Dysgu Cymraeg er mwyn cyfieithu'r Quran

Un o resymau Laura Jones o Gaerdydd dros ddysgu Cymraeg oedd er mwyn gallu cyfieithu testunau Islamaidd i'r Gymraeg.

Wedi ei geni a'i magu yn y brifddinas, lle'r aeth i ysgol Saesneg, roedd hi eisiau i'w ffydd Fwslimaidd fod yn rhan o'r sgwrs Gymraeg.

Er iddi astudio Cymraeg ar gyfer TGAU yn yr ysgol, aeth ati i ail-ddysgu eto fel oedolyn yn 2016.

"Un rheswm oedd i wella fy ngyrfa, i wella fy ngyfleoedd gwaith, ond y rheswm arall oedd, o'n i eisiau cyfieithu pethau Islamaidd i Gymraeg," meddai.

"Achos 'mod i'n Fwslim o'n i eisiau trio dod a Islam i'r iaith Gymraeg."

Un ffordd o wneud hynny oedd yn bwysig iddi oedd gallu mynd ar y radio i siarad am Islam yn Gymraeg.

"Ond un peth arall oedd i gyfieithu pethau fel darnau o'r Quran, neu ddywediadau'r proffwyd Muhammad i'r Gymraeg hefyd.

"Pan o'n i'n gweithio i Gyngor Mwslimiaid Cymru dwi wedi dechra gwneud rhai pethau fel hyn.

"Achos does dim cyfieithiad llawn o'r Quran yn Gymraeg felly hwn oedd y peth o'n i eisiau bod yn rhan ohono."

Pam nad oes cyfieithiad llawn wedi bod o'r blaen?

"Dwi ddim yn siŵr, achos wrth gwrs mae'r Quran wedi cael ei gyfieithu i mewn i gannoedd o ieithoedd ar draws y byd ond efallai bod dim digon o Fwslimiaid eto [yng Nghymru] i fod eisiau cyfieithu'r Quran i'r Gymraeg?

"Ond dwi meddwl nawr, bod lot mwy o Fwslimiaid yn siarad Cymraeg, yn mynd i ysgol Gymraeg neu bethau fel hyn, so dwi'n meddwl bod hwn yn amser da i wneud gwaith fel hyn."

Mae Laura hefyd wedi hyfforddi fel Caplan Mwslimaidd ac mae ganddi radd uwch ar y testun Islam ym Mhrydain Gyfoes; yn ei gwaith ymchwil daeth o hyd i gyfeiriadau at Fwslimiaeth ym Mhrydain yn gysylltiedig â'r Brenin Offa, dolen allanol yn yr wythfed ganrif.

Mae hefyd wedi ymchwilio i brofiadau pobl yn ystod Ramadan ar gyfer doethuriaeth ym Mhrifysgol Caerdydd.

Roedd hi'n siarad ar raglen Aled Hughes ar Radio Cymru fel rhan o Wythnos Dathlu Dysgu Cymraeg flynyddol yr orsaf rhwng 15-22 Hydref.

Wnaeth dysgu'r iaith agor drysau mewn ffyrdd eraill iddi?

"Dwi meddwl ar ôl i fi ddysgu Cymraeg dwi wedi ffeindio rhai cymunedau a grwpiau Cymraeg felly falle mod i wedi cysylltu gyda mwy o bobl nag o'n i cyn i fi ddysgu Cymraeg," meddai.

"Ro'n i'n gweithio fel enghraifft i siop lyfrau Gymraeg Cant a Mil yng Nghaerdydd am sbel felly wedi ffeindio ffrindiau yna a ffrindiau [eraill] sy'n siarad Cymraeg hefyd."

Mae Laura yn fam i fachgen tair blwydd oed bellach sydd yn mynd i feithrinfa Gymraeg yng Nghaerdydd.

Er mai Saesneg yw iaith y teulu mae hi'n ceisio gofyn cwestiynau yn Gymraeg iddo nawr ac yn y man a'i annog i ddefnyddio'r iaith, ac mae yntau'n aml yn dod adref o'r ysgol yn canu cân Gymraeg.

A'i hoff gân?

"Dau Gi Bach dwi'n meddwl!"