تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د بریتانیا ملکه دویمه الېزابت نن دوشنبه خاورو ته سپارل کېږي
میلیونه کسان د بریتانیا له ملکې دویمې الېزابت سره وروستۍ خدای پاماني کوي.
ټاکلې د هغې د جنازې رسمي دولتي مراسم نن دوشنبه په ځايي وخت سهار ۱۱ بجې لندن کې د ویسټ منسټر ابي کې ترسره شي.
په دغو مراسمو کې ۲۰۰۰ کسان ګډون کوي.
د ملکې الېزابت د جنازې مراسمو ته د نړۍ ګڼ مشران او د شاهي کورنیو غړي رابلل شوي دي.
تمه ده چې د نوموړې د جنازې د لېږدېدو پر مهال به د بریتانیا د پلازمېنې لندن پر سړکونو سلګونه زره کسان کتار ولاړ وي.
دا مراسم په تلویزیونونو هم په ژوندۍ بڼه ښودل کېږي چې د نړۍ لروبر به یې میلیونونه کسان ننداره وکړي.
پر دې ورځ بریتانیا کې عمومي رخصتي اعلان شوې، ښوونځي او ډېر پلورنځي به تړلي وي.
له دغو مراسمو وروسته به د ملکې الېزابت تابوت د ویسټ منسټر له کلیسا د لندن د هایډ پارک څنډه کې ولېنګټن ارچ ته ولېږدول شي.
هغه به د وېنډسور ماڼۍ کې د خپلې سلطنتي کورنۍ له وروستیو مراسمو وروسته تدفین شي.
د ملکې الېزابت تابوت له څلورو ورځو د پارلمان ویسټ منسټر هال کې عامه دعا او لیدو ته ایښودل شوی وو.
په دې موده کې هره ورځ زرګونه کسان دعا او درناوي ته ورتلل.
د بریتانیا پاچا دریم چارلس له خلکو مننه کړې چې د مور د مړینې له کبله یې د ده او کورنۍ ملاتړ کړی دی.