‘అల్లావుద్దీన్ అద్భుత దీపం’.. రూ.30 లక్షలకు అంటగట్టి డాక్టరుకు బురిడీ

సిరి సంపదలనిచ్చే అల్లావుద్దీన్ అద్భుత దీపాన్ని అమ్ముతామంటూ బేరం పెట్టి ఒక డాక్టర్‌ను మోసం చేసిన ఇద్దరు వ్యక్తులను ఉత్తర్‌ప్రదేశ్‌ పోలీసులు అదుపులోకి తీసుకున్నారు.

ఈ దీపంలో ఎన్నో మహత్తులున్నాయంటూ వారు ఆ డాక్టర్‌కు నమ్మబలికారు. ఆ దీపం ఇంట్లో ఇంట్లో ఉంటే సిరిసంపదలు, ఆయురారోగ్యాలు వస్తాయని నమ్మించారు.

మొదట ఈ దీపం ధర ఒక కోటి 50 లక్షల రూపాయలని డాక్టర్‌కు చెప్పారు. బేరమాడగా చివరకు సుమారు 30 లక్షల రూపాయాల ధరకు ఇచ్చేందుకు నిందితులు అంగీకరించారు.

ఈ మోసం వెనక ఓ మహిళ కూడా ఉందని, ఆమె పరారీలో ఉందని పోలీసులు చెబుతున్నారు.

తాను మోసపోయినట్లు మీరట్‌ పోలీస్‌స్టేషన్‌లో సదరు డాక్టర్‌ ఫిర్యాదు చేశారు.

మోసం ఎలా మొదలైంది ?

నెల రోజులుగా ఇద్దరు వ్యక్తులు ఒక మహిళను చికిత్స కోసం తన వద్దకు తీసుకువచ్చారని, ఆమెను వారి తల్లిగా భావించానని డాక్టర్‌ చెప్పారు.

“ క్రమంగా వారు నాకు బాబా మహత్తు గురించి చెప్పడం ప్రారంభించారు. ఆ బాబా గృహాన్ని తాము సందర్శించినట్లు వారు చెప్పారు. మీరు కూడా బాబాను కలవండి అంటూ నాకు చెప్పడం మొదలు పెట్టారు’’ అని ఆ డాక్టర్‌ పేర్కొన్నట్లు ఎన్డీటీవీ కథనం వెల్లడించింది.

వారు చెప్పినట్లే ఆ డాక్టర్ మాంత్రికుడైన బాబాను కలిశారు.

ఒకసారి బాబాను కలుసుకోవడానికి వెళ్లినప్పుడు తనకు అల్లావుద్దీన్‌ ప్రత్యక్షమయ్యేలా చేస్తామని చెప్పారని, నిజానికి ఓ వ్యక్తికి అల్లావుద్దీన్ వేషం వేసి తనను మోసం చేశారని ఆ డాక్టర్‌ చెప్పినట్లు ఎన్డీటీవీ కథనం తెలిపింది.

ఆ దీపంలోని భూతం తమపై ప్రభావం చూపిస్తున్నట్లు కూడా వారు ఆ డాక్టర్‌కు చెప్పి, ఆయన్ను నమ్మించేందుకు ప్రయత్నించినట్లు పలు మీడియా కథనాలు పేర్కొన్నాయి.

మొదట రూ.కోటీ యాభై లక్షల ధర చెప్పిన నిందితులు చివరకు దాన్ని సుమారు రూ. 30లక్షలు ఇవ్వడానికి సిద్ధపడ్డారు.

ఈ నిందితులు మరికొందరిని కూడా ఇదే తరహాలో మోసం చేయడానికి ప్రయత్నించారని మీరట్‌కు చెందిన ఓ సీనియర్‌ పోలీస్‌ అధికారి ఎన్డీటీవీకి వెల్లడించారు.

ఈ కేసులో ఇప్పటి వరకు ఇద్దరిని అరెస్టు చేయగా, ఓ మహిళ పరారీలో ఉంది.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)