تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
تري تم شوی پاکستانی مدني فعال کور ته ستون شو
د پاکستان پلازمېنه اسلام اباد کې ځايي پولیس وايي، مدني فعال او بلاګ لیکونکی سلمان حیدر، چې څو ورځې مخکې تري تم شوی و، بېرته کور ته ستون شوی دی.
د ښاغلي حیدر کورنۍ هم منلې، چې هغه کورته رسېدلی او وايي روغتیا یې ښه ده.
سلمان حیدر د پوهنتون استاد دی، د بشري حقونو لپاره فعالیت کوي او پر ټولنیزو مسایلو د شاعرۍ له کبله یې شهرت موندلی. نوموړی د روانې میاشتې په شپږمه نېټه پلازمېنه اسلام اباد کې تري شوی و.
د هغه له ورکېدو وروسته د پاکستان لر او بر کې مظاهرې وشوې او له حکومته د هغه موندنې لپاره د اقداماتو غوښتنه وشوه.
د پاکستان کورنیو چارو وزیر چوهدري نثار علي خان پولیسو ته امر کړی و، چې د ښاغلي حیدر د موندلو لپاره لاس پر کار شي.
پولیسو ته د ورکړل شوې عریضې له مخې سلمان حیدر د جنورۍ پر شپږمه شپه د اسلام اباد بني ګاله سیمه کې له ملګرو سره و او مېرمنې ته یې ویلي و، چې د شپې تر اتو بجو به کورته ورسېږي، خو وروسته د نوموړي له ګرځنده ټیلیفونه د هغه کورنۍ ته لیکلی پیغام ورسېد، چې باید د هغه ګاډی له کورال نومي څلور لارې کورته ورسول شي.
سلمان حیدر په فاطمه جناح پوهنتون کې له استادۍ مخکې ډرامې لیکوالۍ، خبریالي او تیاتر برخه کې هم فعالیتونه کړي.