நேரலை, எல்பிஜி விநியோகம் தொடர்பாக நாட்டு மக்களுக்கு முக்கிய அறிவுரை

நேரடி செய்தி/ ஒலி/ஒளிபரப்பு

1. 3 மணி நேரங்களுக்கு முன்னர்எல்பிஜி விநியோகம் தொடர்பாக நாட்டு மக்களுக்கு முக்கிய அறிவுரை

   

   பட மூலாதாரம், Getty Images

   ஞாயிற்றுக்கிழமையன்று, இந்தியாவின் பெட்ரோலியம் மற்றும் இயற்கை எரிவாயு அமைச்சகம், பெட்ரோல், டீசல் மற்றும் எரிவாயு தொடர்பாக பொதுமக்களுக்கு அறிவுரை வழங்கியது.

   அமைச்சகத்தின் அறிக்கை ஒன்றில், "பெட்ரோல், டீசல் மற்றும் எல்பிஜி ஆகியவற்றை மக்கள் பீதியுடன் வாங்குவதைத் தவிர்க்குமாறு அறிவுறுத்தப்படுகிறார்கள். பெட்ரோல், டீசல் மற்றும் எல்பிஜி கிடைப்பதை உறுதிசெய்ய அரசாங்கம் அனைத்து முயற்சிகளையும் மேற்கொண்டு வருகிறது." என கூறப்பட்டுள்ளது.

   வதந்திகள் குறித்து பொதுமக்கள் எச்சரிக்கையாக இருக்குமாறு அறிவுறுத்தப்பட்டுள்ளனர். இதனுடன், பிஎன்ஜி மற்றும் மின்சார அல்லது இன்டக்ஷன் அடுப்புகள் போன்ற மாற்று எரிசக்தி ஆதாரங்களைப் பயன்படுத்த மக்கள் ஊக்குவிக்கப்பட்டுள்ளனர்.

   இரான் போர் மற்றும் மேற்கு ஆசிய நெருக்கடி ஆகியவை எண்ணெய் மற்றும் எரிவாயு விநியோகத்தை கடுமையாகப் பாதித்துள்ளன. தற்போதைய சூழ்நிலையில் எரிசக்தியைச் சேமிக்குமாறு பெட்ரோலியம் மற்றும் இயற்கை எரிவாயு அமைச்சகம் அனைத்து சாமானிய மக்களையும் வலியுறுத்தியுள்ளது.

   தற்போதைய புவிசார் அரசியல் சூழ்நிலை இருந்தபோதிலும், உள்நாட்டு எல்பிஜி, உள்நாட்டு பிஎன்ஜி மற்றும் சிஎன்ஜி (வாகனங்களுக்கானது) ஆகியவற்றின் 100% விநியோகம் உறுதி செய்யப்படுவதை அரசாங்கம் உறுதி செய்துள்ளது என்று அமைச்சகம் கூறியுள்ளது.

   இதனுடன், தேவையின் மீதான அழுத்தத்தைக் குறைக்க மண்ணெண்ணெய் மற்றும் நிலக்கரி போன்ற மாற்று எரிபொருட்களும் கிடைக்கச் செய்யப்பட்டுள்ளன. தற்போதைய புவிசார் அரசியல் சூழ்நிலை காரணமாக எல்பிஜி விநியோகம் தொடர்ந்து பாதிக்கப்பட்டு வருவதாக அமைச்சகம் தெரிவித்துள்ளது.

   எனவே, வீட்டு உபயோக நுகர்வோருக்கு எல்பிஜி வழங்குவதற்கு முன்னுரிமை அளிக்கப்பட்டுள்ளதாக அந்த அறிக்கை கூறுகிறது.

2. 4 மணி நேரங்களுக்கு முன்னர்பாஜகவில் ஆம் ஆத்மியின் மாநிலங்களவை எம்.பி.க்கள் - சட்ட நடவடிக்கை எடுக்க முடியுமா?

   

   பட மூலாதாரம், ANIANI

   ராகவ் சத்தா உள்ளிட்ட ஆம் ஆத்மி கட்சியின் மூன்றில் இரண்டு பங்கு மாநிலங்களவை உறுப்பினர்கள் பாஜவில் இணைந்த விவகாரத்தில், 'ஆம் ஆத்மி' கட்சி விரைவான விசாரணையைக் கோரியுள்ளது.

   "அனைத்து நிபுணர்களுடன் கலந்தாலோசித்து, (கபில்) சிபல்லின் கருத்தை அறிந்த பிறகு, மாநிலங்களவைத் தலைவருக்கு (இந்திய குடியரசுத் துணைத் தலைவர்) ஒரு மனுவை அனுப்பியுள்ளேன்," என்று ஞாயிற்றுக்கிழமையன்று ஆம் ஆத்மி கட்சியின் மூத்த தலைவரும், மாநிலங்களவை உறுப்பினருமான சஞ்சய் சிங் கூறினார்.

   "அரசியலமைப்பின் பத்தாவது அட்டவணையின்படி, இந்த ஏழு உறுப்பினர்களின் பதவியையும் முழுமையாக ரத்து செய்ய வேண்டும் என்று அதில் கோரிக்கை விடுக்கப்பட்டுள்ளது. இந்த விவகாரத்தை விரைவில் விசாரித்து, ஒரு நியாயமான முடிவை எடுக்குமாறு அவைத் தலைவரான குடியரசுத் துணைத் தலைவரிடம், கேட்டுக் கொண்டுள்ளேன்," என சஞ்சய் சிங் மேலும் கூறினார்.

   இந்த விவகாரத்தில் உச்ச நீதிமன்றத்தின் பல தீர்ப்புகள் உள்ளன என்றும், தனது எம்.பி.க்கள் கட்சியை விட்டு வெளியேறியது தொடர்பாக சட்டப் போராட்டம் நடத்தப்படும் என்றும் சஞ்சய் சிங் தெரிவித்துள்ளார்.

   

   பட மூலாதாரம், ANI

   தீர்மானம் நிறைவேற்றாமல் இணைப்பு சாத்தியமில்லை - கபில் சிபல்

   சனிக்கிழமையன்று ஆம் ஆத்மி கட்சி மாநிலங்களவை உறுப்பினர்கள் பாஜவில் இணைய எடுத்த முடிவைப் பற்றி மூத்த வழக்கறிஞர் கபில் சிபல் கூறுகையில், “இந்த 7 பேருக்கும் பாஜவிற்கும் அரசியலமைப்பு குறித்து அதிக புரிதல் இருப்பதாக எனக்குத் தெரியவில்லை. ஏனெனில் இணைதல் என்பதன் அர்த்தம் என்ன என்பது அவர்களுக்கே தெரிந்திருக்க வாய்ப்பில்லை," என்றார்.

   "அரசியலமைப்பின் படி, முதலில் ஒரு அரசியல் கட்சிதான் தான் வேறொரு கட்சியுடன் இணைய விரும்புகிறதா என்பதைத் தீர்மானிக்க வேண்டும். உதாரணமாக, ஆம் ஆத்மி கட்சி அமைப்பு ரீதியாகக் கூட்டத்தைக் கூட்டி, தீர்மானம் நிறைவேற்றி தான் இணைய விரும்புவதாக முடிவு செய்ய வேண்டும்; அல்லது இரண்டு அரசியல் கட்சிகளும் அமைப்பு ரீதியாகத் தீர்மானம் நிறைவேற்றி தங்களுக்குள் இணைய விரும்புவதாக முடிவு செய்ய வேண்டும்," என்பது சிபல்லின் கூற்று.

   அவர் மேலும் கூறுகையில், "அரசியல் கட்சி இணைந்துவிட்டால், அந்தக் கட்சிக்கு 10 எம்.பி.க்கள் இருந்து, அவர்கள் கட்சியுடன் இணைவதற்கு மூன்றில் இரண்டு பங்கு பெரும்பான்மையுடன் தீர்மானம் நிறைவேற்றினால், அவர்களின் இணைப்பு சாத்தியமாகும். இதற்கு நேர்மாறாக நடக்க முடியாது. கட்சி இணைவதற்கு முன்பு, இந்த எம்.பி.க்கள் வேறொரு கட்சியுடன் இணைய முடியாது," என்றார்.

   வெள்ளிக்கிழமையன்று சந்தீப் பதக் மற்றும் அசோக் மிட்டலுடன் செய்தியாளர் சந்திப்பு நடத்திய ராகவ் சத்தா கூறுகையில், "மாநிலங்களவையில் ஆம் ஆத்மி கட்சியின் மூன்றில் இரண்டு பங்கு உறுப்பினர்களான நாங்கள், அரசியலமைப்பு விதிகளின்படி பாஜவில் இணைய முடிவு செய்துள்ளோம்," எனத் தெரிவித்திருந்தார்.

3. 26 ஏப்ரல் 2026ஹெஸ்பொலா நிலைகள் மீது தாக்குதல் நடத்த உத்தரவிட்ட நெதன்யாகு

   

   பட மூலாதாரம், EPA

   லெபனான் மற்றும் இஸ்ரேல் இடையேயான போர்நிறுத்தம் மேலும் மூன்று வாரங்களுக்கு நீட்டிக்கப்பட்டு இரண்டு நாட்கள் ஆன நிலையில் லெபனானில் உள்ள ஹெஸ்பொலா நிலைகள் மீது பலத்த தாக்குதல் நடத்த இஸ்ரேல் ராணுவத்துக்கு அந்நாட்டின் பிரதமர் பெஞ்சமின் நெதன்யாகு உத்தரவிட்டுள்ளார்.

   சனிக்கிழமை அன்று தெற்கு லெபனானில் நிகழ்ந்த தாக்குதலில் 6 பேர் கொல்லப்பட்டதை தொடர்ந்து இந்த புதிய உத்தரவு வந்துள்ளது.

   இரு தரப்புக்கும் இடையே சமீபத்தில் நடந்த எல்லை கடந்த தாக்குதல்கள் ஏற்கெனவே முறியக்கூடிய நிலையில் இருக்கும் போர்நிறுத்த ஒப்பந்தம் மீது அழுத்தத்தை அதிகரித்துள்ளது.

   கடந்த வியாழக்கிழமை இரு நாடுகளின் பிரதிநிதிகளுக்கும் இடையேயான பேச்சுவார்த்தை வாஷிங்டனில் நடைபெற்ற பிறகு போர்நிறுத்தம் நீட்டிக்கப்பட்டிருந்தது.

   முன்னதாக, சனிக்கிழமை அன்று லெபனானின் நபாடியே மாவட்டத்தில் உள்ள யோமோர் அல்-ஷபீக் நகரில் டிரக் மற்றும் மோட்டார் சைக்கிள் மீது இஸ்ரேல் நடத்திய தாக்குதலில் நான்கு பேர் கொல்லப்பட்டதாக, லெபனான் சுகாதார அமைச்சகம் தெரிவித்துள்ளது என ஏ.எஃப்.பி கூறுகிறது.

   பின்ட் ஜுபைல் மாவட்டத்தில் உள்ள சஃபத் அல்-பட்டிக் நகரில் நிகழ்ந்த மற்றுமொரு தாக்குதலில் 2 பேர் கொல்லப்பட்டதாகவும் 17 பேர் காயமடைந்ததாகவும் சுகாதார அமைச்சகம் தெரிவித்துள்ளது.

   இந்த நிலையில் சனிக்கிழமை அன்று ஆயுதங்கள் ஏந்திய வாகனத்தில் சென்ற மூன்று ஹெஸ்பொலா உறுப்பினர்களை கொன்றதாக இஸ்ரேல் ராணுவம் தெரிவித்துள்ளது. மோட்டார் சைக்கிளில் சென்ற மற்றுமொரு நபரும் கொல்லப்பட்டுள்ளார்.

4. 26 ஏப்ரல் 2026நீலகிரியில் பரவி வரும் காட்டுத்தீ - ஹெலிகாப்டர் கொண்டு அணைக்க முயற்சி

   

   நீலகிரி மாவட்டத்தில் பார்சன்ஸ் வேலி, பைக்காரா ஆகிய இடங்களை ஒட்டிய வனப்பகுதிகளில் காட்டுத்தீ ஏற்பட்டு ஒரு கடந்த சில நாட்களாக எரிந்து வருகிறது.

   இந்த காட்டுத்தீயை கட்டுப்படுத்த முடியாத சூழல் நிலவி வந்த நிலையில் தமிழக வனத்துறையின் கோரிக்கையைத் தொடர்ந்து நேற்று விமானப்படை ஹெலிகாப்டர்கள் தீயை தண்ணீர் ஊற்றி அணைக்கும் பணிக்காக வரவழைக்கப்பட்டன.

   இந்த ஹெலிகாப்டர்கள் மூலம் பார்சன்ஸ் வேலி மற்றும் எமரால்டு அணைகளில் இருந்து தண்ணீர் எடுத்துச் செல்லப்பட்டு காட்டுத்தீ நிலவும் பகுதிகளில் ஊற்றி தீயை அணைக்கும் பணி நடைபெற்று வருகிறது.

   

   இந்திய விமானப்படையின் எம்ஐ-17 வி5 மற்றும் ஏ.எல்.ஹச் ஹெலிகாப்டர்கள் நேற்று முழுவதும் 34 முறை பறந்து, பாதிக்கப்பட்ட பகுதிகளில் கிட்டத்தட்ட 55,000 லிட்டர் தண்ணீரைத் தெளித்தன.

   அதிகாரிகளுடன் நெருங்கிய ஒருங்கிணைப்பில், தீயைக் கட்டுப்படுத்தும் பணிகள் மேற்கொள்ளப்பட்டு வருவதாக இந்திய விமான படை தெரிவித்துள்ளது.

   தொடர்ந்து எரிந்து வரும் காட்டுத்தீ காரணமாக சுமார் 2000 ஏக்கருக்கு மேல் காட்டுப்பகுதி எரிந்து சேதமடைந்துள்ளதாக வனத்துறை தெரிவித்துள்ளது.

5. 26 ஏப்ரல் 2026பிரபல புகைப்பட கலைஞர் ரகு ராய் மரணம்

   

   பட மூலாதாரம், Getty Images

   83 வயதான பிரபல புகைப்படக் கலைஞர் ரகு ராய் மரணமடைந்த செய்தி அவருடைய அதிகாரப்பூர்வ இன்ஸ்டாகிராம் பக்கம் மூலம் அறிவிக்கப்பட்டுள்ளது. அவரின் இறுதிச் சடங்குகள் இன்று மாலை 4 மணிக்கு டெல்லியில் உள்ள லோதி சாலையில் நடைபெற இருக்கின்றன.

   தற்போது பாகிஸ்தானில் உள்ள பஞ்சாபின் ஜங் பகுதியில் 1942-ஆம் ஆண்டு ரகு ராய் பிறந்தார். 1965-இல் தி ஸ்டேட்ஸ்மேன் நாளிதழில் புகைப்படக் கலைஞராகப் பணியாற்றினார். அதன் பின்னர் 1982-இல் இந்தியா டுடே இதழில் 10 ஆண்டுகள் புகைப்பட ஆசிரியராகப் பணியாற்றினார்.

   இவரின் புகைப்படங்கள் பற்றி பல்வேறு புத்தகங்கள் வெளியிடப்பட்டுள்ளன. பல தேசிய மற்றும் சர்வதேச அளவிலான விருதுகளைப் பெற்றுள்ளார். இந்திய அரசு இவருக்கு பத்மஶ்ரீ விருது வழங்கி கௌரவித்துள்ளது.

   புகழ்பெற்ற மேக்னம் போட்டோஸ் நிறுவனத்திற்காக தேர்வு செய்யப்பட்ட முதல் இந்திய புகைப்படக் கலைஞர் இவர் தான்.

6. 26 ஏப்ரல் 2026வணக்கம் நேயர்களே!

   நேரலைப் பக்கத்தில் இன்று (26-04-2026) பிற்பகல் வரையிலும் சமீபத்திய நிகழ்வுகள் பற்றிய தகவல்களை சுருக்கமாக தருவது மோகன்.

7. 25 ஏப்ரல் 2026பாகிஸ்தான் செல்ல இருந்த விட்காஃப், குஷ்னர் பயணத்தை ரத்து செய்த டிரம்ப்

   

   பட மூலாதாரம், EPA/Shutterstock

   அமெரிக்கத் தூதர்களான ஸ்டீவ் விட்காஃப் மற்றும் ஜாரெட் குஷ்னர் ஆகியோரின் பாகிஸ்தான் பயணத்தை டிரம்ப் ரத்து செய்துள்ளார் என அமெரிக்க ஊடகங்கள் தெரிவித்துள்ளன.

   முன்னதாக, இரானுடன் பேச்சுவார்த்தை நடத்த அவர்கள் பாகிஸ்தான் செல்ல உள்ளதாக அமெரிக்கா அறிவித்திருந்தது. ஆனால் பேச்சுவார்த்தைகள் முன்னேற்றமில்லாததால், இந்த பயணம் தேவையற்றதாக கருதப்பட்டு ரத்து செய்யப்பட்டதாக கூறப்படுகிறது.

   “எங்களிடம் எல்லா வாய்ப்புகளும் இருக்கின்றன. அவர்கள் விரும்பும் எந்த நேரத்திலும் எங்களை தொடர்பு கொள்ளலாம். ஆனால், பயனற்ற பேச்சுகளுக்காக 18 மணி நேரம் பயணம் செய்து அங்கே உட்கார்ந்து இருக்கப் போவதில்லை,” என டிரம்ப் பாக்ஸ் நியூசிடம் கூறியுள்ளார்

8. 25 ஏப்ரல் 2026அமெரிக்க முற்றுகை தொடர்ந்தால் பதிலடி தரப்படும் - இரான்

   

   பட மூலாதாரம், Getty Images

   ஹோர்மூஸ் நீரிணையை அமெரிக்கா தொடர்ந்து முற்றுகையிட்டால், பதிலடி கொடுக்கப்படும் என இரான் ராணுவம் எச்சரித்துள்ளது..

   ராணுவத்தின் கட்டளை மையத்தால் வெளியிடப்பட்ட இந்த அறிக்கை, இஸ்லாமியப் புரட்சிகரப் காவல் படையுடன் தொடர்புடைய தஸ்னிம் செய்தி நிறுவனம் உட்பட பல இரானிய அரசு ஊடகங்களால் பகிரப்பட்டது.

   அமெரிக்க ராணுவத்தின் முற்றுகையை சட்டவிரோதச் செயல் என கூறியுள்ள இரான், இது தொடர்ந்தால், இரானிய ராணுவத்திடமிருந்து பதிலடியை எதிர்கொள்ள நேரிடும் கூறியுள்ளது.

9. 25 ஏப்ரல் 2026போருக்குப் பிறகு முதல் முறையாக தெஹ்ரான் விமான நிலையம் மீண்டும் திறப்பு

   

   பட மூலாதாரம், Reuters

   இரானின் தலைநகரான தெஹ்ரானில் உள்ள இமாம் கொமேனி சர்வதேச விமான நிலையத்திலிருந்து சனிக்கிழமை காலை சர்வதேச விமான சேவைகள் மீண்டும் தொடங்கின.

   இரானிய ஊடகங்களின்படி, இந்த விமான நிலையத்திலிருந்து சவூதி அரேபியாவின் மதீனா, ஓமனின் மஸ்கட் மற்றும் துருக்கியின் இஸ்தான்புல் உள்ளிட்ட மத்திய கிழக்கின் பல நகரங்களுக்கு விமான சேவைகள் தொடங்கப்பட்டுள்ளன.

   பிப்ரவரி 28 அன்று அமெரிக்கா மற்றும் இஸ்ரேலுடனான போர் தொடங்கியதிலிருந்து இரானிய வான்வெளி பெருமளவில் மூடப்பட்டுள்ளது, மேலும் பயணிகள் விமானப் போக்குவரத்து கிட்டத்தட்ட இரண்டு மாதங்களுக்கு இடைநிறுத்தப்பட்டது.

10. 25 ஏப்ரல் 2026பாகிஸ்தானில் ஆசிம் முனீரை சந்தித்த இரான் வெளியுறவு அமைச்சர்

    

    பட மூலாதாரம், Iranian Ministry of Foreign Affairs

    பாகிஸ்தான் வந்த இரான் வெளியுறவு அமைச்சர் அப்பாஸ் அராக்சி அந்நாட்டு ராணுவ தலைவர் தளபதி ஆசிம் முனீரை சந்தித்தார்.

    அமெரிக்காவுக்கும் இரானுக்கும் இடையே நேரடி சந்திப்புக்கான திட்டம் ஏதுமில்லை என்று இரான் அதிகாரி ஒருவர் தெரிவித்தார்.

    பாகிஸ்தானில் நடைபெறும் சந்திப்புகளுக்குப் பிறகு, ஓமன் மற்றும் ரஷ்யாவிற்குச் செல்வதாக அப்பாஸ் அராக்சி கூறியுள்ளார்.

    இரான் தொடர்பான பேச்சுவார்த்தைகளுக்காக அமெரிக்க அதிகாரிகள் சனிக்கிழமை பாகிஸ்தான் செல்வதாக வெள்ளை மாளிகை தெரிவித்துள்ளது.

11. 25 ஏப்ரல் 2026‘விஜய் பேச்சால் அடம் பிடிக்கும் குழந்தை’- விசிக நிர்வாகி புகார்

    

    கோவை மாநகர காவல் ஆணையர் அலுவலகத்தில் விடுதலை சிறுத்தைகள் கட்சியின் நிர்வாகி பாலகிருஷ்ணன் என்பவர் தமிழக வெற்றி கழகத்தின் தலைவர் விஜயின் மீது புகார் ஒன்றை அளித்துள்ளார்.

    ‘பிஞ்சு குழந்தைகளின் மனநிலையை தேர்தல் ஆதாயத்திற்காக விஜய் தவறாகப் பயன்படுத்துகிறார்’ என அவர் தனது புகாரில் குறிப்பிட்டுள்ளார்.

    கோவை கணபதி பகுதியைச் சேர்ந்த விசிக நிர்வாகி பாலகிருஷ்ணன் மாநகர காவல் ஆணையாளரிடம் அளித்துள்ள புகாரில், “கடந்த ஏப்ரல் 21ஆம் தேதியன்று சென்னையில் நடைபெற்ற இறுதிக்கட்ட பரப்புரைக் கூட்டத்தில் பேசிய த.வெ.க. தலைவர் விஜய் ‘குழந்தைகள் சாக்லேட் கேட்டு அடம்பிடிப்பது போல, பெற்றோரிடம் அடம்பிடித்து தனக்கு வாக்களிக்கச் சொல்ல வேண்டும்’ என வேண்டுகோள் விடுத்தார்.”

    “அரசியல் முதிர்ச்சியற்ற இத்தகைய தூண்டுதல், பிஞ்சு குழந்தைகளின் மனநிலையை தேர்தல் ஆதாயத்திற்காக தவறாக பயன்படுத்துவதாகும். இதனால் எனது 5 வயது மகன் விஜய்க்கு வாக்களிக்குமாறு என்னிடம் அடம்பிடித்தான். அதற்கு நான் மறுப்பு தெரிவித்தபோது, மன உளைச்சலுக்கு ஆளாகி அழுதும், உணவைத் தவிர்த்தும் த.வெ.க-விற்கு ஓட்டு போடுமாறு பிடிவாதம் பிடித்தான்” எனக் குறிப்பிட்டுள்ளார்.

    மேலும், “இதனால் அக்கட்சிக்கு தான் ஓட்டு போட்டதாக பொய் சொல்ல வேண்டிய நிர்பந்தம் ஏற்பட்டதால், எனக்கு மிகுந்த மன வேதனை ஏற்பட்டது. ‘விஜய் மாமா ஜெயிக்கவில்லை என்றால் நான் சாப்பிட மாட்டேன்’ என எனது மகன் தொடர்ந்து அழுது வருகிறான்.” என்றும் அவர் தனது புகாரில் கூறியுள்ளார்.

    “தேர்தல் விதிமுறைகளை மீறியுள்ள விஜயின் செயலால், பல குழந்தைகள் உளவியல் சிக்கல்களை சந்திக்கின்றனர். இது தொடர்பாக த.வெ.க. தலைவர் விஜய் மீது நடவடிக்கை எடுப்பதோடு, அவர் பேசிய வீடியோ காட்சிகளை சமூக வலைதளங்களில் இருந்து நீக்க வேண்டும்” என்று பாலகிருஷ்ணன் தனது புகாரில் கூறியுள்ளார்.

    ‘இது தொடர்பாக தேர்தல் ஆணையத்திற்கும் புகார் அனுப்பியுள்ளேன். நடவடிக்கை எடுக்கவில்லை எனில், நீதிமன்றத்தை நாடுவேன்’ என்றும் அவர் கூறியுள்ளார்.

12. 25 ஏப்ரல் 2026தேனியில் பட்டாசு ஆலையில் வெடிவிபத்து: 2 பேர் மரணம்

    

    தேனி மாவட்டத்தில் பட்டாசு ஆலையில் ஏற்பட்ட வெடி விபத்தில் 2 பேர் உயிரிழந்துள்ளனர்.

    தேனி மாவட்டம், கம்பம் நகர காவல்துறையினர் அளித்த தகவலின்படி, காட்டுப்பள்ளிவாசல் சாலையில் திருப்பதி என்பவருக்கு சொந்தமான லட்சுமி பட்டாசு தொழிற்சாலை உள்ளது. இன்று காலை வழக்கம் போல் பட்டாசு ஆலையில் பணிபுரிவதற்காக அய்யப்பன், நாகர்ஜுன், சூர்யா, தினேஷ் என்ற தீனா ஆகிய நான்கு பேர் வந்துள்ளனர்.

    தேர்தல் விடுமுறை காரணமாக இரண்டு நாட்கள் பணிக்கு யாரும் வராமல் தொழிற்சாலை மூடிய நிலையில் இருந்துள்ளது. இரண்டு நாட்களுக்குப் பிறகு பட்டாசு தயாரிக்கும் பணியில் ஈடுபட வந்த தினேஷும் சூர்யாவும் அடைத்து வைக்கப்பட்டிருந்த மூலப்பொருட்கள் உள்ள அறையை திறந்துள்ளனர்.

    அப்போது எதிர்பாராத விதமாக அந்த அறையில் கடும் சத்தத்துடன் வெடி விபத்து ஏற்பட்டதால் சூர்யாவும் தினேஷும் சம்பவ இடத்திலேயே உயிரிழந்தனர். வெடிச் சத்தம் கேட்டு ஆலையில் இருந்த மற்ற இரு ஊழியர்களும் வெளியில் ஓடி வந்துள்ளனர்.

    இதுகுறித்து காவல்துறையினருக்கு தகவல் தெரிவிக்கப்பட்டது. சம்பவ இடத்துக்கு வந்த போலீசார், இறந்தவர்களின் உடல்களை பிரேத பரிசோதனைக்காக தேனி அரசு மருத்துவமனைக்கு அனுப்பி வைத்துள்ளனர். தொடர்ந்து சம்பவ இடத்துக்கு வந்த தீயணைப்பு துறையினர் அப்பகுதியில் எரிந்து கொண்டிருந்த தீயை அணைத்தனர். வெடி விபத்து தொடர்பாக வழக்கு பதிவு செய்த காவல்துறையினர், தீவிர விசாரணை மேற்கொண்டு வருகின்றனர்.

13. 25 ஏப்ரல் 2026இரானியக் கொடி ஏந்திய கப்பலை தடுத்து நிறுத்திய அமெரிக்காவின் போர்க்கப்பல்

    

    பட மூலாதாரம், X/CENTCOM

    இரானியத் துறைமுகத்தை நோக்கிச் சென்ற இரானியக் கொடி ஏந்திய கப்பலை, அமெரிக்காவின் போர்க்கப்பல் ஒன்று தடுத்து நிறுத்தியுள்ளதாக அமெரிக்க மத்திய கட்டளைத் தலைமையகம் (CENTCOM) தெரிவித்துள்ளது.

    "ஏப்ரல் 24 வெள்ளிக்கிழமையன்று, இரானியத் துறைமுகத்தை நோக்கிச் சென்று கொண்டிருந்த இரானியக் கொடி ஏந்திய கப்பலை, யுஎஸ்எஸ் ரஃபேல் பெரால்டா (USS Rafael Peralta) என்ற போர்க் கப்பல் இடைமறித்தது," என்று சென்ட்காம் தனது எக்ஸ் பக்கத்தில் வெளியிட்டுள்ள அறிக்கையில் தெரிவித்துள்ளது.

    இந்த அறிக்கையுடன் ஒரு புகைப்படத்தையும் சென்ட்காம் பகிர்ந்துள்ளது.

    முன்னதாக வெள்ளிக்கிழமை வெளியான மற்றொரு அறிக்கையில், அமெரிக்கக் கடற்படை முற்றுகையின் போது இதுவரை 34 கப்பல்களைத் திசைதிருப்பியுள்ளதாக சென்ட்காம் குறிப்பிட்டிருந்தது.

    இரான் மற்றும் அமெரிக்காவிற்கு இடையிலான முதற்கட்ட பேச்சுவார்த்தைகள் தீர்வுகள் காணப்படாமல் முடிவடைந்ததைத் தொடர்ந்து, இரானியத் துறைமுகங்களை முற்றுகையிடுவதாக அமெரிக்க அதிபர் டொனால்ட் டிரம்ப் அறிவித்திருந்தார்.

    இந்த முற்றுகைக்கு கடும் கண்டனம் தெரிவித்துள்ள இரான், இது போர்நிறுத்த ஒப்பந்தத்தை மீறும் செயல் என்று கூறியது. அதனைத் தொடர்ந்து ஹோர்மூஸ் நீரிணையை மீண்டும் மூட இரான் முடிவு செய்தது.

14. 25 ஏப்ரல் 2026"ஊர் பெயரில் சாதி": பிபிசி செய்தியை சுட்டிக்காட்டி மாநில ஆதிதிராவிடர் ஆணையம் நோட்டீஸ்

    

    விருதுநகர் மாவட்டம் ஸ்ரீவில்லிபுத்தூரில் உள்ள ஒரு ஊராட்சி அச்சந்தவிழ்த்தான், அதற்கு உட்பட்ட ஒரு சிறிய குக்கிராமம்தான் 'வடக்கு அச்சந்தவிழ்த்தான்'. இங்கு சுமார் 60க்கும் மேற்பட்ட தலித் குடும்பங்கள் வசித்து வருகின்றன.

    ஆனால், பல அரசு ஆவணங்களில் இந்த கிராமத்தின் பெயர் 'பரச்சேரி' என்று பதிவாகியுள்ளது. அது மட்டுமல்லாது, சுற்றியுள்ள பிற கிராம மக்கள் கூட 'பரச்சேரி' என்ற பெயரில் தான் இந்த குக்கிராமத்தை அழைக்கிறார்கள்.

    சாதிய அடையாளத்துடன் கூடிய ஊர் பெயர் காரணமாக தாங்கள் பெரும் மன உளைச்சலையும் அவமானங்களையும் எதிர்கொள்வதாகவும், இது குறித்து அரசு அதிகாரிகளிடம் பல முறை கோரிக்கை வைத்தும் அதிகாரபூர்வமாக தங்களது ஊரின் பெயரை 'வடக்கு அச்சந்தவிழ்த்தான்' என மாற்றவில்லை என்பதால் தமிழ்நாடு சட்டப்பேரவைத் தேர்தலை புறக்கணிப்பதாகவும் இந்த கிராம மக்கள் அறிவித்தனர்.

    இதைத் தொடர்ந்து பிபிசி தமிழ் குழு, இந்தக் கிராமத்திற்கு சென்று கள ஆய்வு மேற்கொண்டது. அதைத் தொடர்ந்து காணொளி மற்றும் கட்டுரையையும் பிபிசி வெளியிட்டது.

    இந்தக் கிராமத்தில் 113 வாக்காளர்கள் உள்ளனர். இதற்கிடையே சட்டப்பேரவைத் தேர்தலில் வாக்களிப்பது தொடர்பாக அரசு அதிகாரிகள் இந்த கிராமத்தினரைச் சந்தித்து பேச்சுவார்த்தைகள் நடத்தி வந்தனர்.

    “தேர்தல் முடிந்து நிச்சயம் பெயர் மாற்றம் அறிவிக்கப்படும் என அதிகாரிகள் உறுதி அளித்தார்கள். அதை நம்பி ஏப்ரல் 23 அன்று இந்தக் கிராமத்தைச் சிலர் வாக்களித்துள்ளார்கள்” என கிராம மக்கள் தெரிவித்தனர்.

    

    இந்நிலையில், பிபிசி வெளியிட்ட காணொளியின் எதிரொலியாக, 'வடக்கு அச்சந்தவிழ்த்தான்' கிராமம் 'பரச்சேரி' என்று பதிவாகி இருப்பதை நீக்காதது குறித்து மாவட்டத் தேர்தல் நடத்தும் அலுவலருக்கு (மாவட்ட ஆட்சியர்) தமிழ்நாடு ஆதிதிராவிடர் மற்றும் பழங்குடியினர் ஆணையம் விளக்கம் கேட்டு நேற்று (ஏப்ரல் 24) கடிதம் அனுப்பியுள்ளது. ஒரு வார காலத்திற்குள் விளக்கம் அளிக்கப்பட வேண்டும் என்றும் அதில் தெரிவிக்கப்பட்டுள்ளது.

    முன்னதாக கிராம மக்களின் கோரிக்கை தொடர்பாக பிபிசி தமிழிடம் பேசியிருந்த விருதுநகர் மாவட்ட ஆட்சியர் என்.ஓ.சுகபுத்ரா, "அச்சந்தவிழ்த்தான் வருவாய் கிராமத்தில் உள்ள குக்கிராம மக்களின் கோரிக்கையை மாவட்ட நிர்வாகம் தீவிரமாகக் கவனித்து வருகிறது. அப்பகுதிக்கு மறுபெயரிடுவதற்கான முறையான முன்மொழிவு ஏற்கனவே உள்ளாட்சித் துறைக்கு அனுப்பப்பட்டுள்ளது. இந்தப் பிரச்னை விரைவில் தீர்க்கப்படும்" என்று தெரிவித்திருந்தார்.

15. 25 ஏப்ரல் 2026பாகிஸ்தான் சென்ற இரானிய வெளியுறவு அமைச்சர் அப்பாஸ் அராக்சி

    

    பட மூலாதாரம், Iranian Ministry of Foreign Affairs/Anadolu via Getty

    இரானிய வெளியுறவு அமைச்சர் அப்பாஸ் அராக்சி ஒரு தூதுக்குழுவுடன் இஸ்லாமாபாத் வந்தடைந்துள்ளார். அவரது வருகை குறித்து பாகிஸ்தான் வெளியுறவு அமைச்சகம் அறிக்கை ஒன்றை வெளியிட்டுள்ளது.

    ஆனால், இரானுக்கும் அமெரிக்காவுக்கும் இடையிலான சந்திப்பு குறித்து பாகிஸ்தான் வெளியுறவு அமைச்சகத்தின் அறிக்கையில் எந்தக் குறிப்பும் இல்லை.

    முன்னதாக, “அராக்சியின் இஸ்லாமாபாத் பயணத்தில் இரான் மற்றும் அமெரிக்கா இடையே எந்த சந்திப்பும் திட்டமிடப்படவில்லை" என்று இரானின் வெளியுறவு அமைச்சகம் ஒரு அறிக்கையில் தெரிவித்திருந்தது.

    இருப்பினும், இரானிய வெளியுறவு அமைச்சக செய்தித் தொடர்பாளர் 'இரானின் கருத்துகள் பாகிஸ்தானிடம் தெரிவிக்கப்படும்' என்று கூறினார்.

    "வெளியுறவு அமைச்சர் அப்பாஸ் அராக்சி தலைமையிலான இரானிய தூதுக்குழு இன்று (ஏப்ரல் 25) இஸ்லாமாபாத் வந்தடைந்தது. அவரை பாகிஸ்தான் துணைப் பிரதமரும் வெளியுறவு அமைச்சருமான முகமது இஷாக் தார், ஃபீல்டு மார்ஷல் அசிம் முனீர் மற்றும் பிற மூத்த அதிகாரிகள் வரவேற்றனர்" என்று பாகிஸ்தான் வெளியுறவு அமைச்சகம் தெரிவித்துள்ளது.

    அந்த அறிக்கையில், "இந்தப் பயணத்தில், இரானிய வெளியுறவு அமைச்சர் பாகிஸ்தானின் உயர்மட்டத் தலைவர்களுடன் சந்திப்புகளை நடத்துவார். இந்தச் சந்திப்புகளில் பிராந்தியத்தின் சமீபத்திய முன்னேற்றங்கள் மற்றும் பிராந்திய அமைதி மற்றும் ஸ்திரத்தன்மைக்கான தற்போதைய முயற்சிகள் குறித்து விவாதிக்கப்படும்" என்று தெரிவிக்கப்பட்டுள்ளது.

16. 25 ஏப்ரல் 2026‘இரானில் அதிகாரத்தில் இருப்பவர்களுடன் பேசி வருகிறேன்’- அமெரிக்க அதிபர் டிரம்ப்

    

    பட மூலாதாரம், Getty Images

    அமெரிக்க அதிபர் டொனால்ட் டிரம்ப், ராய்ட்டர்ஸ் செய்தி முகமையிடம் பேசுகையில், 'இரான் ஒரு சலுகையை முன்வைக்கிறது, அதைப் பொறுத்திருந்து பார்க்க வேண்டும்' என்று கூறினார்.

    இருப்பினும், அந்த சலுகை என்னவென்று தனக்கு இன்னும் தெரியவில்லை என்று அவர் கூறுகிறார்.

    தொலைபேசி உரையாடலின் போது, அமெரிக்கா யாருடன் பேச்சுவார்த்தை நடத்துகிறது என்று டிரம்பிடம் கேட்கப்பட்டபோது, அவர் தெளிவான தகவலை அளிக்கவில்லை.

    ஆனால், "தற்போது அதிகாரத்தில் இருப்பவர்களுடன் நான் பேசி வருகிறேன்" என்று அவர் கூறினார்.

    அடுத்த வாரம் பிரிட்டனின் மன்னர் சார்லஸ் அமெரிக்காவிற்கு வரும்போது, அவருடன் இரான் குறித்து விவாதிக்கப்போவதாகவும் அவர் தெரிவித்தார்.

    முன்னதாக, அமெரிக்க சிறப்பு தூதர்கள் ஸ்டீவ் விட்காஃப் மற்றும் ஜாரெட் குஷ்னர் ஆகியோர் இரானுடன் பேச்சுவார்த்தை நடத்துவதற்காக பாகிஸ்தான் செல்வார்கள் என்பதை வெள்ளை மாளிகை உறுதிப்படுத்தியது.

    இதற்கிடையில், வெளியுறவு அமைச்சர் அப்பாஸ் அராக்சி இஸ்லாமாபாத் செல்வார் என்பதை இரானிய அரசாங்கமும் உறுதிப்படுத்தியது. இருப்பினும், இந்த பயணம் அமெரிக்காவுடனான பேச்சுவார்த்தைக்காகவா என்பது குறித்த விவரங்களை அந்த அறிக்கை குறிப்பிடவில்லை.

17. 25 ஏப்ரல் 2026வணக்கம் நேயர்களே!

    நேரலைப் பக்கத்தில் இன்று (25-04-2026) பிற்பகல் வரையிலும் சமீபத்திய நிகழ்வுகள் பற்றிய தகவல்களை சுருக்கமாக தருவது சிராஜ்.

18. 24 ஏப்ரல் 2026இரான் போரை முடிவுக்குக் கொண்டுவர இதுவே சரியான தருணம் - அமெரிக்க பாதுகாப்பு செயலாளர்

    

    பட மூலாதாரம், Reuters

    இரான் "நல்ல மற்றும் புத்திசாலித்தனமான ஒப்பந்தத்தைச் செய்துகொள்ள" இது ஒரு வாய்ப்பு என்று அமெரிக்க பாதுகாப்புத் துறை செயலாளர் பீட் ஹெக்செத் கூறியுள்ளார்.

    மேலும், இரானியத் துறைமுகங்கள் மீதான அமெரிக்கக் கடற்படை முற்றுகை "வளர்ந்து வருகிறது மற்றும் உலகளாவிய அளவில் விரிவடைந்து வருகிறது" என்றும் அவர் தெரிவித்தார்.

    டொனால்ட் டிரம்பின் கருத்துகளைப் பிரதிபலிக்கும் வகையில் பேசிய ஹெக்செத், ஒப்பந்தம் செய்துகொள்வதற்கு அமெரிக்கா "எந்த அவசரத்திலும் இல்லை" என்றும், "இனி பந்து இரான் பக்கம் தான் இருக்கிறது" என்றும் அவர் குறிப்பிட்டார்.

    அமெரிக்கா மற்றும் இரான் இடையிலான அமைதிப் பேச்சுவார்த்தையின் அடுத்தகட்ட நிலை குறித்த தெளிவற்ற சூழலே தற்போதும் நீடிக்கிறது. இருப்பினும், இரானின் வெளியுறவுத்துறை அமைச்சர் இன்று இரவு இஸ்லாமாபாத் செல்ல உள்ளார்.

19. 24 ஏப்ரல் 2026பாஜகவில் இணைந்த 3 ஆம் ஆத்மி எம்.பி.க்கள் - இன்னும் 4 பேர் சேர உள்ளார்களா?

    

    பட மூலாதாரம், Kabir Jhangiani/NurPhoto via Getty Images

    மாநிலங்களவை எம்.பி. ராகவ் சட்டா, ஆம் ஆத்மி கட்சியிலிருந்து விலகி பாஜகவில் இணைந்துள்ளார்.

    சந்தீப் பதக் மற்றும் அசோக் மிட்டல் ஆகியோருடன் வெள்ளிக்கிழமை அன்று செய்தியாளர் சந்திப்பில் பேசிய ராகவ் சட்டா, "மாநிலங்களவையில் உள்ள ஆம் ஆத்மி கட்சி உறுப்பினர்களில் மூன்றில் இரண்டு பங்கான நாங்கள், அரசியலமைப்புச் சட்டத்தின் விதிகளுக்கு இணங்க பாஜகவில் இணைய முடிவு செய்துள்ளோம்" என்று கூறினார்.

    "மாநிலங்களவையில் ஆம் ஆத்மி கட்சியின் 10 நாடாளுமன்ற உறுப்பினர்கள் உள்ளனர். அவர்களில் மூன்றில் இரண்டு பங்கிற்கும் அதிகமானோர் எங்களுடன் இருக்கிறார்கள். அவர்கள் கையெழுத்திட்டுள்ளனர்; இன்று காலை அந்த கையெழுத்திடப்பட்ட கடிதம் மற்றும் ஆவணங்களை மாநிலங்களவைத் தலைவரிடம் சமர்ப்பித்தோம். அவர்களில் மூவர் இதோ உங்கள் முன்னிலையில் இங்கு இருக்கிறோம். எங்களைத் தவிர, ஹர்பஜன் சிங், ராஜீந்தர் குப்தா, விக்ரம்ஜீத் சிங் சாஹ்னி மற்றும் சுவாதி மாலிவால் ஆகியோரும் இதில் அடங்குவர்," என்று தெரிவித்தார் ராகவ் சட்டா.

    ஆம் ஆத்மி கட்சி பாரதிய ஜனதா கட்சியை விமர்சித்ததோடு, இதனை 'ஆபரேஷன் லோட்டஸ்' என்றும் குறிப்பிட்டது.

    அதே சமயம், ஆம் ஆத்மி கட்சியின் ஒருங்கிணைப்பாளர் அரவிந்த் கெஜ்ரிவால், ராகவ் சட்டாவின் பெயரைக் குறிப்பிடாமல், இது குறித்து எக்ஸ் தளத்தில், "பாஜக மீண்டும் பஞ்சாபிகளுக்குத் துரோகம் செய்துவிட்டது," என எழுதியுள்ளார்.

20. 24 ஏப்ரல் 2026இரான் வெளியுறவு அமைச்சர் இன்று இரவு இஸ்லாமாபாத் வருவார் என எதிர்பார்க்கப்படுகிறது.

    

    பட மூலாதாரம், Getty Images

    இரானிய பேச்சுவார்த்தைக் குழு ஒன்று இன்று இரவு இஸ்லாமாபாத்தை வந்தடையும் என பாகிஸ்தான் மற்றும் இரானிய வட்டாரங்கள் உறுதிப்படுத்தியுள்ளன.

    பிபிசி உருதுவின்படி , இரானிய குழுவின் வருகை குறித்து தங்களுக்குத் தகவல் தெரிவிக்கப்பட்டதாகவும், இஸ்லாமாபாத்தில் ஏற்கனவே பலத்த பாதுகாப்பு ஏற்பாடுகள் செய்யப்பட்டிருந்ததாகவும் அரசாங்க வட்டாரங்கள் உறுதிப்படுத்தின.

    இரான் வெளியுறவு அமைச்சர் அப்பாஸ் அராக்சி தலைமையில் இரானிய குழு வர உள்ளதாக பாகிஸ்தான் வட்டாரம் ஒன்று தெரிவித்தது.

    அதிகாரிகளின் கூற்றுப்படி, பேச்சுவார்த்தை செயல்முறைக்காக அமெரிக்கப் பாதுகாப்புக் குழு ஒன்று ஏற்கனவே இஸ்லாமாபாத்தில் உள்ளது.