Y Rheol Euraidd

Mae un o'r prif ddysgeidiaethau Cristnogol am foesoldeb a sut i drin pobl eraill yn dod o ddysgeidiaeth Iesu o'r Rheol Euraidd.

Mae'r Rheol Euraidd yn dweud wrth Gristnogion am drin pobl eraill fel bydden nhw'n hoffi cael eu trin eu hunain.

Bywyd ar ôl marwolaeth

Dysgodd Iesu ei ddilynwyr y bydd pobl sy'n byw bywydau da ac yn dilyn ei ddysgeidiaeth yn cael eu gwobrwyo â bywyd tragwyddol yn nheyrnas Duw. Dysgodd Iesu hefyd y bydd pobl sy'n cyflawni pechodau ac yn cefnu ar Dduw yn cael eu cosbi'n dragwyddol yn Uffern. Mae Iesu hefyd yn dysgu nad yw'r llwybr i dragwyddoldeb gyda Duw yn un hawdd. Mae'r llwybr i Uffern, ar y llaw arall, yn un haws ac felly mae llawer iawn mwy o bobl yn dilyn y ffordd hon.

Dysgodd Iesu y dylai pobl fyw eu bywydau mewn ffordd foesol, nid dim ond i gael bywyd tragwyddol gyda Duw, ond oherwydd dylai bodau dynol geisio gwneud gweithredoedd da er mwyn cael boddhad a helpu pobl eraill.

Mae Cristnogion yn credu bydd Iesu yn barnu ymddygiad pobl ac y byddant yn cael eu cosbi, nid yn unig am bechu, ond hefyd am beidio â gwneud pethau da.

Dameg y Defaid a'r Geifr

Yn llawer o ddamhegion Iesu, gan gynnwys Dameg y Defaid a'r Geifr, mae Iesu yn dysgu am yr hyn fydd yn digwydd ar ddiwedd amser. Bydd pob unigolyn o'r dynol ryw yn cael eu barnu ar y ffordd maen nhw wedi byw ac wedi ymddwyn. Mae Dameg y Defaid a'r Geifr yn rhoi darlun o sut bydd bodau dynol yn cael eu rhannu ar ddiwedd amser adeg Dydd y Farn.

Mae damhegion Iesu ar fywyd a marwolaeth yn egluro'r canlynol:

• mae pob unigolyn yn gyfrifol am ble mae'n diweddu ar ôl marw
• mae pob unigolyn yn gyfrifol am sut mae'n byw ei fywyd
• bydd y ffordd mae unigolion yn dilyn ewyllys Duw, yn pennu lle byddan nhw'n treulio tragwyddoldeb