FARDC, Wazalendo vs M23: Ni inde warenze ku gahenge kasabwe na Amerika?

Kuwa gatanu havuzwe imirwano ikomeye hagati y’ingabo za leta ya DR Congo zifatanyije n’imitwe yiswe Wazalendo barwana n’inyeshyamba za M23 muri teritwari ya Masisi, ni mu gihe agahenge k’ibyumweru bibiri Amerika kari kamaze icyumweru kimwe.

Buri ruhande rurashinja urundi ko ari rwo rwarenze ku gahenge. Abategetsi ba Amerika bari bavuze ko bazakoresha ubutasi bwabo mu gukurikirana iyubahirizwa ry’ako gahenge.

Abaturage benshi bo mu bice bya Busumba no muri centre ya Bihambwe i Masisi bavuye mu byabo kubera imirwano yo kuwa gatanu, nk’uko umwe mu banyamakuru bigenga bakorera i Goma yabibwiye BBC.

Mu mashusho yaciye ku mbuga nkoranyambaga umwe mu bakuriye umutwe w’abarwanyi wa PARECO – umwe mu igize Wazalendo – yumvikanye avuga ko M23 ariyo yabateye kuwa kane mu birindi byabo mu duce twa Bihambwe, Matanda na Busumba muri Masisi.

Bertrand Bisimwa ukuriye ishami rya politike rya M23 kuwa gatanu yatangaje ko kuva kuwa kane ibirindiro byabo bitandukanye muri Masisi byatewe n’ingabo za leta zifatanyije na Wazalendo “mu guhonyora agahenge kasabwe n’umuryango mpuzamahanga”.

BBC yagerageje kuvugisha uruhande rw’ingabo za leta ku bivugwa kuri iyi mirwano yubuye ariko ntibarasubiza kugeza ubu.

Radio Okapi yo muri DR Congo ivuga ko nyuma y’imirwano yo kuwa gatanu, M23 yafashe ibice bya Matanda, Bihambwe na Busumba muri Masisi kandi habayeho guhunga, gusahura, no kwica bamwe mu basivile. Ibyo BBC itashoboye kugenzura mu buryo bwigenga.

Kuwa gatanu tariki 15 z’uku kwezi k’Ukuboza, Adrienne Watson umuvugizi w’Inama y’Umutekano ya Amerika y’ibiro bya White House yatangaje ko impande zishyamiranye muri DR Congo zemeye kongera ibyumweru bibiri ku masezerano y’agahenge k’amasaha 72 bari bumvikanye mbere.

Adrienne yavuze ko ako gahenge gashya kari katangiye kubahirizwa kuwa kane tariki 14 kandi kagomba kugeza nibura tariki 28 z’uku kwezi.

Mu itangazo, Adrienne yagize ati: “Leta zunze ubumwe…zizakomeza gukoresha ubutasi n’amakuru y’abayihagarariye mu gukurikirana iyubahirizwa ry’ako gahenge kw’igisirikare hamwe n’imitwe yitwaje intwaro.”

Imirwano muri Masisi bisa n’aho yahise yubura nyuma y’umunsi w’amatora muri DR Congo. Amatora atarabaye muri tweritwari za Masisi na Rutshuru nk’uko byategetswe na leta kuko henshi muri izi tweritwari hagenzurwa na M23.

Mu gihe impande zombi zishinjanya kurenga ku gahenge, kugeza ubu ntibizwi neza uwatangije imirwano mu gihe umwuka ukomeje kuba mubi kandi hari ubwoba ko imirwano ishobora gukomeza.