Naidheachdan 10:00m

Cogadh Iran

Tha Ioran agus na Stàitean Aonaichte ag ràdh gu bheil iad air molaidhean fhaighinn feuch crìoch a chur air a' chogadh san Ear-Mheadhanach. 'S i Pacastan a tha air am plana a chur ri chèile agus i air a bhith an sàs ann an còmhraidhean le gach taobh. Am measg na tha san amharc tha aonta le dà ìre gun rachadh fois-fhòirneirt a stèidheachadh sa bhad agus gun rachadh Caolas Hormuz fhosgladh a-rithist.

Tha Ioran ag ràdh gu bheil iad a' dèanamh sgrùdaidh air na molaidhean, ach thuirt iad nach fhosgladh iad an caolas a-rithist airson aonta eadar-amail. Tha an Ceann-suidhe Trump air maoidheadh gu bheil aig Tehran gu a-màireach gus fhosgladh a-rithist air neo gun rachadh ionnsaigh a thoirt air bun-structar cumhachd is air drochaidean Iorain.

Sochairean

Gheibh na milleanan a tha a' faighinn a' Chreideis Choitchinn air neo peinnsean na stàite àrdachadh orra bho an-diugh. Tha àrdachadh 3.8% ga thoirt air a' chuid as motha de shochairean 's tha àrdachadh 4.8% ga thoirt air peinnseanan.

Cìs Oighreachd

Tha cìs oighreachd de 20% a-niste cuideachd air cuid de thuathanaich an-diugh airson a' chiad uair bho na 80an. Bha na planaichean air fearg mhòr adhbharachadh nuair a chaidh fhoillseachadh an toiseach bho chionn bliadhna gu leth. Thuirt Riaghaltas na Rìoghachd Aonaichte aig deireadh na bliadhna an-uiridh ge-tà, gun toireadh iad àrdachadh air an ìre fom biodh aig tuathanaich ri seo a phàigheadh bho £1m gu £2.5m.

Cùram

Tha deich teaghlaichean Albannach ag ràdh gu bheil iad air strì fad mhìosan is bliadhnaichean gus suimean mòra airgid fhaighinn air ais bhon chompanaidh Morar Care Group. Tha iad air innse do phrògram Disclosure a' BhBC gun robh iad air an t-airgead a phàigheadh mar bharrantas gus àite a ghlèidheadh ann an dachannan cùraim na companaidh, le dùil faigheadh iad air ais e. Thàinig droch ìrean de chùram aig tè de na dachannan aca, Castlehill an Inbhir Nis, am bàrr ann an rannsachadh dìomhair a chaidh a dhèanamh an-uiridh.

Tha Morar Care Group ag ràdh gu bheil na casaidean nan aghaidh eachdraidheil, ceàrr agus meallta.