôl Rhun ap Iorwerth arweinydd Plaid Cymru, mae’n rhaid sicrhau “gwerthfawrogiad o amaeth oherwydd ei gyfraniad i gynhyrchu bwyd a diogelwch bwyd, o ran cymdeithas ac economi wledig”.

Ychwanegodd bod amaethwyr eisiau ffermio yn y ffordd fwyaf amgylcheddol posib a bod yn rhaid i lywodraeth eu helpu i wneud hynny.

Dywed Sami, un o griw Jomec fod 'na "ffocws mawr ar amaeth, cymunedau cefn gwlad ayyb. Dim lot am bobl sy'n byw yn y ddinas... yn enwedig pobl ifanc fel ni sy'n fyfyrwyr!"

Llafur Cymru

Yn ôl prif weinidog ac arweinydd Llafur Cymru, Eluned Morgan mae Brexit wedi cael effaith mawr ar amaeth.

Ychwanegodd bod cynhyrchu bwyd a gofalu am yr amgylchedd yn bwysig i’r diwydiant a bod Llafur yn “gwrando”.

Mae angen datblygu economi cefn gwlad yn gyffredinol, meddai, nid amaeth yn unig - er bod ffermio yn holl bwysig.