တိုက်ရိုက်ထုတ်လွှင့်မှု, ထိုင်းစစ်တပ်အရာရှိကြီးတွေ နေပြည်တော်မှာ စစ်ခေါင်းဆောင်နဲ့ တွေ့ဆုံ

တိုက်ရိုက် ထုတ်လွှင့်ချက်

1. လွန်ခဲ့သော ၂ မိနစ် ကလေကြောင်းတိုက်ခိုက်ခံ အီရန်ပြည်သူတွေ ကြားသိရတဲ့စစ်ပွဲသတင်းတွေက ဘာတွေလဲ

   

   ဓာတ်ပုံ ရင်းမြစ်, IRTV

   ပထမအစောပိုင်းမှာ စစ်ပွဲနဲ့ပတ်သက်ပြီး သတင်းတွေက နိုင်ငံခြားသတင်းဌာနတွေမှာပဲ ပေါ်ထွက်လာပြီး အဲဒီသတင်းဌာနတွေက ထုတ်လွှင့်တာတွေကို အီရန်ပြည်သူအများစုက လက်လှမ်းမမီကြပါဘူး။

   ဖေဖော်ဝါရီ ၂၈ မှာ ဝန်ကြီးချုပ် ဘင်ဂျမင် နေတန်ညာဟုက "အာဏာရှင် ဇာတ်သိမ်းသွားပြီဆိုတဲ့လက္ခဏာတွေ"ကို တွေ့နေရတယ်လို့ဆိုရင်း အမေရိကန်နဲ့ အစ္စရေး ပူးတွဲတိုက်ခိုက်မှုတစ်ခုမှာ အီရန်နိုင်ငံ့ဦးသျှောင် အယာတိုလာ အလီ ခါမေနီ သေဆုံးသွားပြီဆိုတာကို ညွှန်းဆို ပြောခဲ့ပါတယ်။ ဒါပေမဲ့ နိုင်ငံပိုင်ရုပ်မြင်သံကြားကို ကြည့်နေကြတဲ့အီရန်နိုင်ငံသားတွေ ဒီအကြောင်းကို လုံးဝ မသိခဲ့ကြရပါဘူး။

   ခါမေနီ သေဆုံးသွားပြီလားဆိုတာကို အီရန်အစိုးရအရာရှိတွေက အစောပိုင်းမှာ အတည်လည်းမပြုသလို ငြင်းဆိုတာမျိုးလည်း မလုပ်ခဲ့ပါဘူး။ နိုင်ငံပိုင်မီဒီယာတွေထဲက တစ်ခုဖြစ်တဲ့ အိုင်အာတီဗီ ၃ (IRTV 3) လိုင်းက သတင်းတင်ဆက်သူတစ်ယောက်က ပရိသတ်တွေအနေနဲ့ သူ့ကို "ယုံပါ"၊ အစိုးရက ရထားတဲ့သတင်းတွေက "နောက်ဆုံးရသတင်းအချက်အလက်တွေ" လို့ ပြောခဲ့ပါတယ်။ သူက ခါမေနီ သေဆုံးတယ်ဆိုတဲ့သတင်းဟာ မကြာခင်မှာ အမှန်တရားထွက်ပေါ်မယ့် "အခြေအမြစ်မရှိတဲ့ကောလာဟလတွေ" သာ ဖြစ်ကြောင်း ပြောခဲ့ပါတယ်။

   ဒါက အီရန်ပြည်သူတွေ ပြည်တွင်းမှာ သိရတဲ့ သတင်းအခြေအနေပါ။ နောက်ပိုင်းမှာတော့ အယာတိုလာ အလီ ခါမေနီသေဆုံးပြီလို့ အီရန်အာဏာပိုင်တွေက အတည်ပြုပါတယ်။

   ဒါပေမဲ့ အခုတစ်ခေါက် စစ်ပွဲမှာ အီရန်ပြည်တွင်းထဲ လုပ်ကြံထားတဲ့သတင်းအတုတွေလည်း ရှိနေပါတယ်။

   အပြည့်အစုံကို ဒီလင့်ခ် ကို နှိပ်ပြီး ဆက်လက်ဖတ်ရှုနိုင်ပါတယ်။

2. လွန်ခဲ့သော ၄၈ မိနစ် ကနတ်တလင်းမြို့နယ်ထဲ စစ်တပ်စစ်ကြောင်းဝင်ပြီးနောက် ကျေးရွာအချို့မီးရှို့ခံရပြီး ဒေသခံ ၃ ဦးအသတ်ခံရတယ်လို့ဆို

   

   ဓာတ်ပုံ ရင်းမြစ်, CJ

   ပဲခူးတိုင်း၊ နတ်တလင်းမြို့နယ်ထဲက ကျေးရွာအချို့ကို စစ်တပ်အင်အား ဆယ်ချီက ဆိုင်ကယ်တွေနဲ့ ဝင်ရောက်လာပြီး စစ်ကြောင်းထိုးချိန် ကာကွယ်ရေးတပ်ဖွဲ့ဝင်တွေနဲ့ ထိတွေ့မှုဖြစ်ခဲ့ပြီး နေအိမ်အချို့ မီးရှို့ခံရသလို ဒေသခံ ၃ ဦးလည်း အသတ်ခံရတယ်လို့ ဒေသခံနဲ့ မြေပြင်အခြေအနေ သိသူတွေက ပြောပါတယ်။

   စစ်တပ်က ဝင်ရောက်စီးနင်းခဲ့တဲ့ရွာတွေဟာ နတ်တလင်းမြို့နယ်ထဲက ဖလံပင်ရွာ၊ သရက်ပင်ကံရိုး၊ ငုတ်တိုကျေးရွာတို့ဖြစ်ပြီး ဒေသခံတွေဟာ ဒီနေ့အထိ နေရပ်မပြန်နိုင်ဘဲ စစ်ရှောင်နေတုန်းဖြစ်တယ်လို့ ဒေသခံတချို့ဆီကနေ သိရပါတယ်။

   ပြီးခဲ့တဲ့ မတ် ၁၆ ရက်မှာ စစ်ကော်မရှင်တပ်ဖွဲ့ဝင်တွေဟာ ဖလံပင်ရွာထဲကို စစ်ကြောင်းထိုးလာခဲ့တာဖြစ်ပြီး နောက်တစ်ရက် ၁၇ ရက်နေ့မှာပဲ ရွာအရှေ့ခြမ်းကနေအိမ်တွေကို မီးရှို့ခဲ့တာလို့ မြေပြင်အခြေအနသိတဲ့ နတ်တလင်းဒေသခံတစ်ဦးက ပြောပါတယ်။

   “ရွာက အမျိုးသား ၂ ဦးနဲ့ အမျိုးသမီးလည်း အသတ်ခံရတယ်။ အဖမ်းခံရတဲ့သူလည်းရှိပေမဲ့ ပြန်လွတ် မလွတ် မသိရသေးဘူး။ ရွာအရှေ့ပိုင်းက အိမ်ခြေ ၁၅၀ လုံးတော့ ကုန်သွားပြီ” လို့ သူက ဆက်ပြောပါတယ်။

   ပြည်သူ့ကာကွယ်ရေးတပ်နဲ့ နီးစပ်သူအချို့ကတော့ နတ်တလင်းမြို့နယ်၊ ဓမ္မငယ်ရွာမှာ အခြေချနေတဲ့စစ်တပ်က အင်အားဆယ်ချီနဲ့ စစ်ကြောင်းထိုးခဲ့တာလို့ ပြောပြီး ဖလံပင်ရွာထဲကို မတ်လ ၁၆ ရက် မနက်လင်းပိုင်းမှာ ရုတ်တရက် ဝင်ရောက်ခဲ့တာလို့ ပြောပါတယ်။

   မနေ့ မတ် ၁၈ ရက်မှာလည်း ဖလံပင်ရွာထဲ တိုက်ပွဲဆက်ဖြစ်ပွားခဲ့ပြီး လေယာဉ်တွေပျံဝဲတဲ့ အသံ၊ လက်နက်ကြီးပစ်ခတ်သံတွေကို နတ်တလင်းမြို့ပေါ်ကနေပါ ကြားနေရတယ်လို့ မြေပြင်မှာရှိနေသူ တချို့ ဆီကနေ သိရပါတယ်။

   ဖလံပင်ရွာဟာ နတ်တလင်းမြို့ရဲ့ အရှေ့ခြမ်းမှာရှိပြီး မြို့နဲ့ ၁၁ မိုင်ကျော်သာ ကွာဝေးပါတယ်။

   အခုဖလံပင်ရွာဖြစ်စဉ်နဲ့ပတ်သက်လို့ စစ်ကောမရှင်တပ်ဘက်က ဒီနေ့ မနက် ၁၁ နာရီအထိ တစုံတရာ ထုတ်ပြန်လာတာ မရှိသေးပါဘူး။

3. လွန်ခဲ့သော တစ်နာရီ ကMNDAA နဲ့ TNLA တို့ရဲ့ လောက်ကိုင်တွေ့ဆုံပွဲ ၂ ရက်ကြာပေမဲ့ အဖြေမထွက်သေး

   

   ဓာတ်ပုံ ရင်းမြစ်, Getty Images

   ရှမ်းပြည်နယ်မြောက်ပိုင်းက ကွတ်ခိုင်မြို့ကို ထိန်းချုပ်ရေးနဲ့ပတ်သက်ပြီး ကိုးကန့်တပ်(MNDAA)နဲ့ တအာင်းတပ်(TNLA)တို့ တိုက်ပွဲဖြစ်ပြီးနောက် လောက်ကိုင်မှာ တွေ့ဆုံဆွေးနွေးနေပေမဲ့ ဒီနေ့ မနက်ပိုင်းအထိ အဖြေမထွက်သေးဘူးလို့ TNLA ဘက်ကနေ သိရပါတယ်။

   “မတ် ၁၇ နဲ့ ၁၈ ရက် ၂ ရက်ဆွေးနွေးခဲ့ပါတယ်။ သဘောတူညီချက် မရသေးပါဘူး။ ဒီနေ့ အစည်းအဝေးဆက်ရှိလားဆိုတာလည်း သေချာမသိရသေးဘူး” လို့ TNLA ရဲ့ပြောရေးဆိုခွင့်ရှိသူ လွေးယေဦးက ဘီဘီစီကို ပြောပါတယ်။

   MNDAA ထိန်းချုပ်ရာ လောက်ကိုင်မြို့မှာ လုပ်တဲ့ဆွေးနွေးပွဲကို TNLA ဒုတိယဥက္ကဋ္ဌ ၂ ဗိုလ်ချုပ် တားခူးလန်းနဲ့အဖွဲ့တက်ရောက်နေတာပါ။

   ၁၀၂၇ စစ်ဆင်ရေးပထမပိုင်းအတွင်း တအာင်းတပ် (TNLA) က သိမ်းပိုက်ခဲ့တဲ့ ကွတ်ခိုင်မြို့ကို မတ် ၁၄ ရက်မနက်ပိုင်းကစလို့ MNDAA က ဝင်ရောက်တိုက်ခိုက်ခဲ့ပါတယ်။ TNLA သိမ်းထားတဲ့ နမ့်ခမ်းမြို့နဲ့ နမ့်ဖတ်ကာကြားက ၁၂ မိုင်ရွာမှာ မတ် ၁၆ ရက်ညနေပိုင်းအထိ တိုက်ပွဲဖြစ်ခဲ့ကြီပြီး အခုတော့ တိုက်ပွဲငြိမ်နေတယ်လို့ TNLA က ပြောပါတယ်။

   MNDAA ဟာ ပြည်ထောင်စုလမ်းမကြီးပေါ်မှာရှိတဲ့ TNLA ရဲ့ တပ်စခန်းတွေကို တိုက်ခိုက်ဖယ်ရှားခဲ့တာကြောင့် ဒီလမ်းမကြီးကို ကိုးကန့်တပ်ကပဲ စိုးမိုးထားတဲ့အခြေအနေပါ။

   လုံးဝနီးပါးရပ်ဆိုင်းထားရတဲ့ တရုတ် - မြန်မာနယ်စပ်ကုန်သွယ်ရေးပြန်စနိုင်ဖို့ တရုတ်ဘက်က စိုင်းပြင်းလာတဲ့အချိန်မှာ ရှမ်းမြောက် တရုတ်နယ်စပ်ကုန်သွယ်ရေးအတွက် အခရာကျတဲ့လမ်းမကြီးပေါ်မှာ ညီနောင်မဟာမိတ်အဖွဲ့ကြား တိုက်ပွဲဖြစ်တဲ့အခြေအနေ ထွက်ပေါ်လာတာဖြစ်ပါတယ်။

   နယ်စပ်ကုန်သွယ်ရေးဖွင့်လိုတဲ့တရုတ်အလိုကျ အခုလိုတွေ ဖြစ်လာပြီး လောက်ကိုင်ဆွေးနွေးပွဲကိုလည်း တရုတ်က ကြားဝင်စေ့စပ်နေတယ်ဆိုတဲ့သတင်းတွေ ထွက်ပေါ်နေတာနဲ့ပတ်သက်လို့ TNLA ပြောရေးဆိုခွင့်ရှိသူ လွေးယေဦးကတော့ “မှတ်ချက်ပြောလိုတာ မရှိသေးဘူး” လို့ တုံ့ပြန်ပါတယ်။

   ကိုးကန့်တပ် (MNDAA) ရဲ့ မတ် ၁၄ ရက်မှာ ကွတ်ခိုင်ဖြစ်စဉ်နဲ့ပတ်သက်လို့သဘောထား ထုတ်ပြန်ထားပြီးနောက် တစုံတရာထပ်ပြောလာတာမရှိသေးပါဘူး။

   TNLA က ဝင်ရောက်စီးနင်း တာကြောင့် ကြိုးပမ်းဖော်ဆောင်ထားရတဲ့ နိုင်ငံရေးအခြေအနေတွေပျက်စီးရပြီး ညီနောင် မဟာမိတ်ဆက်ဆံရေးကို ထိခိုက်စေတယ်လို့ MNDAA ရဲ့ ထုတ်ပြန်ချက်မှာ ထည့်ပြောပါတယ်။

   TNLA ကတော့ ညီနောင်မဟာမိတ်ဆက်ဆံရေးဆက်ရှိနေတယ်လို့ ဒီနေ့ မတ် ၁၉ ရက်မှာ ဘီဘီစီကို ဖြေကြားပါတယ်။

   MNDAA၊ TNLA နဲ့ အာရက္ခတပ်တော် (AA) တို့ပါဝင်တဲ့ မြောက်ပိုင်းညီနောင်သုံးဖွဲ့ဟာ ၂၀၂၃ ခုနှစ်၊ အောက်တိုဘာ ၂၇ ရက်မှာ ရှမ်းပြည်နယ်မြောက်ပိုင်းမှာ ၁၀၂၇ စစ်ဆင်ရေးကို အကောင်အထည်‌ ဖော်ခဲ့ပြီး အဲဒီစစ်ဆင်ရေးဟာ စစ်တပ်ရဲ့ တိုင်းစစ်ဌာနချုပ်တစ်ခုလုံးကျဆုံးတဲ့အထိ ဦးတည်စေခဲ့ပါတယ်။

   ကွတ်ခိုင် - မဟာမိတ်မှ တိုက်ပွဲသို့

   တရုတ်လက်ချက်လို့ ပုံဖော်ခံရတဲ့ ရှမ်းမြောက်က မဟာမိတ်နှစ်ဖွဲ့ ပဋိပက္ခ

4. လွန်ခဲ့သော ၂ နာရီ ကမြန်မာအီလက်ထရောနစ် ပတ်စ်ပို့ - ပြည်ပထွက်ခွာသွားလာခွင့်ကို ထိန်းချုပ်မယ့်ဥပဒေသစ်လား

   

   အာဏာသိမ်းစစ်တပ်ရဲ့ အမျိုးသားကာကွယ်ရေးနှင့် လုံခြုံရေးကောင်စီ(ကာလုံ) က အခန်း (၈) ခန်းပါဝင်တဲ့ အီလက်ထရောနစ်ပတ်စ်ပို့ - မြန်မာနိုင်ငံကူးလက်မှတ်ဆိုင်ရာဥပဒေသစ်ကို ပြဋ္ဌာန်းလိုက်ပါတယ်။

   စစ်တပ်ဦးစီးတဲ့ ၂၀၂၅ ရွေးကောက်ပွဲအပြီးပေါ်ထွက်လာတဲ့ လွှတ်တော်နဲ့ အစိုးရသစ်ဖွဲ့စည်းဖို့ ရက်ပိုင်းအလိုမှာ ပေါ်ထွက်လာတဲ့ ဒီဥပဒေက လူထုရဲ့ နိုင်ငံရပ်ခြားထွက်ခွာခွင့်နဲ့ သွားလာခွင့်တွေအပေါ် သက်ရောက်မှုရှိလာမယ်လို့ လူ့အခွင့်အရေးနဲ့ ဥပဒေကြောင်းဆိုင်ရာ နားလည်တတ်ကျွမ်းသူတွေက သုံးသပ်ကြပါတယ်။

   လက်ရှိမြန်မာနိုင်ငံတွင်းက နိုင်ငံရေးနဲ့ လုံခြုံရေးအခြေအနေတွေကြားမှာ ဒီဥပဒေကို ထုတ်ပြန်ခြင်းအပေါ် တင်းကျပ်မှုတစ်ခုအဖြစ် ရှုမြင်မှုတွေရှိသလို ပိုပြီး စနစ်ကျတဲ့ နိုင်ငံကူးလက်မှတ်ပေါ် ပေါက်လာမယ်ဆိုတဲ့ အမြင်တွေလည်းရှိနေပါတယ်။

   အထူးသဖြင့် ပြည်ပထွက်ခွာလိုသူတွေနဲ့ ပြည်ပထွက်ခွာအလုပ်လုပ်ကိုင်လိုသူတွေအတွက် အကျိုးအပြစ်တွေရှိလာနိုင်တယ်လို့ နည်းပညာလွတ်လပ်ခွင့် တက်ကြွလှုပ်ရှားသူတချို့က ဝေဖန်ထားပါတယ်။

   အပြည့်အစုံကို ဒီလင့်ခ် မှာ ဝင်ဖတ်နိုင်ပါတယ်။

5. လွန်ခဲ့သော ၃ နာရီ ကထိုင်းနဲ့ မြန်မာစစ်တပ်တို့ နယ်စပ်အရေးနဲ့ စစ်တပ်တွေ ပူးပေါင်းရေးဆွေးနွေး

   

   ဓာတ်ပုံ ရင်းမြစ်, Royal Thai Armed Forces Headquarters

   နေပြည်တော်ကိုရောက်လာတဲ့ ထိုင်းစစ်တပ်ရဲ့ ပူးတွဲစစ်ဦးစီးချုပ် ဗိုလ်ချုပ် Chitchanok Nujjaya နဲ့ အဖွဲ့ကို စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က လက်ခံတွေ့ဆုံပြီး နှစ်နိုင်ငံနယ်စပ်တည်ငြိမ်ရေးကို အဓိက ဦးစားပေးလုပ်ဖို့ ဆွေးနွေးခဲ့တယ်လို့ နေပြည်တော်ဘက်ကရော ထိုင်းစစ်တပ်ကပါ သတင်းထုတ်ပါတယ်။

   နယ်စပ်က တိုက်ပွဲ၊ စစ်တပ်နဲ့ တော်လှန်ရေးအဖွဲ့တွေရဲ့ နယ်မြေထိန်းချုပ်မှုကိစ္စရပ်တွေကြောင့် ထိုင်းဘတ်ငွေ သန်းရာချီစီးဆင်းတဲ့ ထိုင်း- မြန်မာ နယ်စပ်နှစ်နိုင်ငံ ကုန်းလမ်းကုန်သွယ်ရေး ရပ်တန့်ထားရတာ နှစ်ပေါက်လာချိန်မှာ နယ်စပ်လုံခြုံရေးနဲ့ ကုန်သွယ်ရေးကိစ္စကို နှစ်ဖက်စလုံးက ပြောလာတာဖြစ်ပါတယ်။

   မနေ့ မတ် ၁၈ ရက်တွေ့ဆုံမှုမှာ နှစ်ဖက်စစ်တပ်အဆင့်မြင့်အရာရှိကြီးတွေ အစည်းအဝေး (HLC) ကျင်းပမယ့်အပြင် စစ်ရေးပူးတွဲ လေ့ကျင့်ရေးလည်း ဆွေးနွေးခဲ့တယ်လို့ သိရပါတယ်။ အစည်းအဝေးကျင်းပမယ့်ကာလနဲ့ နေရာကိုတော့ နှစ်ဖက်စစ်တပ်ရဲ့ထုတ်ပြန်ချက်တွေမှာ ထည့်သွင်းပြောထားတာမတွေ့ရပါဘူး။

   နယ်စပ် လုံခြုံရေးကိစ္စရပ်တွေကိုလည်း အလေးပေးဆွေးနွေးခဲ့ကြတယ်လို့ ထိုင်းစစ်တပ် ကလည်း သတင်းထုတ်ပြန်ထားပါတယ်။

   နယ်စပ်ကုန်သွယ်ရေး၊ နယ်စပ်ဒေသကတဆင့် တရားမဝင်ကုန်သွယ်မှုတွေမရှိစေရေး၊ မူးယစ်ဆေးဝါးတားဆီးနှိမ်နင်းရေး၊ နယ်စပ်ဖြတ်ကျော် မီးခိုးငွေ့ညစ်ညမ်းမှုတွေကို လျှော့ချရေးတွေအပါအဝင် အွန်လိုင်းငွေလိမ် လုပ်ငန်းတွေကို ထိရောက်အောင်ဟန့်တားနိုင်ရေး ဆွေးနွေးတယ်လို့ ဖော်ပြထားပါတယ်။

   ထိုင်းဘုရင့်တပ်မတော်ကာကွယ်ရေးဦးစီးချုပ်နဲ့အတူ ပူးတွဲစစ်ဦးစီးချုပ်အဖြစ် တာဝန်ယူထားတဲ့ ထိုင်းဗိုလ်ချုပ်နဲ့ အဖွဲ့ကိုတွေ့ဆုံရာမှာ စစ်ခေါင်းဆောင်အပြင် ဒုစစ်ခေါင်းဆောင် ဒုတိယဗိုလ်ချုပ်မှူးကြီး စိုးဝင်း၊ ကာကွယ်ရေးဦးစီးချုပ် (ကြည်း) ဗိုလ်ချုပ်ကြီး ရဲဝင်းဦးနဲ့ ညှိနှိုင်းကွပ်ကဲရေးမှူး (ကြည်း၊ ရေ၊ လေ) ဗိုလ်ချုပ်ကြီး ကျော်စွာလင်းတို့ပါ တွေ့ဆုံခဲ့ကြပါတယ်။

   ထိုင်းစစ်တပ် ထိပ်ပိုင်းခေါင်းဆောင်တွေနဲ့တွေ့ဆုံပွဲကို စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်နဲ့အတူ တက်ရောက်ခဲ့တဲ့ ဒီဗိုလ်ချုပ်ကြီးတွေဟာ လာမယ့်သီတင်းပတ်တွေအတွင်း နေပြည်တော်က နိုင်ငံရေးအချိုးအကွေ့မှာ မြန်မာစစ်တပ်ရဲ့ ထိပ်ပိုင်းတာဝန်တွေကို ရလာနိုင်ကြောင်း ရေပန်းစားနေသူတွေလည်းဖြစ်ပါတယ်။

   ဒါအပြင် မြန်မာစစ်တပ်ကဦးဆောင်ကျင်းပခဲ့တဲ့ ရွေးကောက်ပွဲအောင်မြင်စွာကျင်းပနိုင်ခဲ့တာနဲ့ ပတ်သက်ပြီးလည်း ထိုင်းကဝမ်းသာကြောင်းထည့်ပြောခဲ့တယ်လို့ ထိုင်းစစ်တပ်ကပါထုတ်ပြန်သလို လွှတ်တော်ခေါ်ယူတဲ့အခြေအနေကိုလည်း ပြောခဲ့ကြတယ်လို့ ဒီနေ့ထုတ်သတင်းစာမှာ ဖော်ပြပါတယ်။

   အာဆီယံထဲ မြန်မာ ပြန် ဝင်ဆံ့လာမလား

   ဘန်ဒေါင်း၊ လွတ်လပ်တက်ကြွတဲ့ ဘက်မလိုက် နိုင်ငံခြားရေးနဲ့ မြန်မာအစိုးရများ

6. လွန်ခဲ့သော ၃ နာရီ က

   မင်္ဂလာပါ။ မတ် ၁၉ ရက် ဘီဘီစီသတင်းများ တိုက်ရိုက်တင်ဆက်မှု စတင်ပြီဖြစ်ပါတယ်။ နိုင်ငံတဝန်းနောက်ဆုံးရ သတင်းများကို တိုက်ရိုက်ထုတ်လွှင့်ချက်မှာ အချိန်နဲ့ တပြေးညီ ဖတ်ရှုနိုင်ပါတယ်။