Ubushinjacyaha bw'u Rwanda bwunze mu rya RIB: Urupfu rwa Kizito Mihigo 'rwatewe no kwiyahura yimanitse'

Ubushinjacyaha bukuru bw'u Rwanda bwanzuye ko bwasanze umuhanzi Kizito Mihigo watangajwe ko yapfuye ku itariki ya 17 y'uku kwezi "yariyahuye yimanitse", nkuko bigaragara mu itangazo bwaraye bushyize ku rubuga rwa Twitter.

Iryo tangazo, ryashyizweho umukono n'umushinjacyaha mukuru Havugiyaremye Aimable, ryemeranya n'ibyari byatangajwe n'urwego rw'ubugenzacyaha bw'u Rwanda (RIB) nabwo bwari bwatangaje ko Kizito yiyahuye.

Bamwe mu mpirimbanyi z'Abanyarwanda baba mu mahanga ndetse n'imiryango iharanira uburenganzira bwa muntu nka Human Rights Watch, bavuze ko badashira amakenga ibivugwa ko Kizito yiyahuye, basaba ko hakorwa iperereza ryigenga.

Itsinda ry'abantu 36 bavuga ko ari abarokotse Jenoside yo mu Rwanda mu 1994, baba mu mahanga, bari mu baheruka gusaba, mu ibaruwa ifunguye bandikiye Perezida Paul Kagame, ko hakorwa iperereza ryigenga ku rupfu rwa Kizito.

Dr Philippe Basabose uba muri Canada uvugira abo muri iryo tsinda, ku wa kabiri w'iki cyumweru yabwiye BBC Gahuzamiryango ko Kizito nta bimenyetso yari yaragaragaje mbere byaca amarenga yuko yaba yari afite umugambi wo kwiyambura ubuzima.

Avuga ko ahubwo nyuma yo gufungurwa ku mbabazi za Perezida Kagame mu kwa cyenda mu 2018, yumvikanye avuga ko gahunda yari afite ari iyo gushinga urugo.

Asubiza ku byavuzwe na Human Rights Watch, Marie Michelle Umuhoza, umuvugizi wa RIB, yavuze ko u Rwanda ari igihugu cyigenga gifite ubushobozi bwo gukora iperereza ubwacyo.

Ni iki nyirizina kiri mu itangazo ry'ubushinjacyaha?

Ubushinjacyaha buvuga ko bwakiriye raporo ya RIB ku rupfu rwa Kizito rwabereye aho yari afungiye i Remera.

Buvuga ko iyo raporo ishingiye ku byavuye ku iperereza ry'aho urwo rupfu rwabereye, raporo ku isuzuma ry'umurambo (Medical - Legal Autopsy) yakozwe na 'Laboratoire' y'igihugu - buvuga ko iyi yaneretswe abo mu muryango wa Kizito - ndetse hashingiwe no ku bantu babajijwe.

Ubushinjacyaha bw'u Rwanda buvuga ko hagendewe ku ho urwo rupfu rwabereye, "umurambo wa Kizito Mihigo wasanzwe umanitse kuri grillage y'idirishya ry'icyumba yari afungiyemo, uhambiriye mu ijosi n'umugozi ukozwe mu gice cy'ishuka yiyorosaga".

Buvuga kandi ko raporo ishingiye ku isuzuma ry'umurambo igaragaza ko urupfu rwa Kizito rwatewe no "kubura umwuka, gushobora guterwa no kuba yariyahuye yimanitse".

Ubushinjacyaha bw'u Rwanda bunavuga ko abapolisi bari bashinzwe kumucunga aho yari afungiye batashoboye kumva ibyabaye kuri Kizito mu cyumba cye kuko "hari intera itatuma bumva ibyabaye".

Itangazo ry'ubushinjacyaha risoza rivuga ko "nyuma yo gusesengura byimbitse raporo yatanzwe na RIB" busanga urupfu rwa Kizito Mihigo "rwaratewe no kwiyahura yimanitse, bityo bugasanga nta kurikiranacyaha ryabaho kuri urwo rupfu".

Kizito yashyinguwe mu irimbi rya Rusororo riri i Kigali ku wa gatandatu w'icyumweru gishize.

Yari afite imyaka 38, ari ingaragu.