Israel yagabye 'ibitero byinshi' kuri Irani mu gihe Trump avuga ko Amerika ititeguye amasezerano yo kurangiza intambara

Igisirikare cya Israel (IDF) kivuga ko cyagabye "ibitero byinshi" ku hantu hanyuranye ho mu burengerazuba bwa Irani.

Irani na Israel byarasanyeho mu ijoro ryacyeye, mu gihe amakuru avuga ko mu bihugu byo mu Kigobe cy'Abarabu habayeho gusama (gufata) ibisasu bya misile hamwe n'indege nto z'intambara zitajyamo umupilote (drone).

Hagati aho, Perezida w'Amerika Donald Trump avuga ko Irani ishaka amasezerano yo kurangiza intambara ariko ko we atarayashaka "kuko ingingo [zayo] si nziza bihagije".

Umunyamakuru wa BBC ku mutekano Frank Gardner, ubu uri i Riyadh mu murwa mukuru wa Arabie Saoudite, avuga ko icyizere icyo ari cyo cyose Amerika ishobora kuba yari ifite ko imbaraga nyinshi cyane za gisirikare zayo hari ukuntu zari gutuma Irani yemera amahoro ashingiye ku ngingo Amerika ishaka, cyakomwe mu nkokora.

Mu kiganiro yagiranye n'igitangazamakuru NBC cyo muri Amerika, Trump yavuze ko Amerika "yashenye burundu" ikirwa cya Kharg cyo muri Irani – kinyuraho byinshi mu bikomoka kuri peteroli Irani yohereza mu mahanga – ariko avuga ko "dushobora kukirasaho izindi nshuro nkeya byo kwishimisha gusa".

Mu yandi makuru, ambasade y'Amerika i Baghdad mu murwa mukuru wa Iraq, ku wa gatandatu yaburiye Abanyamerika kuva muri Iraq "aka kanya" ndetse ishishikariza uwo ari we wese utekereza ku kuhaguma "kwisubiraho".

Mbere yaho ku wa gatandatu, iyo ambasade y'Amerika i Baghdad yarashweho.

Intambara hagati y'Amerika-Israel na Irani uyu munsi yinjiye mu munsi wayo wa 16.

Kuri Irani, iyi ntambara ni iy'ubushobozi bwo kubaho

Isesengura rya Frank Gardner, umunyamakuru wa BBC ku mutekano, uri i Riyadh

Irani ifite ibintu bibiri bikomeye biri ku ruhande rwayo muri iyi ntambara: aho iherereye no kwihangana.

Birashoboka ko ibyo byombi byapfobejwe na White House (ibiro bya perezida w'Amerika). Irani ntiyajyaga na rimwe kwisukira imbaraga za gisirikare za CENTCOM, igice cya Pentagon (ibiro bikuru by'ingabo z'Amerika) kiyobora ibikorwa bya gisirikare by'Amerika mu Burasirazuba bwo Hagati.

Ariko gupimira urimo 'gutsinda' iyi ntambara ushingiye ku mubare w'ahantu harashweho muri Irani cyangwa umubare w'abakomanda (abakuru b'ingabo) bayo bishwe, ni ukurebera iyi ntambara mu buryo butari bwo.

Iyi ijyanye n'ubushobozi bwo kubaho.

Ubutegetsi bwa Repubulika ya Kisilamu, bwari busanzwe budakunzwe n'ababarirwa muri za miliyoni mu baturage ba Irani mbere yuko iyi ntambara itangira, icyo bucyeneye gusa ni ukurokoka ubundi bugashobora gutangaza intsinzi.

Icyizere icyo ari cyo cyose Amerika ishobora kuba yari ifite ko imbaraga nyinshi cyane za gisirikare zayo hari ukuntu zari gutuma Irani yemera amahoro ashingiye ku ngingo Amerika ishaka, cyakomwe mu nkokora.

Kandi hagati aho, bitewe n'ahantu iherereye, Irani ubu yanize (kuniga) igice cy'ubucuruzi bw'ibikomoka kuri peteroli ku isi, kubera ko urebye igenzura amato anyura ku nkombe zayo aca mu muhora wa Hormuz.