'शान्तिपूर्ण' निर्वाचन भएकोमा राष्ट्रपतिको 'सन्तोष'
तस्बिर स्रोत, Office of the President
राष्ट्रपति रामचन्द्र पौडेलले शान्तिपूर्ण रूपमा प्रतिनिधिसभा सदस्य निर्वाचन सम्पन्न गरेको भन्दै सरोकारवाला निकायलाई धन्यवाद दिएका छन्।
उनले चुनावबाट मुलुकमा उत्पन्न जटिल परिस्थितिले निकास पाएकोमा सन्तोष व्यक्त गरेको उनका प्रेस सल्लाहकार किरण पोखरेलले जानकारी दिएका छन्।
"राष्ट्रपति रामचन्द्र पौडेलले शान्तिपूर्ण रूपमा प्रतिनिधिसभा सदस्य निर्वाचन सम्पन्न भएर मुलुकमा उत्पन्न जटिल परिस्थितिले निकास पाएकोमा सन्तोष प्रकट गर्नुभएको छ," पोखरेलले भनेका छन्।
राष्ट्रपतिले निर्वाचन सफल बनाउन सक्रिय सरकार, निर्वाचन आयोग, सुरक्षाकर्मी, राजनीतिक दल, आम मतदाता, राष्ट्रसेवक कर्मचारी र सम्बद्ध सबै पक्षसहित सम्पूर्ण नेपाली जनतालाई धन्यवाद प्रकट गरेको पोखरेलले जानकारी दिए।
