د پاکستان مرکزي حکومت د اطلاعاتو او نشراتو وزیر عطاالله تارړ په افغانستان کې د پاکستاني ځواکونو د بریدونو اړوند وروستي جزییات خپاره کړي دي.
هغه پر خپله اېکس پاڼه یوه خپاره کړي پیغام کې ادعا کړې چې تر دې دمه د دوی د ځواکونو عملیاتو کې د طالبانو حکومت ۴۱۵ کسان وژل شوي او ۵۸۰ نور ټپیان دي.
نوموړي همدا راز د طالبانو حکومت ځواکونو د ۱۸۲ پوستونو او ۱۸۵ ټانکونو او زغرهوالو ګاډو د لمنځه وړلو او ۳۱ نورو پوستو د نیولو ادعا هم کړې ده.
د پاکستان د طلاعاتو وفاقي وزیر وايي، د پاکستان هوايي ځواکونو د افغانستان بېلابېلو برخو کې ۴۶ ځایونه له هوا په نښه کړي دي.
د طالبانو حکومت تر اوسه په دې تړاو غبرګون نه دی ښودلی، خو مخکې یې تور پورې کړی چې د پاکستان له اړخه بریدونو کې تر ډېره ملکي سیمې په نښه شوې او عامو خلکو ته مرګژوبله اوښتې ده.
بيبيسي د دواړو خواو ادعا او تورونه په خپلواک ډول نه شي تاییدولی.
وروستی, د طالبانو حکومت کې سرچینې وايي په کوټه کې یې د پاکستان پوځ پر قول اردو د ډرون برید کړی
د عکس سرچینه، Getty Images
د طالبانو حکومت دفاع وزارت کې سرچینو تایید کړې چې د پاکستاني ځواکونو د تېرې شپې هوایي بریدونو په ځواب کې یې نن سهار یوولس بجې د بلوچستان په کوټه کې د پاکستان پوځ قول اردو د ډورن په وسیله په نښه کړې ده. دغو سرچینو په دې اړه نور جزییات نه دي ورکړي.
هممهاله ځینو پاکستاني رسنیو هم د چارواکو په حواله ویلي، چې د هوايي دفاع سیستم یې د افغانستان له لوري یو ورغلی ډرون په کوټه ښار کې ویشتلی دی.
پاکستاني چارواکو تر اوسه په دې پېښه کې د مرګژوبلې او یا زیان اوښتلو څه نه دي ویلي.
د یادونې ده چې د طالبانو حکومت ویاند ذبیحالله مجاهد تېره شپه پر خپله اېکس پاڼه لیکلي وو چې د دوی ځواکونه په کابل کې پر پاکستاني الوتکو د هوايي دفاع ډزې کوي.
تر اوسه کره جزییات نشته چې پاکستاني ځواکونو تېره شپه د افغانستان پلازمېنه کې پر کومو سیمو هوايي بریدونه کړي او څومره زیان یې اړولی دی.
د طالبانو حکومت یوازې د ننګرهار د غنيخېلو په نهه وېشتمه ویاله کې د ډرون بریدونو یادونه او ادعا کړې چې د یوې ښځې په ګډون دوه کسان پکې وژل شوي او دوه نور ټپیان دي.
په ځینو ناتایید شویو رپوټونو کې پر باګرام هوايي اډې هم د هوايي برید خبر ورکړی شوی، خو بشپړ جزییات یې لا نشته.
بيبيسي د پاکستان او طالبانو حکومت لخوا پر یو بل د هوايي بریدونو رپوټونه او په هغو کې اوښتی زیان په خپلواک ډول نه شی تاییدولی.
د طالبانو حکومت سرحدي ځواکونه وايي، تورخم کې یې پر پاکستاني لوري انتقامي بریدونه کړي
د ویډیو تشریح، عبدالله فاروقي - د طالبانو حکومت د سرحدي ځواکونو عمومي ریاست ویاند
د طالبانو حکومت سرحدي ځواکونه وایي، د افغانستان په ختیځ ننګرهار کې یې تېره شپه تورخم کې پر ډیورنډ کرښه د پاکستان پر پوستو انتقامي بریدونو کې مقابل لوري ته مرګژوبله او زیانونه اړولي دي.
د طالبانو حکومت د سرحدي ځواکونو د عمومي ریاست عابدالله فاروقي ادعا کوي چې په دغو بریدونو کې د پاکستاني لوري د پوځي قوماندانۍ مرکز، کمیسارۍ او څو مهمې پوستې ویجاړې شوې او لس سرتېري یې وژل شوي دي.
په همدې مهال د طالبانو حکومت ویاند ذبيح الله مجاهد پر ا ېکس یوه پوسټ کې ليکلي چې پر پاکستاني الوتکو ډزې کېږي.
نوموړي ويلي، "کابل کې د پاکستاني الوتکو پر وړاندې د دافع هوا فيرونه کېږي. ښاريان دې تشويش نه کوي".
له دریو ورځو راهیسې د طالبانو حکومت او پاکستان تر منځ د ډيورنډ کرښې په اوږدو کې يو پر بل بریدونه کېږي چې دواړه خواوې يوه بل ته د مرګژوبلې اړولو ادعا کوي.
ترې دې وړاندې پاکستان په پلازمېنه کابل کې هم هوايي بریدونه کړي وو.
له دې مخکې په افغانستان کې د طالبانو حکومت ویاند ذبیح الله مجاهد په یوه ټویټر پیغام کې ویلي و، ''د بهرنيو چارو وزير، مولوي امير خان متقي، د سعودي عرب د بهرنيو چارو له وزير، شهزاده فيصل بن فرحان سره د ټيليفوني تماس له لارې د دواړو هېوادونو پر اړيکو، سيمه ييزو مسايلو او په ځانګړې توګه د افغانستان او پاکستان ترمنځ پر وروستي وضعيت تفصيلي خبرې وکړې.''
دا په داسې حال کې ده، چې تېره ورځ د قطر بهرنیو چارو وزارت پر خپله ایکس پاڼه خپاره کړي بیان کې ویلي و، د طالبانو حکومت د بهرنیو چارو چارسمبالي وزیر امیر خان متقي په بهرنیو چارو کې د قطر د دولت له وزیر محمد بن عبدالعزیز بن صالح الخلیفي سره تلېفوني خبرې کړې دي.
د عکس سرچینه، x
په بیان کې ویل شوي و، چې دواړ خواو په دې تلیفوني خبرو کې د افغانستان او پاکستان ترمنځ د کړکېچ کمولو پر لارو چارو بحث وکړ. بیان کې راغلي، ښاغلي الخلیفي د قطر لخوا د هغو ټولو هڅو بشپړ ملاتړ تکرار کړ چې موخه یې له سولهییزو لارو چارو د شخړو هواری او په سیمه ییزه او نړیواله کچه د سولې او ثبات بنسټونه پیاوړي کول دي.
په ورته مهال د مصر او پاکستان د بهرنیو چارو وزیرانو په افغانستان کې د طالبانو د حکومت او پاکستان ترمنځ د تاوتریخوالي په اړه خبرې کړې. د پاکستان بهرنیو چارو وزارت په وینا مرستیال لومړي وزیر او د بهرنیو چارو وزیر اسحاق ډار د مصر د بهرنیو چارو له وزیر سره په ټیلیفوني خبرو کې "په سیمه کې د وروستیو پرمختګونو، په شمول د پاکستان او افغانستان ترمنځ د وضعیت" په اړه خبرې کړې.
د افغانستان او پاکستان تر منځ د تاوتریخوالي دا تماسونه داسې حال کې شوي، چې د دواړو هېوادونو ګاونډي چین د بهرنیو چارو وزارت ویلي چې چین د افغانستان او پاکستان ترمنځ د مخ په زیاتیدونکې شخړې په اړه ژوره اندېښنه لري او د مرګژوبلې له امله خواشیني دي.
د چین بهرنیو چارو وزارت یوه ویاند وویل، چین له دواړو خواوو غوښتنه کوي چې له زغمه کار واخلي، د خبرو له لارې اختلافونه او شخړې حل کړي او ژر تر ژره جګړه پای ته ورسوي.
پاکستاني چارواکو بلوچستان کې پر ډرون کارولو بندیزو ولګاوه
د عکس سرچینه، Getty Images
ډیورنډ کرښې ته څېرمه د طالبانو حکومت تر ځوابي بریدونو وروسته چې له ډرون یې هم کار پکې اخیستی، اوس بلوچستان کې د کورنیو چارو صوبايي ادارې په ټول بلوچستان کې د ډرونونو، یو اې وي (UAVs)، کواډ کاپټرونو، کېم کاپټرونو او نورو ریموټ کنټرول الوتونکو وسائلو پر کارولو، ساتلو او چلولو سملاسي بشپړ بندیز لګولی دی.
د کورنیو چارو ادارې له لوري په خپره شوې اعلامیه کې ویل شوي چې د څارنې، جاسوسۍ، د منع ممنوع او چاودېدونکو توکو د لېږد، د وېرې او ترهې خپرولو او د امنیت او نظم د ګډوډېدو د اندېښنو له امله دا پرېکړه شوې ده.
په اعلامیه کې راغلي چې ''د خلکو د خوندیتوب، حساسو او مهمو تاسیساتو، عامه غونډو او مهمو شخصیتونو او کاروانونو د تګ راتګ د امنیت د یقیني کولو لپاره دا اقدام اړین و.''
د دولتي اعلامیې له مخې پولیسو او فرنټيئر کور (اېف سي) نیمه پوځي ملېشې ته د بندیز د عملي کولو لارښوونه شوې ده، او سرغړونکي به اړوندو قوانینو له مخې قانوني چلن سره مخامخ شي.
اعلامیه زیاتوي چې اړوندو ځايي چارواکو ته هم لارښوونه شوې چې هره ورځ بندیز د پلي کېدو راپور د کورنیو چارو وزارت ته ولېږي. په اعلامیه کې دغه راز ویل شوي، چې پولیس، ایف سي او نور امنیتي او دفاعي ادارې له دې بندیزه مستثنا دي.
له دې مخکې د خیبر پښتونخوا حکومت په دغه ایالت کې پر بې پېلوټه الوتکو او کابکاپټرونو ۳۰ ورځې بندیز لګولی دی. د خیبر پښتونخوا د کورنیو او قبایلو چارو ادارې دا اعلان تېره ورځ جمعه (کب ۸/فبروري ۲۷) د یوې خبرپاڼې په خپرولو سره وکړ.
په اعلامیه کې راغلي چې دا کار په خیبر پښتونخوا کې پر دولتي ودانیو د ډرون، کابکاپټرو او یا هم د بېپیلوټه الوتکو په څېر له لرې کنټرولېدونکو وسایلو باندې د بریدونو د مخنیوي او د خلکو د امنیتي خوندیتوب لپاره شوی دی.
د افغانستان او پاکستان تر منځ نښتو ته د مخکیني افغان حکومت د ځینو شخصیتونو غبرګونونه
په افغانستان کې د جمهوریت دورې ځینو سیاستوالو د افغانستان او پاکستان تر منځ روانې جګړې په تړاو غبرګونونه څرګند کړي. ځینو د پاکستان بریدونه غندلي او د هېواد د دفاع خبره یې کړې، خو ځینو نورو بیا د طالبانو پر حکومت نیوکې کړې او هغوی یې پړه بللي دي.
پاکستان ادعا کوي چې په افغانستان کې یې پر "۲۹ ځایونو" هوايي بریدونه کړي دي.
د پاکستان اطلاعاتو وزیر عطاالله تارړ ادعا کوي، چې د افغانستان پر ضد د ترسره شویو عملیاتو په ترڅ کې تر اوسه د "افغان طالبانو ۸۹ پوستې ویجاړې شوې، ۱۸ پوستې نیول شوې دي، او ۱۳۵ ټانکونه او زغره وال وسایط له منځه وړل شوي دي."
د پاکستان د اطلاعاتو وزیر په وینا، په دغو بریدونو کې د افغان طالبانو ۲۹۷ غړي وژل شوي او ۴۵۰ نور ټپیان شوي دي. د یادونې ده، چې خپلواکو سرچینو د دې شمېرو تائید نه دی کړی.
بل لور په افغانستان کې دطالبانو حکومت چارواکو ویلي د جمعې په سهار یې پاکستان کې دننه پر څو هدفونو هوايي بریدونه کړي دي. د طالبانو حکومت سرچینو بي بي سي ته وویل،دا بریدونه لهافغانستانه د پورته شویو بېپیلوټه الوتکو (ډرونونو) له لارې شوي دي.
د پاکستان د اطلاعاتو وزیر عطا الله تارړ واييچې د دوی پوځ هغه افغان ډرونونه شنډ کړي چې د سوات، نوښار او اېبټاباد پر لور په نښه شوي وو. اېبټاباد یوه پوځي اډه لرونکې ښار دی چې پکې د پاکستان پوځ اکاډیمي هم موقعیت لري.
