Bimwe mu bitangaje wakwitega mu bihembo bya Oscars bizatangwa mu ijoro ryo ku cyumweru

Igihe uwayoboye filime ya Sinners, Ryan Coogler, yari akiri umwana akajya kureba filime muri sinema, yakundaga kwinjiza utuntu two kurya mu ibanga, ndetse akagira n'uburyo bwe bwihariye bwo kuvanga ibinyobwa byo mu mashini yo kuri sinema.

Aheruka kuvuga muri podcast ya Amy Poehler yitwa Good Hang ati:"Ntabwo ndi umuntu ukunda soda cyane, ariko igihe batangiraga kwemera ko uvanga ibinyobwa bitandukanye, narabikunze cyane."

Nyuma y'imyaka za mirongo, uburyo akunda kuvanga ibintu bitandukanye bwagaragaye muri filime ye iri guhatanira igihembo cya filime y'amashusho meza, ivanga umuziki wa blues n'inkuru y'ibinywamaraso (vampires) ivugwa mu mateka muri Mississippi Delta mu myaka ya 1930.

Iyi filime Sinners ishobora gutsindira ibihembo byinshi muri Oscars Awards z'uyu mwaka, ariko ihanganye cyane na One Battle After Another, indi filime iri ku isonga mu zihatanira ibihembo.

Uyu mwaka, ibihembo bya Oscars urimo kurushanwa gukomeye cyane, aho ibyiciro byinshi bigoye kumenya abazabitsindira.

Dore ibintu bisekeje byo kumenya mbere y'ibirori bya Oscars kuri iki Cyumweru.

1. Filimi yinjiye amafaranga menshi

Filime Zootopia 2 ni yo yinjije amafaranga menshi mu ziri guhatanira ibihembo uyu mwaka, yinjije agera kuri miliyari 1.86 y'amadorari.

Mu Burayi iyi filime yitwa Zootropolis 2. Ibi biterwa n'uko pariki y'inyamaswa yo muri Denmark Givskud Zoo yari yarandikishije izina "Zootopia" mu Muryango w'Ubumwe bw'Uburayi mu 2009, imyaka irindwi mbere y'uko iyo filime isohoka.

Izindi filime zinjije amafaranga menshi harimo:

2.Emma Stone yaciye uduhigo tubiri

Ku myaka 37, umukinnyi wa filime Emma Stone yabaye umugore ukiri muto kurusha abandi kujya ku rutonde rw'abahatanira Oscars inshuro 7. Yarenge kuri Meryl Streep, wari ufite imyaka 38 igihe yabigeragaho.

Ni na we mukinnyi wa filime wenyine waje ku rutonde rw'abahatana (nominations) incuro eshanu zose ku mafilime yanahataniye igihembo cya filime nziza.

Mu gihe cy' imyaka 11 yamenyekanye mu mafilime: Birdman, The Favourite, Bugonia, La La Land na Poor Things, yatsindiye Oscars muri La La Land na Poor Things.

3. Filime Frankenstein yafashe imyaka irenga 200 mu kuyikora

Hari imyaka 207 hagati y'igitabo cya Mary Shelley cyasohotse mu 1818 n'iyi filime yakozwe na Guillermo del Toro mu 2025 ikanyuzwa kuri Netflix.

Ni kimwe mu bihe birebire cyane hagati y'igitabo n'ikorwa rya filime yacyo mu mateka y'ikiciro cya filime nziza muri Oscars.

4. Chase Infiniti afite sinema mu maraso

Uyu mukinnyi mushya wa filime One Battle After Another yerekejwe mu rugendo rwa filime kuva avutse.

Uyu mukobwa w'imyaka 25, yahawe izina bakomoye ku mukinnyi wa filime Nicole Kidman wari ufite umwanya witwa Chase Meridian muri filime ya Batman Forever na Buzz Lightyear muri Toy Story igira iti: "To infinity and beyond."

Jessie Buckley ashobora kwandika amateka

Jessie ashobora kuba umukinnyi wa mbere w'umunya-Ireland utsindiye igihembo cy'umukinnyi mwiza w'umugore 'Best Actress'.

Abandi banya-Irland bahataniye iki gihembo mbere harimo: Saoirse Ronan na Ruth Negga, ariko Brenda Fricker ni we wenyine wigeze gutsindira igihembo cya Best Supporting Actress mu 1989.

Gusa kugeza ubu nta mukinnyi wo muri icyo gihugu uratwara igihembo mu kiciro cy'uyoboye mu bagore.

KPop Demon Hunters ishobora gutsindira ibihembo bibiri

Iyi filime ya Netflix irakunzwe cyane kandi ishobora gutsindira Oscar ya 'Best Animated Feature' ndetse n'igihembo cy'indirimbo nziza y'umwimerere.

Filime ebyiri gusa ni zo zabigezeho mbere: Toy Story 3 muri 2010 n'indirimbo We Belong Together na Frozen 2013 n'indirimbo Let It Go.