Victoire Ingabire arakomeza kuburana ku ifungwa n'ifungurwa

Umunyapolitiki utavuga rumwe n'ubutegetsi, Victoire Ingabire, yagejejwe mu rukiko rw'ibanze rwa Kicukiro aregwa ibyaha bitandatu, birimo umugambi wo guhirika ubutegetsi buriho no kurema umutwe w'abagizi ba nabi.

Uyu muyobozi w'ishyaka DALFA-Umurinzi yatawe muri yombi mu kwezi gushize, nyuma y'aho urukiko rukuru rutegetse ko akorwaho iperereza ku buhamya bwatanzwe n'itsinda ry'abantu 9 na bo baregwa mu rundi rubanza.

Ingabire yahakanye ibyaha byose aregwa, avuga ko akurikiranywe kubera igitutu urukiko rukuru rwashyize ku bushinjacyaha, dore ko ibyo akurikiranyweho yari yanabibajijweho mu myaka 4 ishize, ariko bikagaragara ko nta mpamvu yo gukomeza kumukurikirana.

Mu ikanzu ndende idozwe mu gitenge, Victoire Ingabire yari kumwe n'umunyamategeko Gatera Gashabana. Mbere y'uko urubanza rutangira, yazamuye inzitizi z'uko atahawe uburenganzira bwose bwo kunganirwa uko abyifuza.

Urubanza rwari rwasubitswe, avuga ko yifuza kunganirwa n'abarimo umunyamategeko ukomoka mu gihugu cya Kenya.

Gusa uyu ntiyagaragaye mu rukiko kuko atemerewe n'urugaga rw'abanyamategeko rw'u Rwanda. Umukuru warwo, Moïse Nkundabarashi, aherutse gutangaza ko uyu munyamategeko yanditse ariko arahakanirwa kuko urugaga rwa Kenya na rwo rutemera abanyamategeko b'Abanyarwanda.

Ubushinjacyaha bwareze Ingabire ibyaha bitandatu, birimo kurema no kuba mu mutwe w'abagizi ba nabi, guteza imvururu muri rubanda, n'umugambi wo gushaka guhirika ubutegetsi buriho. Byinshi mu birego birasa n'ibyarezwe irindi tsinda ry'abantu 9 bivugwa ko bari abayoboke b'ishyaka DALFA-Umurinzi ritaremerwa n'amategeko.

Aba bafashwe mu mwaka wa 2021, nyuma y'uko bitabiriye amahugurwa ku buryo bwo guhangana n'ubutegetsi bw'igitugu hatitabajwe intwaro. Ingabire yarezwe kuba ku isonga y'abateguye aya mahugurwa kuko ari umukuru w'ishyaka DALFA-Umurinzi kandi hafi ya bose bakaba bari abayoboke baryo.

Umutangabuhamya mukuru muri uru rubanza, witwa Boniface Nzabandora, ni we watumye aba bose batabwa muri yombi. Yabwiye ubushinjacyaha ko yatumiwe muri aya mahugurwa, ariko aza gufata icyemezo cyo kwitandukanya na yo nyuma yo kumva ko imigambi yari igamijwe itari myiza ku gihugu.

Nzabandora yafashe icyemezo cyo gufata amajwi y'ibyavugirwaga mu mahugurwa, aya majwi akaba ari na yo afatwa nk'ikimenyetso gikomeye cy'ubushinjacyaha.

Ingabire yahakanye ibyaha aregwa, ahubwo avuga impamvu yumva iki kirego kidakwiye kwakirwa n'urukiko. Yavuze ko ibyo akurikiranyweho ubu yari yanabibajijweho mu mwaka wa 2021, ubwo iri tsinda ryatabwaga muri yombi. Gusa ngo byaje kugaragara ko nta mpamvu yo kumukurikirana, arataha.

Ingabire yavuze ko habayeho igitutu cy'urukiko rukuru ku bushinjacyaha kuko nta gishya aregwa gitandukanye n'ibyo yari yabajijwe mu myaka 4 ishize.

Avuga ku mutangabuhamya Nzabandora wamushinje, Ingabire yavuze ko uyu bigeze kubana mu rugo ari nk'umufasha wa hafi mu kazi. Gusa ngo yaje kumusezerera nyuma y'aho amenyeye ko inzego z'umutekano zamwegereye zikamusaba kujya aziha amakuru yose y'ibyabereye kwa Ingabire.

Umunyamategeko we, Gatera Gashabana, na we yibanze kuri uyu mutangabuhamya, avuga ko atari uwo kwizerwa kuko yavuye kwa Ingabire atishimye kuko yari yirukanywe, bityo akaba nta cyiza yamuvugaho.

Ikindi cyavuzwe n'uruhande ruregwa ni uko barezwe ibyaha byagombye kuba byarataye agaciro ugereranije n'igihe bivugwa byakorewe. Ibi ni nk'ibyo gutegura imyigaragambyo bisaza nyuma y'umwaka, nyamara akaba abiregwa nyuma y'imyaka 4, nubwo atabyemera.

Ni urubanza rwafashe igihe kirekire ugereranije n'izindi z'ifungwa n'ifungurwa ry'agateganyo. Rwamaze amasaha asaga 5 kandi rurangira impaka zikiri zose, umucamanza abibutsa ko bazagira igihe cyo kwiregura ubwo bazaba bagiye mu mizi.

Icyemezo cy'urukiko giteganyijwe ku itariki ya 18 y'uku kwezi.