Cwest perfformiwr drag: Union achos marwolaeth ddim yn glir

Rhybudd: Gall y cynnwys beri gofid

Mae crwner wedi cofnodi casgliad agored mewn cwest i farwolaeth perfformiwr drag gafodd ei ddarganfod yn farw ar stryd gefn yng Nghaerdydd.

Cafodd corff Darren Meah-Moore oedd yn 39 oed ei ddarganfod wedi ei orchuddio â chardfwrdd yn ardal Plas Windsor, wedi iddo fod allan yn yfed gyda ffrindiau yng nghanol y ddinas ym mis Ionawr 2023.

Clywodd y cwest, er gwaetha'r ffaith bod ganddo alergedd i gŵn, bod Darren Meah-Moore wedi bod yn cymryd rhan mewn gweithred rywiol gyda dyn a chi ar stryd gefn yn oriau mân y bore.

Roedd lluniau CCTV yn dangos Gavin Thomas a'i gi Scooby yn gadael y safle, cyn i gorff Darren Meah-Moore gael ei ddarganfod 12 awr yn ddiweddarach, o dan gardfwrdd, yn dal yn ei wisg drag.

Dywedodd Mr Thomas wrth y cwest, ar ôl eu cyfarfyddiad, ei bod hi'n ymddangos bod Darren Meah-Moore wedi mynd i gysgu, ac fe roddodd y cardfwrdd arno i'w gadw'n gynnes cyn gadael.

Dywedodd y crwner cynorthwyol, David Regan, nad oedd yn derbyn honiad Mr Thomas sef "nad oedd yn credu y byddai Darren mewn perygl" petai'n ei adael ar y stryd gefn.

Doedd o chwaith ddim yn derbyn iddo ei orchuddio gyda chardfwrdd er mwyn ei gadw'n gynnes, ond ychwanegodd y crwner ei fod yn "methu â dweud a oedd wedi cael ei orchuddio am unrhyw reswm drwg".

Fe wnaeth yr heddlu ymchwilio, ond does neb wedi cael eu herlyn mewn cysylltiad â'i farwolaeth.

Roedd Darren Meah-Moore yn flaenorol wedi cael ei garcharu ym mis Mawrth 1999 ar ôl cael ei ddyfarnu'n euog o bedwar cyhuddiad o dreisio bachgen o dan 16 oed.

Cofnododd y crwner gasgliad agored, gan ddweud nad oedd yn bosib nodi un ffactor sicr fyddai wedi achosi marwolaeth Darren Meah-Moore, ac "nad oedd hi'n glir beth achosodd iddo fynd yn anymwybodol".

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.