Arddangos portread i anrhydeddu Gwynfor Evans
- Cyhoeddwyd
Bydd AS cyntaf Plaid Cymru yn cael ei anrhydeddu, wrth i bortread ohono gael ei arddangos yn y Senedd yn San Steffan.
Fe gipiodd y diweddar Gwynfor Evans etholaeth Caerfyrddin oddi wrth y Blaid Lafur yn isetholiad 1966.
Dywedodd AS Dwyrain Caerfyrddin a Dinefwr, Jonathan Edwards bod y Pwyllgor Ymgynghorol y Llefarydd ar Weithiau Celf wedi cadarnhau y byddent yn edrych i brynu portread o Mr Evans i nodi hanner canmlwyddiant ers y fuddugoliaeth hanesyddol.
Dywedodd Mr Edwards y byddai'n sicrhau bod "etifeddiaeth a phresenoldeb" Gwynfor Evans yn parhau yn NhÅ·'r Cyffredin.
Mae David Lloyd George, Winston Churchill, Edward Heath, Tony Benn a James Callaghan ymhlith y portreadau sydd eisoes yn cael eu harddangos yn San Steffan.
'Parhau etifeddiaeth'
"Rwy'n falch iawn bod Curaduron y Casgliad Celf Seneddol yn ceisio meddiannu portread o Gwynfor, a hynny yn dilyn fy sylwadau i sicrhau fod etifeddiaeth Gwynfor Evans yn parhau yn NhÅ·'r Cyffredin," meddai Mr Edwards.
"Yn syml, ni fyddai Cymru fel y gwyddom ni heddiw yn bodoli heb ymdrechion Gwynfor Evans.
"Mae ei lwyddiannau yn dal i adleisio o amgylch Sir Gaerfyrddin a Chymru heddiw."
Ar ôl colli'r sedd i Lafur yn etholiad cyffredinol 1970, enillodd Mr Evans hi'n eto ym mis Hydref 1974, gan wasanaethu fel Aelod Seneddol nes 1979.
Bu farw Mr Evans yn 92 oed yn 2005.