Mae’r DU wedi gweld sawl ton o fudo, er enghraifft:

• 1850au o Iwerddon, dianc rhag newyn
• 1940au ymlaen o India, Pacistan a Bangladesh, dianc rhag rhyfel cartref a chwilio am waith
• 1950au o India’r Gorllewin, chwilio am waith
• 1972 Asiaid Ugandaidd, dianc rhag erledigaeth gwleidyddol
• 2004 ymlaen o ddwyrain Ewrop, yn enwedig Gwlad Pwyl, chwilio am waith o ganlyniad i ehangu’r UE

Heddiw, India yw’r wlad sydd â’r nifer mwyaf o fudwyr yn ei gadael i ddod i’r DU, ond mae llawer o fewnfudwyr yn dod o wledydd eraill hefyd, fel Pacistan, Iwerddon a Gwlad Pwyl.

Yn 2011, roedd 13 y cant (7.5 miliwn) o drigolion Cymru a Lloegr wedi cael eu geni y tu allan i’r DU.

Mae mudo yn arwain at ganlyniadau diwylliannol ac economaidd i wlad, a all fod yn gadarnhaol ac yn negyddol.

Effeithiau cadarnhaol

• Llenwi bylchau mewn sgiliau.
• Mae pobl sy’n gweithio’n galed o fudd i’r economi.
• Mae gwasanaethau cyhoeddus yn elwa, ee gweithwyr yn y GIG.
• Mae refeniw treth y llywodraeth yn cynyddu.
• Mae diwylliant yn cael ei gyfoethogi, ee bwydydd a gwyliau’r byd.
• Mae grwpiau o fewnfudwyr yn hybu’r gyfradd genedigaethau.

Effeithiau negyddol

• Mae twf yn y boblogaeth yn medru rhoi pwysau ar wasanaethau, tai a seilwaith er mwyn darparu ar gyfer mwy o bobl.
• Gall drwgdeimlad ddatblygu rhwng y boblogaeth wreiddiol a grwpiau o fewnfudwyr, ee efallai y bydd pobl leol yn teimlo bod ganddyn nhw lai o gyfleoedd i gael gwaith oherwydd bod mwy o gystadleuaeth.
• Mae mewnfudwyr yn tueddu i fod wedi eu lleoli gyda’i gilydd mewn ardaloedd dinesig mawr.
• Efallai na fydd grwpiau o fewnfudwyr yn cymathu i mewn i gymunedau lleol.
• Anghydbwysedd rhwng dynion a merched - fel arfer mae mwy o ddynion yn mudo.

Mae llawer o bobl yn gadael y DU bob blwyddyn hefyd. Mae Awstralia, De Affrica, Sbaen a’r UDA yn gyrchfannau poblogaidd. Mae pobl yn symud er mwyn cael gwaith a chyfleoedd addysgol. Mae rhai’n ymddeol i wlad fel Sbaen er mwyn cael hinsawdd cynhesach a sychach.