کوہلی دنیا کے سب سے بد تمیز کھلاڑی ہیں: انڈین اداکار نصیر الدین شاہ

بالی وڈ کے معروف اداکار نصیر الدین شاہ نے انڈین کرکٹ ٹیم کے کپتان ویراٹ کوہلی پر سخت تنقید کرتے ہوئے کہا ہے کہ وہ دنیا کے سب سے بدتمیز کھلاڑی ہیں۔

انڈین میڈیا کے مطابق نصیر الدین شاہ نے فیس بک پر ویراٹ کوہلی کو تنقید کا نشانہ بناتے ہوئے لکھا ’ویراٹ کوہلی نہ صرف دنیا کے سب سے بہترین بلے باز ہیں بلکہ وہ سب سے بدتمیز کھلاڑی بھی ہیں۔

’کرکٹ میں ان کی قابلیت ان کے غرور اور برے رویے کے سامنے پھیکی پڑ جاتی ہے۔ میرا ملک چھوڑنے کا کوئی ارادہ نہیں ہے۔‘

یہ بھی پڑھیے

کوہلی اور دھونی میں فرق

’کوہلی کرکٹ چھوڑ کر کبڈی کھیلنا کیوں نہیں شروع کر دیتے؟‘

’کوہلی کو عظیم کرکٹر کہنا جلد بازی ہوگی‘

بعض معاملوں میں کوہلی سچن سے بھی بہتر

اداکار نصیر الدین شاہ نے اپنی پوسٹ کے ذریعہ ویراٹ کوہلی کے اس بیان پر ردعمل دیا جس میں انھوں نے غیر ملکی کھلاڑیوں کو پسند کرنے والے مداحوں کو ملک چھوڑ کر چلے جانے کے لیے کہا تھا۔

کوہلی نے ایک پروموشنل پروگرام کے دوران ایک مداح کے تبصرے پر یہ بیان دیا تھا۔

اس پوسٹ نے سوشل میڈیا صارفین کی توجہ اپنی جانب مبذول کرا لی ہے۔ کچھ لوگوں نے اس پوسٹ کی حمایت جبکہ کچھ نے اس پر اعتراض کیا ہے۔

کچھ صارفین نے ویراٹ کوہلی کو بدتمیز کہنے پر نصیر الدین شاہ کو آڑے ہاتھوں لیا جبکہ کچھ نے کوہلی کی حمایت کرتے ہوئے کہا کہ آسٹریلیا کو شکست دینے کے لیے اس طرح کے جارحانہ رویہ کی ضرورت ہے۔

ان میں سے متعدد صارفین ایسے بھی تھے جن کا کہنا تھا کہ کوہلی کئی مرتبہ اپنی حد پار کر چکے ہیں۔