Bacadh air planaichean aig companaidh Shìonach aig Port Àird nan Saor

Chuir Riaghaltas na Rìoghachd Aonaichte bacadh air planaichean aig companaidh Shìonach a bha an dùil £1.5bn a chosg air crainn-ghaoithe a thogail air a' Ghàidhealtachd.

Bha Ming Yang a' cur romhpa suas ri 1,500 cosnadh a chruthachadh aig Port Àird nan Saor.

Thuirt an riaghaltas, às dèidh dhaibh sgrùdadh a dhèanamh air na planaichean, nach urrainn dhaibh taic a chur ri cleachdadh chrann-gaoithe Ming Yang ann an leasachaidhean cumhachd aig muir anns an Rìoghachd Aonaichte.

Chuireadh iad taic ri in-ionmhas Sìonach, thuirt iad, nuair a tha sin gu maith na dùthcha-sa.

"Cumaidh sinn oirnn le càirdeas le Sìona, co-obrachadh far an urrainn dhuinn, ach gun a bhith aig àm sam bith a' cur tèarainteachd agus seasmhachd ann an cunnart," thuirt fear-labhairt bhon riaghaltas.

Bha Riaghaltas na Rìoghachd Aonaichte air innse san Fhaoilleach gun robh iad faisg air co-dhùnadh a ruighinn air pròiseact Ming Yang.

Thuirt Ministear na Malairt Sir Chris Bryant aig an àm gum feumadh an riaghaltas a bhith cinnteach gun robh am pròiseact "sàbhailte is tèarainte".

Thuirt Ming Yang gun cùm iad orra a' còmhradh ri Riaghaltas na Rìoghachd Aonaichte ach gum fàg an co-dhùnadh seo gum pàigh muinntir Bhreatainn barrachd airson cumhachd airson ùine nas fhaide.

Thuirt Leas-Phrìomh Mhinistear na h-Alba Ceit Fhoirbeis gu bheil tèarainteachd nàiseanta cudromach agus gum bu chòir spèis a shealltainn dhi.

Thuirt i ge-tà gun robh e "duilich" nach robh Riaghaltas na Rìoghachd Aonaichte air mìneachadh gu dè dìreach a bha air cùl a' cho-dhùnaidh.

"Tha an co-dhùnadh seo air a bhith a' suidhe air deasgaichean mhinistearan Riaghaltas na Rìoghachd Aonaichte fad còrr is 18 mìosan is bidh buaidh mhòr aig an dàil seo.

"'S e sabotais a tha seo air leasachadh gnìomhachail na h-Alba," thuirt i.