د چین بهرنیو چارو وزارت: افغانستان او پاکستان هوکړه کړې چې د کړکېچ حل لپاره هر اړخیزې لارې ولټوي

د چين د بهرنيو چارو وزارت د چهارشنبې پر ورځ وويل، چې "افغانستان او پاکستان په ارومچي کې د سولې د خبرو اترو پر مهال هوکړه وکړه چې د روان کړکېچ د پای ته رسولو لپاره به هر اړخیزې حل لارې لټوي."

د چین د بهرنيو چارو وزارت وياندې ماو نینګ په يوه خبري ناسته کې وويل، دواړو هېوادونو په چین کې د لیدنو پر مهال هوکړه وکړه چې داسې ګامونه به پورته نه کړي چې وضعيت نور هم ترینګلی یا پېچلی کړي.

ماو زياته کړه، "چين به له دواړو هېوادونو سره خپلو اړیکو ته دوام ورکړي او د خبرو اترو لپاره به اسانتیاوې برابر کړي."

د سې شنبې پر ورځ د طالبانو حکومت د بهرنیو چارو وزارت په یوه ویناپاڼه کې ویلي وو" د بهرنیو چارو وزیر امیر خان متقي په کابل کې د چین ولسي جمهوریت سفیر ښاغلي ژاو شینګ، د دوو ‌اړخیزو همکاریو، سیمه‌ییزو بدلونونو او د چین اورمچي ښار کې د روانو مذاکراتو د بهیر په اړه بحث او د نظر تبادله وکړه." دغه وزارت د ښاغلي متقي له خولې لیکلي " تر دې دمه ګټورې خبرې شوې دي او هیله ده چې جزئي تعبیرات د مذاکراتو د پرمختګ خنډ نه شي."

ویناپاڼه کاږي، د طالبانو حکومت د بهرنیو چارو وزیر "د دواړو هېوادونو ترمنځ د اړیکو او همکاریو د مثبتې ارزونې ترڅنګ له خپل چینايي سیال او د هغه له کاري ډلې په اورمچي کې د مذاکراتو د تنظیم او کوربتوب له امله مننه وکړه او همداراز یې د سعودي عربستان پاچاهۍ، ترکیې جمهوریت، قطر دولت او د متحده عربي اماراتو د منځګړیتوب هڅې وستایلې."

د دغه اعلامیې پر بنسټ په کابل کې د چین سفیر هم د اورمچي د مذاکراتو په اړه وروستي معلومات د طالبانو حکومت د بهرنیو چارو له وزیر سره "شریک کړل او ویې ویل چې هېواد یې د افغانستان او پاکستان ترمنځ د باور فضا د رامنځته کولو لپاره هڅې کوي او دغه بهیر یې په بې‌طرفۍ او همکارۍ پیل کړی دی. هغه زیاته کړه چې د سیمې د جیوپولیټیک وضعیت په درک سره، تمه ده چې د افغانستان او پاکستان ترمنځ د باور جوړونې بهیر، نېک نیت او د تاوتریخوالي نشتون دوام ومومي."

پاکستاني له لوري تر اوسه د دغو خبرو په تړاو څه نه دي ویلي او نه هم دا روښانه شوې چې د مذاکراتي ډلو د بحث وړ مهم ټکي څه دي.

په تېرو ناستو کې د طالبانو حکومت مرکچي پلاوي غړو ویلي وو چې له پاکستاني اړخ سره یې اختلافي ټکي " د ترهګرۍ تعریف او د " ډیورنډ کرښې په ګډون ځینې هغه ټکي وو چې دواړه غاړې پرې نه سلا کېدلې."

د طالبانو حکومت چارواکو په وار وار ویلي، پاکستان کې جګړه د هغه هېواد کورنۍ مسله ده او دا چې دوی د هغوی مخالفینو ته دوی د "ترهګرو" کلیمه نه شي کارولی.

پاکستان خپلو مخالفو وسله والو طالبانو ته " فتنه الخوارج" نوم کاروي چې په مذهبي کچه له دینه وتلو خلکو ته کارول کېږي.

په اوسنۍ ناسته کې پلاوي ته نژدې سرچینو بي بي سي ته ویلي وو، دوی یوازې پر امنیتي اړخ خبرې نه کوي، غواړي له پاکستان سره د کډوالو، اقتصادي راکړې ورکړې او ټرانزیټ په ګډون پر ټولو مسلو خبرې وشي. د دغه سرچینې په وینا "یوازې امنیتي او د اوربند موضوع د دواړو ترمنځ‌ شته ستونزه نه شي حلولی."

سرچینو ترمخه د افغانستان د طالبانو حکومت پلاوي کې د بهرنيو چارو وزارت استازي محب‌الله وثیق اوعبدالحی قانت، د استخباراتو ریاست استازی یحیی تکل، د کورنیو چارو او د دفاع وزارتونوعارف‌الله او روح‌الله عمر شامل دي.

دا د طالبانو له لوري د هغې لوړې کچې پلاوی نه دی چې دوحه او استانبول کې پاکستان سره خبرو ته ناست وو. هغه مهال دوحه کې د دفاع وزیر محمد یعقوب مجاهد او په استانبول کې د طالبانو د کورنیو چارو مرستیال وزیر رحمت الله نجیب په ګډون لوړ پوړي طالب مشران پلاوي کې وو.

پاکستان کې هم سرچینې وايي، مرکچي پلاوي کې د تېر په څېر د پوځ لوړ پوړي چاروکي نه دي ځای شوي.