Naidheachdan 11:00m

Am Morair Mandelson

Thuirt Sràid Downing gum bi iad a' foillseachadh cuid de na pàipearan co-cheangailte ris a' cho-dhùnadh ann an 2024 am Morair Mandelson fhastadh mar thosgaire Bhreatainn sna Stàitean Aonaichte. Tha poilis a' rannsachadh chasaidean gun do rinn esan mì-ghiùlan ann an dreuchd phoblach nuair a thug e fiosrachadh glèidhte riaghaltais dhan eucoireach fheiseil, Jeffrey Epstein. Cumaidh na Tòraidhean deasbad sna Cumantan an-diugh airson cuideam a chur air an Riaghaltas a h-uile fiosrachadh mun chùis fhoillseachadh.

Anndra Mountbatten-Windsor

Tha Anndra Mountbatten-Windsor air gluasad a mach à a dhachaigh aig Windsor gu Oighreachd Sandringham ann an Norfolk. Tha cuideam a' sìor fhàs air bràthair an Rìgh fianais a thoirt seachad sna Stàitean Aonaichte mu a chàirdeas ri Jeffrey Epstein. Tha Mgr Mountbatten-Windsor air a bhith a' dol às àicheadh bho thoiseach gun do rinn e dad ceàrr.

Cogadh san Ucràin

Bidh na Stàitean Aonaichte os cionn chòmhraidean sìthe eadar an Ruis 's an Ucràin ris a bheil dùil ann an Abu Dhabi an-diugh. Thuirt Ceann-Suidhe na h-Ucràin, Volodomyr Zelensky, an-dè gu bheil ionnsaighean Ruiseanach air lìonra dealain na h-Ucràin a' dearbhadh gu bheil Mosgo a' taobhadh ri ceannairc seach dioplòmasaidh.

Haemochromatosis

Tha Ball-Pàrlamaid nan Eilean Siar, Torcuil Crichton, ag ràdh gun caomhnadh sgrìonadh coimhearsnachd son Haemochromatosis airgead do sheirbheisean slàinte. Sheall rannsachadh ùr tuilleadh dearbhaidh gu bheil an tinneas a tha a' fàgail cus iarainn san fhuil nas bitheanta sna h-Eileanan Siar, san Eilean Sgitheanach, Glaschu agus ceann a tuath na h-Èireann. Tha Mgr Crichton, air a bheil Haemochromatosis e fhèin, ag ràdh gun glacadh sgrìonadh an tinneas nas tràithe a' seachnadh droch thrioblaidean slàinte san ùine fhada.

John Virgo

Chaochail an cluicheadair agus craoladair sniucair, John Virgo. Bha e 79. Ghlèidh e Farpais na Rìoghachd Aonaichte ann an 1979 agus bha e aithnichte cuideachd mar phreasantair a' phrògraim telebhisein, Big Break, eadar deireadh na linne seo chaidh agus toiseach na linne seo.