Symud i Awstralia i ddechrau swydd gyda thîm seiclo'r wlad

Mae gŵr o ogledd Cymru ar ei ffordd i Adelaide i helpu tîm seiclo Awstralia baratoi at y Gemau Olympaidd fydd yn cael eu cynnal yno yn 2032.

Mae'n uchafbwynt gyrfa i'r dyn 29 oed o Wynedd sydd wedi gwirioni gyda'r gamp ers yn blentyn ac wedi magu profiad yn y maes dadansoddi perfformiad dros y blynyddoedd diwethaf.

Ac er ei fod yn gam mawr i symud i ochr arall y byd, mae'n dweud bod helpu tîm i geisio ennill medalau mewn Gemau Olympaidd ar eu tomen eu hunain yn gyfle rhy dda i'w golli.

Fe ddechreuodd diddordeb Rhys Llywelyn mewn seiclo pan oedd o yn Ysgol Gwaun Gynfi, Deiniolen - yr un ysgol gynradd ag un o ffigurau amlyca'r byd beicio, Syr David Brailsford.

Roedd Rhys yn edmygu ac yn dilyn enwogion y gamp a dechreuodd y teulu fynd ar wyliau i Wlad Belg i wylio rasys y Ronde van Vlaanderen (Tour of Flanders) ac i Ffrainc i wylio'r Paris-Roubaix a Tour de France.

Wedi iddo fynd i Ysgol Brynrefail fe ddechreuodd deithio o gwmpas rasys triathlon gyda'i frawd mawr Owain.

"Roedd o'n gwneud triathlons a ro'n i'n mynd o gwmpas y rasys efo fo a Mam a Dad ac isio bod fel y brawd mawr a copïo be' oedd o'n 'neud," meddai wrth Cymru Fyw.

"O'n i'n hoples yn nofio ac felly bob tro yn y cefn felly nesh i newid sport i redeg.

"Ond o'n i'n obsessed efo seiclo pan o'n i'n fach. Do'n i'm yn rasio beics ond o'n i'n mynd lot i feicio - jest enjoio mynd."

Aeth i'r brifysgol yng Nghaerdydd i astudio dadansoddi perfformiad chwaraeon. Yn ei drydedd flwyddyn fe anwybyddodd gyngor i wneud ei draethawd estynedig ar bêl-droed neu rygbi a chanolbwyntio ar seiclo.

Ar ôl graddio yn 2018 fe gafodd swydd gyda Beicio Cymru - lle'r oedd o wedi bod yn gweithio rhan amser tra'n fyfyriwr - fel swyddog digwyddiadau.

Ond wedi tair blynedd yn trefnu ac yn helpu mewn rasys a digwyddiadau beicio ar draws Cymru fe gafodd swydd gyda British Cycling yn dadansoddi data.

Felly fe symudodd i'w pencadlys ym Manceinion lle'r oedd yn gweithio gyda sêr y byd seiclo, fel Jason Kenny, sydd bellach wedi ennill saith medal aur a dwy fedal arian yn y Gemau Olympaidd.

Meddai Rhys: "O'n i'n star-struck i gychwyn efo ond fel ma' amser yn mynd ti'n sylwi bod nhw jyst yn berson fel chdi a fi sydd efo talent da.

"Dydd i ddydd, y gwaith ydi edrych ar be' maen nhw wedi ei wneud o ran perfformiad wrth ymarfer. Ti'n edrych ar bethau gwahanol fel pŵer a cadence - pa mor sydyn maen nhw'n troi'r pedal - bob dim maen nhw wedi 'neud.

"Dwi hefyd yn edrych ar footage ohonyn nhw'n mynd rownd y trac i weld os oes unrhyw beth allwn ni wneud i wella perfformiad."

Mae teithio yn rhan fawr o'r swydd a Rhys wedi cael y cyfle i fynd i nifer o wledydd Ewrop a thu hwnt - gan gynnwys Canada, yr Aifft, Chile ac Awstralia.

"Do'n i'm yn gwybod os oedd teithio yn rhan o'r swydd i gychwyn - os oedden nhw eisiau pobl oedd yn gwneud fy swydd i i deithio efo'r athletwyr - ond mae 'na lot o deithio a dyna un o rannau gorau'r swydd," meddai.

"Helpu athletwyr i wneud eu gorau ydi'r job, be' bynnag ydi hynny - os ydyn nhw'n ennill neu beidio a lle bynnag maen nhw. Felly 'da ni yna i'w helpu nhw yn y rasys a gweld lle mae gwledydd eraill arni a sut yda ni'n cymharu."

Mae'r byd seiclo yn un bychan, meddai, gyda phawb yn adnabod pawb. Fis Hydref diwethaf fe gafodd ei annog gan bennaeth tîm seiclo Awstralia - sy'n dod o Fanceinion - i geisio am swydd oedd ar fin cael ei hysbysebu.

Er ei fod yn mwynhau ei waith gyda British Cycling ac wedi prynu tŷ yn ardal Manceinion gyda'i bartner roedd y swydd yn apelio.

Meddai: "Nesh i feddwl waeth i fi drio amdani, mae'n beth da dangos diddordeb - ac alla i bob tro ddeud na. A do'n i ddim yn meddwl baswn i'n cael cynnig y swydd - ond mi nesh i.

"Nesh i siarad efo fy rheini a fy mhartner a ffrindiau ac roedd pawb yn deud 'go for it' - tydi'r cyfleoedd yma ddim yn dod fyny yn aml, yn enwedig efo Awstralia'n paratoi at Gemau Olympaidd 2032 yn Melbourne.

"Fydd o'n grêt gallu bod yn rhan o hynny. Mae o hefyd yn rhywbeth i'w roi ar fy CV os ydw i isio job yn rhywle arall rhywbryd.

"Mae'r job union 'run fath â be' dwi'n 'neud rŵan ond fydda i'n gweithio efo'r tîm trac endurance, dim sprint.

"Dwi'n nabod eitha' lot o'r tîm yn barod. I fi mae'r bobl dwi'n gweithio efo nhw yn bwysig iawn ac roedd 'nabod nhw, a gwybod bod nhw'n bobl iawn, yn help i fi wneud y penderfyniad i fynd amdani."

Felly'r bwriad ydi symud yno ddiwedd Mawrth, gyda'i bartner yn ymuno ag o ymhen blwyddyn.

Meddai: "Dwi a fy mhartner yn 30 blwyddyn nesa ac roedda ni wedi sôn am fynd i deithio i Awstralia a Seland Newydd i ddathlu - ond rwan fydda i'n byw yna.

"Faswn i'n licio aros tan o leia'r Gemau Olympaidd yn 2032, ac wedyn... pwy a ŵyr."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.