Moja kwa moja, Mahakama Kuu Uganda kusikiliza kesi ya uhaini ya Besigye leo

Moja kwa moja

Na Asha Juma & Mariam Mjahid

1. Dakika 3 zilizopitaMadaktari wa sudan wasema raia 28 wameuawa katika shambulio la RSF kaskazini Darfur

   Na Alfred Lasteck

   Takriban raia 28 wameuawa na wengine 39 kujeruhiwa kufuatia shambulio katika eneo la Mustariha, jimbo la Kaskazini Darfur nchini Sudan.

   Kwenye taarifa iliyotolewa Jumanne, Mtandao wa Madaktari wa Sudan (Sudan Doctors Network) ulisema eneo hilo lishambuliwa na wanamgambo wa RSF, vikiangamiza kituo pekee cha afya kilichokuwepo eneo hilo.

   Idadi ya waliopoteza maisha na kujeruhiwa inachukuliwa kuwa ya awali.

   “Wafanyakazi wa afya waliokuwa wakienda kazini pale walishambuliwa, na mfanyakazi mmoja wa afya alikamatwa na hadi sasa hajapatikana,” ilisema taarifa hiyo.

   Madaktari wa Sudan wamekosoa kitendo hicho, wakiitaka RSF kusitisha hofu kwa wakazi na kuzingatia makini mahitaji ya huduma za afya, huku wakidai kuwa mashambulio hayo yalikusudia kuathiri vituo vya afya.

   RSF bado haijatoa kauli yoyote kuhusu madai hayo.

   Mtandao wa madaktari ulisema vurugu hizo zimesababisha makundi ya watu kuhamia vijiji jirani na kuongezea hali mbaya za kibinadamu zilizokuwepo tayari katika eneo hilo.

   Kaskazini Darfur imekuwa ikishuhudia mapigano makali katika miezi ya hivi karibuni, huku migongano kati ya jeshi la Sudan na RSF ikiendelea kuharibu sehemu za nchi.

   Kulingana na Shirika la Afya Ulimwenguni (WHO), mashambulio matano dhidi ya vituo vya afya nchini Sudan yameripotiwa mwaka huu, yakiua watu 69 na kujeruhi wengine 49.

   Wakati huo huo, Madaktari wasiokuwa na mipaka, Médecins Sans Frontières (MSF) wanasema walitibu wagonjwa karibu 170 waliopata majeraha yanayohusiana na mashambulio ya drone katika wiki mbili za mwanzo za Februari.

   Pia Unaweza kusoma:

   Mzozo wa Sudan: 'Niliona miili ikitupwa kwenye kaburi la pamoja Darfur'

   'Nusu ya marafiki zangu waliuawa' - wasichana wanaorejea katika shule iliyojikuta katikati ya vita

   Mashambulizi ya jeshi la anga la Sudan yaua mamia katika miji, masoko na shule - Ripoti

2. Dakika 13 zilizopitaWanawake wawili wa Uganda wakamatwa kwa kubusiana hadharani

   Wanawake wawili wa Uganda wamekamatwa kwa kubusiana hadharani, msemaji wa polisi aliambia shirika la habari la AFP siku ya Jumanne, chini ya sheria ya kupinga mapenzi ya jinsia moja inayochukuliwa kuwa miongoni mwa kali zaidi duniani.

   Sheria ya kupinga mapenzi ya jinsia moja nchini Uganda ya mwaka 2023 inaweka adhabu ya hadi kifungo cha maisha kwa watu wanaoshiriki mahusiano ya jinsia moja kwa ridhaa.

   Aidha, kosa linaloitwa “uhusiano wa jinsi moja uliokithiri” linaweza kuadhibiwa kwa hukumu ya kifo.

   Wanawake hao wawili, wote wakiwa na umri wa miaka ya ishirini, walikamatwa kufuatia malalamiko kutoka kwa majirani katika mji wa Arua, ulioko kaskazini-magharibi mwa nchi, takriban kilomita 450 kutoka mji mkuu, Kampala. Wamekuwa wakishikiliwa rumande bila uwakilishi wa kisheria tangu tarehe 18 Februari.

   Msemaji wa polisi wa eneo hilo, Josephine Angucia, aliiambia AFP kuwa majirani waliwasiliana na polisi wakidai kuwa wanawake hao walikuwa wakijihusisha na mahusiano ya jinsia moja na walionekana wakibusiana hadharani. Aliongeza kuwa majirani hao pia walipiga picha kama ushahidi.

   Angucia alisema kuwa majirani walidai kuwa walikuwa wameona wanawake wengi wakiingia katika chumba kimoja walichokuwa wamepanga na kulala humo usiku, jambo walilolishuku kuwa ni mikusanyiko ya kingono ya jinsia moja.

   Alisema kesi hiyo imewasilishwa kwa mwendesha mashtaka wa serikali kwa ajili ya maelekezo na uwezekano wa kufikishwa mahakamani.

   Mtetezi wa haki za binadamu Frank Mugisha alilaani kukamatwa huko kupitia mtandao wa X, akisema tukio hilo “linaonesha hali halisi ngumu” inayowakabili watu chini ya sheria hiyo ya kupinga ushoga.

   Alisema sheria hiyo imechochea mzunguko hatari wa vitisho na unyang’anyi. “Wahalifu sasa wanatumia sheria hii kama silaha kuwadhulumu watu wa jumuiya ya LGBTQ+, wakijua kuwa waathiriwa wanaogopa sana kutafuta ulinzi,” alisema Mugisha.

   Uganda ni nchi yenye msimamo wa kihafidhina na yenye idadi kubwa ya Wakristo katika eneo la Afrika Mashariki.

   Sheria yake ya kupinga mahusiano ya jinsia moja ilisababisha hasira kutoka kwa wanaharakati wa haki za binadamu na kulaaniwa na Umoja wa Mataifa pamoja na nchi za Magharibi.

   Benki ya Dunia ilisimamisha ufadhili kwa nchi hiyo, ingawa ufadhili huo ulirejelewa tena katikati ya mwaka 2025.

   Soma pia:

   'Huwachukulia kama mbwa': Wakili anayehatarisha kila kitu kuwatetea wapenzi wa jinsi moja Afrika

   'Niliingia kwenye dunia ya siri ya ulevi wa ngono, nikageuka kuwa zombi'

   Changomoto za kuishi kama mpenzi wa jinsi moja katika nchi ya Kiislamu

3. Saa 2 zilizopitaMahakama Kuu Uganda kusikiliza kesi ya uhaini ya Besigye leo

   Mwanasiasa mkongwe wa upinzani nchini Uganda, Kizza Besigye, anatarajiwa kufikishwa tena Mahakama Kuu leo katika kesi ya uhaini inayomkabili, huku sintofahamu ikitawala kuhusu iwapo ataweza kufika kizimbani kutokana na hali yake ya kiafya kudaiwa kudhoofika.

   Kesi hiyo, inayosikilizwa na Jaji Emmanuel Baguma, iliahirishwa wiki tatu zilizopita baada ya mahakama kukataa ombi la utetezi la kumhamisha Besigye kutoka Gereza la Luzira kwenda katika hospitali binafsi kwa matibabu. Badala yake, mahakama ilitoa muda huo ili kumpa nafasi ya kupata nafuu na kuwezesha uwepo wake binafsi mahakamani.

   Katika kikao kilichopita, Jaji Baguma alisisitiza kuwa kesi haiwezi kuendelea bila mshtakiwa kuwepo kizimbani, akieleza kuwa hapakuwa na ushahidi wa kutosha unaoonyesha kuwa Besigye hawezi kupatiwa matibabu stahiki akiwa gerezani.

   Mawakili wa Besigye walipinga pia pendekezo la kuendesha kesi kwa njia ya mtandao (Zoom), baada ya maafisa wa magereza kudai kuwa hali ya afya ya mteja wao haingemruhusu kufikishwa mahakamani.

   Wakati hayo yakiendelea, mke wa mwanasiasa huyo amedai kuwa Rais Yoweri Museveni aliamuru kuahirishwa kwa maombi maalum yaliyokuwa yamepangwa kufanyika adhuhuri ya leo katika Kanisa la Rubaga Cathedral, jijini Kampala.

   Hata hivyo, uongozi wa Kanisa Katoliki nchini Uganda bado haujatoa taarifa rasmi kueleza sababu za kuahirishwa kwa ibada hiyo.

   Kwa sasa, macho na masikio ya wengi yanaelekezwa mahakamani, kusubiri iwapo Besigye atafikishwa kizimbani au kama kutatolewa maelezo mapya kutoka upande wa utetezi kuhusu hali yake ya afya.

   Soma Pia:

   Masaibu manne anayopitia Kizza Besigye Uganda

4. Saa 2 zilizopitaMpaka wa Gatumba-Uvira umefunguliwa tena

   Mpaka wa Gatumba-Kavimvira umeunguliwa jana, baada ya kufungwa kwa miezi kadhaa, baada ya waasi wa M23, wanapambana na jeshi la Jamhuri ya Kidemokrasia ya Kongo, kuuteka mji wa Uvira mapema Desemba (12) mwaka jana.

   Mji wa Uvira katika mkoa wa Kivu Kusini unapakana na wilaya ya Gatumba mkoani Bujumbura, na msongamano wa magari kati ya miji hiyo miwili ni mkubwa, kutokana na idadi kubwa ya watu na kiasi kikubwa cha bidhaa za kigeni kuvuka mpaka huu.

   Kutekwa kwa Uvira kulionekana kuwa tishio kwa Bujumbura, mji mkuu wa kifedha wa Burundi.

   M23 baadaye ilitoa Uvira kwa jumuiya ya kimataifa, hasa Marekani. Wakati mpaka huu ulipofunguliwa jana, Jumatatu, hakukuwa na msongamano mkubwa wa magari jinsi ulivyokuwa kabla ya mpaka kufungwa.

   Walio hatarini zaidi walikuwa wanawake na watoto walio katika mazingira magumu zaidi, wakirejea nyumbani baada ya zaidi ya miezi miwili uhamishoni nchini Burundi.

   Mwavita Françoise, mmoja wa wanawake waliorejea DR Congo, alisema: "Tumeona mengi lakini tunavumilia, namshukuru Mungu kwamba mpaka huu ulifunguliwa ili nirudi nyumbani".

   Wengine wanaofurahi ni wale wanaojitafutia riziki kutokana na msongomano wa mpakani.

   "Kwa kweli nina furaha sana, maisha yanaendelea tena kwa sababu yalikuwa yamesimama, tutegemee mambo yatakuwa sawa kama zamani kwa sababu tulikuwa katika hali mbaya," alisema Innocent Akimana, anayeongoza chama cha wasafirishaji wa viti vya magurudumu.

   Jean Paul Ndayarwanije ambaye ni dereva naye anasema:

   "Kama madereva tulikuwa tunasafirisha watu na mizigo kupitia mashirika, lakini hatukuweza kupata watu wa kusafirisha kwa sababu mipaka ilikuwa imefungwa. Hasara ilikuwa kubwa."

   “Kama sisi wapangaji tulifukuzwa kwenye nyumba za watu kwa sababu mwenye nyumba hakukubali ukae nyumbani kwake bila kulipa, leo kazi ikikaribia kuanza tunahama tena, tutafute kazi, tutafute njia za kupanga ili watoto walale vizuri.

   Mpaka huu ulifunguliwa baada ya Katibu Mkuu wa chama tawala cha CNDD FDD nchini Burundi kuwaambia raia wa Burundi wasitarajie mpaka wa Gatumba kufunguliwa hivi karibuni.

   "Buvira [Uvira] itafungwa kama Gasenyi, imefungwa kama Ruhwa [mpaka na Rwanda]. Usiseme, 'Nitaenda Buvira kesho, nitafanya nini?'" Reverien Ndikuriyo alisema katika mkutano na waandishi wa habari mbele ya wafuasi wengi wa CNDD-FDD, Januari 2 (1), 2026.

   Pia unaweza kusoma:

   Kutekwa kwa Uvira na mustakabali wa utawala wa Évariste Ndayishimiye Burundi - Uchambuzi

   Mkataba wa amani wa 'kihistoria' wa Trump ulivyovunjwa baada ya waasi kuuteka mji muhimu DRC

5. Saa 2 zilizopitaMarekani yawaondoa baadhi ya wafanyikazi wake kutoka Beirut huku mvutano ukiongezeka

   Kwa mujibu wa afisa mwandamizi wa Wizara ya Mambo ya Nje ya Marekani, wafanyakazi wasio wa lazima wameagizwa kuondoka katika ubalozi wa Marekani ulioko Beirut, mji mkuu wa Lebanon, kufuatia tathmini ya hali ya usalama.

   Uamuzi huo umechukuliwa wakati mvutano ukiendelea kuongezeka katika eneo la Mashariki ya Kati, huku Rais wa Marekani, Donald Trump, akitishia kuchukua hatua za kijeshi dhidi ya Iran iwapo hakutakuwa na makubaliano kuhusu mpango wake wa nyuklia.

   Iran tayari imetangaza kuwa itajibu endapo Marekani itafanya shambulio, na inaaminika kuwa kambi na vituo vya kijeshi vya Marekani katika Mashariki ya Kati vinaweza kuwa malengo ya mashambulizi.

   Wakati huo huo, Waziri wa Mambo ya Nje wa Marekani, Marco Rubio, ameahirisha ziara yake ya kwenda Israel bila kutoa sababu rasmi.

   Afisa huyo mwandamizi wa Wizara ya Mambo ya Nje amesema: “Tunaendelea kutathmini mazingira ya usalama na, kulingana na tathmini yetu ya karibuni, tumeona ni busara kupunguza idadi ya wafanyakazi hadi wale wa lazima pekee. Ubalozi utaendelea kufanya kazi kwa kutumia wafanyakazi muhimu. Hii ni hatua ya muda inayolenga kuhakikisha usalama wa watumishi wetu na kuendelea kuwahudumia raia wa Marekani.”

   Takribani wafanyakazi 50 wa ubalozi wa Marekani wameagizwa kuondoka Beirut.

   Afisa mmoja wa uwanja wa ndege ameiambia Reuters kuwa wafanyakazi 32 pamoja na familia zao waliondoka kupitia Uwanja wa Ndege wa Beirut siku ya Jumatatu.

   Alhamisi, Trump alisema dunia itafahamu “ndani ya siku kumi zijazo au zaidi” iwapo kutakuwa na makubaliano au kama Marekani itachukua hatua ya kijeshi dhidi ya Iran.

   Soma pia:

   Je, Iran inaweza kufunga mkondo wa bahari wa Hormuz, na itaathiri vipi dunia?

   Kutoka bunduki hadi mapanga: Silaha zilizoua maelfu ya raia nchini Iran

   Kwa nini mazungumzo ya Iran na Marekani ni nyeti

6. Saa 3 zilizopitaTehran yatoa masharti mapya ili kufikia makubaliano na Marekani

   Iran imetoa “mapendekezo mapya ya maridhiano” kuhusu mpango wake wa nyuklia kwa lengo la kufikia makubaliano na Marekani.

   Baadhi ya mapendekezo hayo ni kama vile kuondolewa kwa vikwazo vya kiuchumi, na kutambuliwa kwa haki ya Tehran ya “kuendeleza nishati ya nyuklia kwa matumizi ya amani'’, haya ni kwa mujibu wa Shirika la habari la Reuters.

   Aidha, Reuters imeripoti kuwa afisa mmoja mwandamizi wa Iran amesema kuwa bado kuna tofauti kubwa kati ya pande hizo mbili, hata kuhusu wigo na utaratibu wa kupunguza au kuondoa vikwazo vikali vya Marekani.

   Taarifa hiyo inakuja wakati Oman, ambayo inachukua jukumu la upatanishi katika mazungumzo kati ya Iran na Marekani, imethibitisha kuwa duru mpya ya mazungumzo itafanyika Geneva Alhamisi ijayo.

   Afisa huyo pia amesema kuwa Iran “inazingatia kwa umakini” uwezekano wa kusafirisha nje nusu ya akiba yake ya urani iliyorutubishwa kwa kiwango cha juu, kupunguza kiwango cha nusu iliyobaki, na kuunda muungano wa kikanda wa urutubishaji.

   Kwa mujibu wa Reuters, wazo hilo limekuwa likijitokeza mara kwa mara katika juhudi za kidiplomasia zilizohusisha Iran kwa miaka kadhaa.

   Aidha, afisa huyo alieleza kuwa hatua hiyo itakwenda sambamba na Marekani kuitambua rasmi haki ya Iran ya “kuendeleza nyuklia kwa matumizi ya amani,” huku makubaliano hayo yakijumuisha pia kuondolewa kwa vikwazo vya kiuchumi vilivyowekwa dhidi ya Iran.

   Soma zaidi:

   Iran yaonya: Hatuna kitu kama mashambulizi ya mipaka; shambulio lolote halitahusu vita kati ya nchi hizo mbili pekee

   Trump akanusha ripoti kwamba kamanda mkuu wa jeshi la Marekani anapinga shambulio dhidi ya Iran

7. Saa 3 zilizopitaLissu ashinda pingamizi dhidi ya ushahidi wa ziada katika kesi yake ya uhaini

   Jopo la majaji watatu wa Mahakama Kuu, Masjala Ndogo ya Dar es Salaam, likiongozwa na Jaji Dunstan Ndunguru, limetupilia mbali ombi la Mawakili wa Serikali la kuwasilisha ushahidi wa ziada kutoka kwa shahidi wa mpelelezi, ACP Amini Mahamba, katika kesi ya uhaini inayomkabili Mwenyekiti wa CHADEMA, Tundu Lissu.

   Uamuzi huo umefuatia pingamizi lililowasilishwa na Lissu, akipinga hatua ya upande wa mashtaka kuomba kuongezwa kwa ushahidi huo wa ziada. Majaji wameridhia pingamizi hilo na kuamua kuwa ombi la Serikali halina msingi wa kisheria.

   Kwa uamuzi huo, Lissu ameshinda pingamizi lake la msingi, akidai kuwa kuongezwa kwa ushahidi huo ni kinyume cha Kifungu cha 308 cha sheria, ambacho kinaelekeza utaratibu wa kuwasilisha ushahidi au kumwita shahidi mpya ambaye hakuwepo katika mwenendo wa awali wa Mahakama Kabidhi.

   Tundu Lissu: Je, huu ndiyo mwisho wa Mwanasiasa huyu wa Tanzania?

   Je, Chadema inajijenga au inajimega?

   Tundu Lissu ni nani? Mambo 7 yanayomtambulisha mwanasiasa huyu wa Tanzania mwenye misimamo mikali

8. Saa 4 zilizopitaUshuru mpya wa Trump wa 10% waanza kutekelezwa

   Ushuru mpya wa kimataifa wa Rais wa Marekani Donald Trump umeanza kutekelezwa kwa 10% baada ya Mahakama ya Juu Zaidi nchini humo kuzuia ushuru mkubwa wa uagizaji bidhaa siku ya Ijumaa.

   Saa chache tu baada ya uamuzi wa wiki iliyopita, rais alisaini amri ya serikali ya kutoza ushuru mpya kuanzia tarehe 24 Februari.

   Baadaye alitishia kuongeza ushuru huo hadi 15% lakini bado hajatoa agizo rasmi la kuongeza kiwango hicho. BBC imewasiliana na Ikulu ya White House kwa maoni.

   Utawala unatekeleza hatu hii ya kuongeza ushuru chini ya Kifungu cha 122 cha Sheria ya Biashara ya 1974, ambayo inaruhusu rais kutoza ada hiyo kwa siku 150 bila idhini ya bunge.

   "Nadhani inaongeza tu msukosuko," alisema Carsten Brzeski, mchambuzi wa benki ya uwekezaji ING, akimaanisha ushuru unaobadilika haraka na athari zake kibiashara.

   "Kuhusu kutokuwa na uhakika tumerudi mahali tulipokuwa mwaka jana," aliambia kipindi cha BBC Today programme, akiongeza kuwa sasa kuna hatari kubwa zaidi kwamba washirika wa kibiashara wa Marekani watalipiza kisasi.

   "Hatari ya vita kamili vya ushuru - vita vya kibiashara – iko uko juu zaidi kuliko mwaka jana," Brzeski alisema.

   Soma zaidi:

   Trump atangaza ushuru mpya wa 10% kujibu uamuzi wa Mahakama ya Juu ya Marekani

   Sera ya ushuru ya Marekani 'haijabadilika', asema mwakilishi wa biashara wa Trump

   Ushuru ni nini na kwa nini Trump anautumia?

9. Saa 4 zilizopitaPutin hajafikia malengo yake, Zelensky asema miaka minne baada ya uvamizi wa Urusi

   Rais wa Ukraine Volodymyr Zelensky amesema kwamba Vladimir Putin wa Urusi alishindwa kuwakatisha tamaa Waukraine alipoivamia nchi yake miaka minne iliyopita.

   "Leo inaadhimisha miaka minne tangu Putin aanze harakati zake za siku tatu za kuichukua Kyiv," ameandika katika ujumbe kwenye Telegram.

   "Na hii ina maana kubwa juu ya upinzani wetu, kuhusu jinsi Ukraine imekuwa ikipigana wakati huu wote."

   Zelensky amesema kwamba, nyuma ya maneno hayo, "kuna mamilioni ya watu wetu, ujasiri mkubwa, kazi nzuri ya kupigiwa mfano, uvumilivu, na mengi ambayo Ukraine imekuwa ikiifanya tangu Februari 24 [2022]."

   "Tukiangalia nyuma mwanzoni mwa uvamizi na kutafakari leo, tuna haki ya kusema: tumetetea uhuru wetu, hatujapoteza uraia wetu, Putin hajafikia malengo yake," anaendelea.

   "Hajawakatisha tamaa Waukraine, hajashinda vita hivi."

   "Tumeilinda Ukraine, na tutafanya kila kitu ili kufikia amani na haki. Utukufu kwa Ukraine!"

   Soma zaidi:

   Putin ameanza Vita vya tatu vya Dunia na lazima akomeshwe - Zelensky

   Je, amani inakaribia Ukraine baada ya juhudi za kidiplomasia?

   Hiki ndicho kiwanda cha siri cha makombora mapya ya 'kumtetemesha' Putin

   Matukio 5 makubwa ya kukumbukwa duniani 2025

10. Saa 5 zilizopitaBBC yaomba msamaha kwa kutangaza maneno ya ubaguzi wa rangi katika matangazo ya Tuzo za Bafta

    BBC imeomba radhi kwa kutohariri maneno ya ubaguzi wa rangi wakati wa matangazo yake ya Tuzo za Filamu za Bafta baada ya mgeni mwenye ugonjwa wa mfumo wa neva unaoainishwa kwa mitetemo ya ghafla ya kimisuli na sauti unaojulikana kama ‘Tourette’ kupiga kelele wakati waigizaji wawili wenye asili ya Kiafrika walipokuwa jukwaani.

    John Davidson, ambaye simulizi yake ya maisha ilihamasisha filamu ya I Swear, alipiga kelele akitaja neno N huku nyota wa Sinners Michael B Jordan na Delroy Lindo wakitoa zawadi ya kwanza ya sherehe ya Jumapili.

    Sehemu hiyo haikuhaririwa kutoka kwa matangazo ya BBC One, ambayo yalionyeshwa kwa kuchelewa kwa saa mbili, na yakasikika kwenye BBC iPlayer siku ya Jumatatu asubuhi kabla ya kuondolewa.

    Msemaji wa BBC alisema: "Tunaomba msamaha kwa kutohariri sehemu hii kabla ya matangazo haya kupeperushwa hewani na sasa itaondolewa kwenye toleo la BBC iPlayer."

    Kelele zilisikika katika matangazo, ingawa watazamaji wengi hawakuelewa kwa urahisi neno hilo.

    Kiongozi wa Chama cha Conservative Kemi Badenoch alisema BBC ilifanya "kosa baya mno" kwa kutohariri sehemu hiyo kwa wakati, na kuongeza: "Nafkiri kuomba msamaha ni muhimu, wanahitaji kuelezea kwa nini sehemu hiyo haikufutwa kabisa."

    Katika taarifa yake, BBC ilisema: "Baadhi ya watazamaji huenda walisikia maneno makali na ya kukera wakati wa Tuzo za Filamu za Bafta."

    "Hili lilitokana na mitetemo ya maneno yanayotoka yenyewe yenye kuhusishwa na ugonjwa wa ‘Tourette’, na kama ilivyoelezwa wakati wa sherehe haikuwa makusudi."

    Shirika hilo lilikataa kutoa maoni zaidi kuhusu kwa nini halikuhariri au kufutwa kabisa sehemu hiyo mwanzoni.

    Taarifa kutoka Bafta ilisema imetambua athari ya tukio hilo, "zungumzia kilichotokea na uombe msamaha kwa wote".

    Davidson, mwanaharakati wa ugonjwa wa Tourette kutoka Galashiels huko Scotland, ambaye aliteuliwa kuwa MBE mnamo 2019, alipiga kelele kwa sauti kubwa mara kadhaa kabla na wakati wa sherehe ya Bafta.

    Alisema Jumatatu kwamba "ninasikitika sana ikiwa mtu yeyote atachukulia mitetemo yangu isiyo ya hiari kuwa ya makusudi au yenye maana yoyote".

    "Nilichagua kuondoka ukumbini mapema kabla ya sherehe kwani nilikuwa najua kero ambayo mitetemo yangu ilikuwa ikisababisha."

    Pia unaweza usoma:

    Vinícius: Miaka minane akiwa Real Madrid, matukio 20 ya madai ya ubaguzi

11. Saa 6 zilizopitaPacquiao na Mayweather wakubali kuzichapa katika mechi ya marudiano

    Wanandondi maarufu Manny Pacquiao na Floyd Mayweather wamekubaliana kuzichapa tena katika pambano la kitaalamu mnamo mwezi Septemba.

    Pacquiao, 47, na Mayweather, 48, watapigana Sphere huko Las Vegas Jumamosi, Septemba 19, huku pambano hilo likionyeshwa moja kwa moja kwenye Netflix.

    Itakuwa pambano la kwanza la kitaalamu kwa Mmarekani huyo tangu amshinde Conor McGregor raundi ya 10 ya pigano kwa ‘knockout’ tangu mwaka 2017.

    Pacquiao wa Ufilipino alistaafu kutoka kwenye mchezo huo ili kujikita zaidi kwenye taaluma yake ya kisiasa mwaka wa 2021 lakini alirudi ulingoni Julai iliyopita kupambana na bingwa wa WBC wa uzito wa welterweight Mario Barrios, ambaye alihifadhi taji lake baada ya kutoka sare.

    Mayweather na Pacquiao walikutana kwa mara ya kwanza mwaka wa 2015, katika kile kilichoitwa 'Pambano la Karne' na linasalia kuwa la kihistoria katika ndondi.

    Mayweather aliibuka na ushindi, akimshinda Pacquiao kupitia uamuzi mpana wa pamoja huko Las Vegas.

    Pacquiao, mshindi wa mataji 12 ya dunia katika madaraja manane ya uzito, alisema: "Mimi na Floyd tuliipa dunia pambano kubwa zaidi katika historia ya ndondi."

    "Mashabiki wamesubiri vya kutosha. Wanastahili mechi hii ya marudiano."

    "Nataka Floyd aishi na majuto ya pambano alilopoteza katika rekodi yake ya kitaaluma na akumbuke kila wakati ni nani aliyempa kipigo hicho."

    Mayweather, ambaye anatimiza miaka 49 siku ya Jumanne, alisema: "Tayari nimepigana na kumshinda Manny mara moja. Wakati huu matokeo yatakuwa sawa."

    Mayweather ameshinda mapambano yake yote ya kitaaluma kwa 50-0, huku 27 akishinda kwa ‘knockout’.

    Maelezo kamili kuhusu upatikanaji wa tikiti na mengineo yatatangazwa katika wiki zijazo.

12. Saa 7 zilizopitaSesko na Lammens waruhusu Man Utd kuwa na ndoto ya kuingia Ligi ya Mabingwa

    Benjamin Sesko alikuwa mchezaji wa akiba wa Manchester United kwa mechi ya pili mfululizo huku Mslovenia huyo akifunga bao pekee dhidi ya Everton na kuwaweka vijana wa Michael Carrick katika nafasi ya nne.

    Siku kumi na tatu baada ya mshambuliaji huyo wa pauni milioni 73.7 kufunga bao katika dakika za majeruhi na kuokoa pointi moja dhidi ya West.

    Sesko aliendelea kutamba baada ya kumpa pasi Matheus Cunha. Kufikia wakati Cunha alipompa pasi ndefu Bryan Mbeumo, Sesko mwenye hamu kubwa alikuwa amewazidi nguvu walinzi wa Everton na alikuwa tayari kufunga bao lake la nane msimu huu.

    Cha kushangaza, mabao mawili tu kati ya hayo yalifungwa na kocha wa zamani Ruben Amorim, huku matatu yakifungwa na Darren Fletcher katika michezo miwili akiwa kama kocha wa muda na matatu chini ya Carrick, ambaye sasa ameshinda michezo mitano kati ya sita aliyocheza akiwa kama meneja.

    Ilikuwa wakati wa kusisimua baada ya muda mrefu katika mechi ambayo ilikuwa na ubora wa chini katika Uwanja wa Hill Dickinson.

    Pande zote mbili zilipambana dhidi ya ulinzi mkali, baada ya kukaa kwa karibu wiki mbili bila mchezo baada ya kucheza mapema katika raundi ya mwisho ya mechi, mechi hii ikiwa mwishoni, na bila mechi yoyote katika Kombe la FA baada ya kutolewa mapema.

    Katika mchezo wenye fursa finyu, mlinzi James Tarkowski alifanikiwa kuzuia mpira kuvuka mstari wa lango katika kipindi cha kwanza baada ya juhudi za Amad kuokolewa kiasi na Jordan Pickford.

    Kipa Senne Lammens alimnyima kinda Harrison Armstrong, ambaye alikuwa na mchezo mzuri upande wa Everton kabla ya Michael Keane kuachia mpira kwa nguvu dakika nane kabla ya mpira kuisha.

    Mpira ulikuwa unaelekea kwenye kona ya juu kushoto lakini Lammens alikuwa macho tena, huku mchezaji huyo wa kimataifa wa Ubelgiji akiokoa mpira kwa njia ya kipekee.

    Matokeo haya yanamaanisha kuwa sasa ni michezo saba ya nyumbani bila ushindi katika mashindano yote kwa Everton, ambao wako katika nafasi ya tisa.

    Soma zaidi:

    Tetesi za soka Ulaya Jumanne: Man United kumrudisha kiungo wa Scotland Scott McTominay kwa £70m

13. Saa 8 zilizopitaTrump akanusha ripoti kwamba kamanda mkuu wa jeshi la Marekani anapinga shambulio dhidi ya Iran

    Rais wa Marekani Donald Trump, Jumatatu jioni - Februari 23 - alikanusha ripoti kwamba Jenerali Daniel Kane, anayejulikana kama "Razen", anapinga hatua za kijeshi dhidi ya Iran.

    Katika chapisho kwenye mtandao wa kijamii Jumatatu jioni, Bw. Trump aliandika kwamba alizingatia ripoti hizo kuwa za "uongo kabisa" na kufafanua kuwa hakuna chanzo maalum kilichotajwa kuhusu madai haya.

    Amesisitiza kuwa: Jenerali Kane, sawa na maafisa wengine, hana mwelekeo wa vita, lakini iwapo uamuzi utatolewa wa kuchukua hatua za kijeshi dhidi ya Iran, anaamini kwamba atashinda kwa urahisi mzozo huo.

    Bw. Trump aliongeza kuwa Jenerali Kane anaifahamu vyema Iran kwa sababu aliamuru Operesheni ya Midnight Hammer, mashambulizi ya anga dhidi ya vituo vya Irani majira ya joto yaliyopita.

    Kufuatia shambulio hilo, alisema, mpango wa nyuklia wa Iran "hautaendelea tena" kwani "umeharibiwa kabisa" kufuatia mashambulizi ya ndege za Marekani za B-2.

    Rais wa Marekani alimtaja Jenerali Kane kama "shujaa mkubwa" na kusema anawakilisha "jeshi lenye nguvu zaidi duniani."

    Bw.Trump aliongeza kuwa kamanda huyo wa kijeshi wa Marekani hajawahi kusema kuchukua hatua dhidi ya Iran au hata mashambulizi machache - aliyoyaita "ya uwongo" - na analenga tu "ushindi" na ataelekeza operesheni hiyo ikiwa shambulio litaamriwa.

    Pia alisema kwamba nyenzo zote zilizochapishwa kuhusu uwezekano wa vita na Iran hazikuwa sahihi na ni za makusudi.

    Alisisitiza kwamba uamuzi wa mwisho ni juu yake na kwamba angependelea kufikia makubaliano na Iran, lakini kwamba ikiwa hakuna makubaliano yatafikiwa, "siku hiyo itakuwa mbaya sana kwa nchi hiyo" na, alisema, "kwa bahati mbaya kwa watu wake," ambao aliwataja kuwa "wakubwa na wanaostahili."

    Vyombo kadhaa vya habari vya Marekani, kama vile Wall Street Journal, Washington Post, na New York Times, vimechapisha ripoti katika siku chache zilizopita, vikinukuu "vyanzo vya habari" visivyojulikana, vinavyoelezea chaguzi, sifa, na majadiliano ndani ya White House kuhusu uwezekano wa mashambulizi ya kijeshi dhidi ya Iran.

    Soma zaidi:

    Iran yaonya: Hatuna kitu kama mashambulizi ya mipaka; shambulio lolote halitahusu vita kati ya nchi hizo mbili pekee

14. Saa 8 zilizopitaHabari za hivi punde, Iran yaonya: Shambulio lolote dhidi ya nchi hiyo halitafanyika kati ya nchi mbili pekee

    Iran imeonya kwamba uwezekano wa mashambulizi ya Marekani dhidi ya nchi hiyo hautafanyika kwa nchi mbili pekee.

    Msemaji wa Wizara ya Mambo ya Nje ya Iran anasema hakuna kitu kinachoitwa shambulio lenye mipaka na operesheni yoyote dhidi ya Iran itakabiliwa na jibu kali.

    Hapo awali, baadhi ya vyombo vya habari viliripoti kwamba Donald Trump alikuwa akizingatia shambulio dogo dhidi ya Iran ili kuilazimisha Jamhuri ya Kiislamu kukubali mistari myekundu ya Marekani kwa kufikia makubaliano.

    Israel pia imeonya kuwa shambulio la kisasi la Iran dhidi ya nchi hiyo litakuwa kosa kubwa zaidi katika historia ya Jamhuri ya Kiislamu.

    Pia unaweza kusoma:

    Trump akanusha ripoti kwamba kamanda mkuu wa jeshi la Marekani anapinga shambulio dhidi ya Iran

15. Saa 8 zilizopitaWatu 15 wafariki baada ya helikopta kuanguka wakati wa uokoaji wa mafuriko Peru

    Watu kumi na tano wamefariki baada ya helikopta ya kijeshi inayotoa huduma za uokoaji wakati wa mafuriko makubwa kusini mwa Peru kuanguka siku ya Jumapili.

    Jeshi la Anga la Peru lilisema helikopta ya Mi-17 ilipoteza mawasiliano wakati ikifanya kazi katika eneo la Arequipa, ambalo limekumbwa na mvua kubwa na mafuriko.

    Maafisa walisema timu za uokoaji zilipata mabaki ya helikopta hiyo katika wilaya ya Chala Jumatatu. Watoto saba walikuwa miongoni mwa abiria 11 na wafanyakazi wanne waliofariki.

    Helikopta hiyo ilikuwa imetumwa kusaidia juhudi za utafutaji na uokoaji katika eneo hilo huku maporomoko ya matope na mito iliyofurika ikisababisha uharibifu mkubwa.

    Vyombo vya habari vya ndani viliripoti kwamba baadhi ya wanajeshi waliokuwa ndani ya ndege hiyo walikuwa na jamaa walioandamana nao. Mmoja wa waathiriwa alikuwa na umri wa miaka mitatu.

    Jeshi la Anga la Peru lilisema: "Tunatoa rambirambi zetu za dhati kwa familia, marafiki, na familia nzima ya FAP kwa msiba huu wa wafanyakazi wetu na abiria."

    Uchunguzi umeanzishwa kuhusu tukio hilo, maafisa walisema.

    Mvua kubwa imesababisha mafuriko makubwa katika eneo la Arequipa nchini Peru na kusababisha maporomoko ya matope, mitaa iliyofurika maji, nyumba na miti kuanguka.

    Pia unaweza kusoma:

    Kwa nini misukosuko ya ndege inaongezeka? Kuna suluhisho?

    Ajali 5 za ndege mbaya zaidi kuwahi kutokea duniani

16. Saa 8 zilizopita'Ole wenu mnaocheza michezo ya paka na panya' na mikataba ya kibiashara – Trump

    Rais wa Marekani Donald Trump ameonya nchi dhidi ya kujiondoa katika mikataba ya kibiashara iliyojadiliwa hivi karibuni na Marekani baada ya Mahakama ya Juu Zaidi nchini humo kutoa uamuzi kuwa ushuru wake wa dharura siyo halali, akisema kwamba ikiwa watafanya hivyo, atawatoza ushuru mkubwa zaidi chini ya sheria tofauti za kibiashara.

    Trump, katika mfululizo wa machapisho ya mitandao ya kijamii, alisema pia anaweza kutoza ada za leseni kwa washirika wa kibiashara huku kutokuwa na uhakika kuhusu hatua zake zijazo za ushuru kukiathiri uchumi wa dunia.

    "Nchi yoyote inayotaka 'kucheza mchezo wa paka na panya' na uamuzi wa kipuuzi wa mahakama ya juu zaidi, hasa zile ambazo 'zimeiibia' Marekani kwa miaka mingi, na hata miongo kadhaa, zitakabiliwa na ushuru wa juu na mbaya zaidi, kuliko ule ambao wameukubali hivi karibuni. MNUNUZI TAHADHARI!!!" Trump aliandika kwenye mtandao wa Truth Social.

    Trump alisema kwamba licha ya uamuzi wa mahakama wa kubatilisha ushuru wake chini ya Sheria ya Dharura ya Kiuchumi Kimataifa, uamuzi wake umethibitisha uwezo wake wa kutumia ushuru chini ya mamlaka zingine za kisheria "kwa njia yenye nguvu zaidi na ya kuchukiza, kwa uhakika wa kisheria, kuliko ushuru kama ulivyotumika awali."

    Alipendekeza kwamba Marekani inaweza kutoza ada mpya za leseni kwa washirika wa kibiashara, lakini hakutoa maelezo yoyote.

    Msemaji wa ofisi ya Mwakilishi wa Biashara wa Marekani hakujibu mara moja ombi la kutoa maoni zaidi kuhusu mipango ya Trump.

    Pia unaweza kusoma:

    Sera ya ushuru ya Marekani 'haijabadilika', asema mwakilishi wa biashara wa Trump

    Trump atangaza ushuru mpya wa 10% kujibu uamuzi wa Mahakama ya Juu ya Marekani

    Ushuru ni nini na kwa nini Trump anautumia?

    Ni nchi gani zinazofanya biashara na Iran na ushuru wa Trump unamaanisha nini?

17. Saa 9 zilizopitaHujambo msomaji wetu. Karibu katika matangazo yetu mubashara, tarehe ni 24/02/2026.