Ambasade y'Amerika i Baghdad yarashweho mu gihe Trump avuga ko 'yashenye burundu' ibya gisirikare byo ku kirwa cya Irani

Ambasade y'Amerika i Baghdad mu murwa mukuru wa Iraq yarashweho igisasu cya misile, bituma umwotsi uzamuka hejuru y'inyubako y'ambasade, nkuko byatangajwe n'ibiro ntaramakuru Reuters, bisubiramo amagambo y'abibahaye amakuru ariko bidatanga amakuru arambuye.

Ibiro ntaramakuru AP byatangaje ko igisasu cya misile cyakubise ku kibuga cy'indege za kajugujugu kiri mu rugo (igipangu) rw'iyo ambasade y'Amerika.

Ibiro ntaramakuru AFP byasubiyemo ababihaye amakuru bavuga ko indege nto y'intambara itajyamo umupilote (drone) yakubise kuri iyo ambasade y'Amerika y'i Baghdad.

Icyo gitero cyabaye nyuma gato yuko abarwanyi babiri bashyigikiwe na Irani biciwe mu bitero ku murwa mukuru wa Iraq, nkuko AFP yabitangaje, isubiramo amagambo y'abantu benshi bayihaye amakuru.

Bibaye mu gihe ku wa gatanu Perezida Donald Trump yavuze ko Amerika "yashenye burundu" buri hantu ha gisirikare ho ku kirwa cya Kharg cyo muri Irani, ndetse akaburira ko ashobora kurasa ku bikorwa-remezo by'ibikomoka kuri peteroli.

Mu gusubiza, Irani yaburiye ko ibikorwa-remezo by'ibikomoka kuri peteroli n'iby'ingufu (z'amashanyarazi) bya kompanyi zikorana n'Amerika bizasenywa igihe ibigo by'ingufu bya Irani byaba bitewe.

Ibikomoka kuri peteroli bigera kuri 90% by'ibyo Irani yohereza mu mahanga binyura ku kirwa cya Kharg, bityo aho ni ahantu h'ingenzi cyane ku bukungu bwa Irani.

Ibiro ntaramakuru Fars, bifite aho bihuriye n'umutwe wihariye wo mu ngabo za Irani witwa IRGC, byatangaje ko ibiturika birenga 15 byumvikanye kuri icyo kirwa mu gihe cy'ibitero by'Amerika.

Fars yatangaje mu butumwa bwo ku rubuga nkoranyambaga rwa Telegram ko ibyo bitero byari bigambiriye ubwirinzi bwo mu kirere, ikigo cy'ingabo zirwanira mu mazi, umunara wo ku kibuga cy'indege wo kugenzuriramo ingendo z'indege hamwe n'inyubako y'ikirongozi ibikwamo indege za kajugujugu.

Igitangazamakuru cya leta ya Irani cyatangaje ko nta kintu cyangiritse ku bikorwa-remezo by'ibikomoka kuri peteroli byo ku kirwa cya Kharg.

Mu yandi makuru, bamwe mu baturage b'i Tehran babwiye ishami rya BBC ritangaza amakuru mu rurimi rw'Igi-perse ko uwo murwa mukuru wa Irani warashweho bikomeye mu ijoro ryacyeye, muri iyi ntambara imaze ibyumweru bibiri hagati y'Amerika-Israel na Irani.

Igisirikare cya Israel (IDF) cyatangaje ko igitero cya misile cya Irani cyibasiye umujyi wa Shoham, rwagati muri Israel, mu ijoro ryacyeye. Amafoto agaragaza inyubako zangiritse.

IDF yanatangaje ko ku wa gatanu yarashe ku bigo biyoborerwamo ibitero by'umutwe wa Hezbollah, ufashwa na Irani, i Beirut mu murwa mukuru wa Libani, yongeraho ko mbere yo kugaba ibyo bitero yabanje kugabanya ibyago byo kugirira nabi abasivile.