Lluniau: Gyrfa Aaron Ramsey
- Cyhoeddwyd
Fe ddaeth y cyhoeddiad bore Dydd Mawrth, 7 Ebrill, bod Aaron Ramsey yn ymddeol o bêl-droed.
Enillodd Ramsey 86 cap dros Gymru, gan sgorio 21 gôl. Mae'n cael ei gydnabod fel un o chwaraewyr gorau Cymru erioed, ac roedd gyda chlwb Arsenal am dros ddegawd.
Felly, dyma olwg o rai o brif ddigwyddiadau gyrfa ddisglair y bachgen o Gaerffili.
Daeth doniau Aaron Ramsey i'r amlwg yn gynnar tra roedd yn chwarae pêl-droed gyda'r Urdd, ac yna daeth cynnig i ymuno â Chaerdydd
Chwaraeodd Ramsey ei gêm gyntaf dros yr Adar Gleision ar 28 Ebrill, 2007, yn erbyn Hull City. Ef oedd y chwaraewr ieuengaf erioed i chwarae dros y clwb ar y pryd, yn 16 mlwydd ac 124 diwrnod oed
Ar 17 Mai, 2008, fe chwaraeodd Ramsey yn rownd derfynol Cwpan FA Lloegr. Ond colli fu hanes yr Adar Gleision, 1-0 yn erbyn Portsmouth
Arwyddodd Aaron Ramsey dros gewri gogledd Llundain, Arsenal, ar 13 Mehefin, 2008
Daeth ei gôl gyntaf dros y clwb yn erbyn Fenerbahçe yng Nghynghrair y Pencampwyr yn Istanbul ar 21 Hydref, 2008
Daeth y cap rhyngwladol cyntaf mewn gêm gyfeillgar yn erbyn Denmarc yn Stadiwm Brøndby, Copenhagen. Enillodd Cymru'r gêm, diolch i gôl gan reolwr presennol Cymru, Craig Bellamy
Yn nhymor 2010-11 chwaraeodd bum gêm ar fenthyg gyda Nottingham Forrest, cyn mynd nôl i Gaerdydd ar fenthyg, ble chwaraeodd chwe gêm
Yn dilyn anaf cas iawn wedi tacl gan Ryan Shawcross mewn gêm yn erbyn Stoke City yn 2010 roedd llawer yn ofni na fyddai Ramsey'n dod 'nôl yn cystal chwaraewr.
Ond wedi cyfnod hir yn gwella o lawdriniaeth daeth ei safon i'r amlwg unwaith eto, er mawr ryddhad i gefnogwyr Arsenal a Chymru
Yn 20 oed cafodd ei benodi'n gapten ar y tîm cenedlaethol gan Gary Speed, gan arwain y garfan yn erbyn Lloegr yng Nghaerdydd ar 26 Mawrth, 2011
Yn ystod ei yrfa fe chwaraeodd Ramsey gyda rhai o fawrion y gêm, gan gynnwys Thierry Henry - yma ym Maes Awyr Luton ar y ffordd i chwarae AC Milan yn 2012
Yn dathlu sgorio'r gôl fuddugol yn erbyn Hull City yn ffeinal Cwpan FA Lloegr, 17 Mai, 2014
Yn codi tlws yr FA o flaen y cefnogwyr gyda golwr Arsenal, Wojciech Szczesny, 18 Mai, 2014
Yn dathlu sgorio gôl arbennig yn erbyn Galatasaray yn Istanbul, 9 Rhagfyr, 2014
Yn dilyn rhediad bythgofiadwy Cymru yn Euro 2016, cafodd Ramsey ei enwi yn 'nhîm y bencampwriaeth' gan UEFA, ynghyd â Chymro arall, Joe Allen
Yn dathlu ennill ei drydedd Gwpan FA yn 2017. Fe sgoriodd y gôl fuddugol mewn dwy ffeinal - yn erbyn Hull City yn 2014 ac yn erbyn Chelsea yn 2017
Carreg filltir arall - ei hatric gyntaf, yn erbyn Everton ar 3 Chwefror, 2018
Yn haf 2019 fe arwyddodd dros y cewri Eidalaidd, Juventus
Ar y ffordd i gyrraedd Euro 2020 Ramsey oedd seren y gêm yn y fuddugoliaeth yn erbyn Hwngari yng Nghaerdydd, gan sgorio'r ddwy gôl yn y fuddugoliaeth 2-0
Roedd Ramsey gyda Juventus am dri thymor, gan fynd ar fenthyg i Rangers am y mwyafrif o'i drydedd flwyddyn gyda'r clwb.
Ond gyda'i amser gyda Juve fe enillodd bencampwriaeth Serie A, Coppa Italia a'r Supercoppa Italiana
Roedd ei gyfnod gyda Glasgow Rangers yn eitha' siomedig, ac roedd yn gyfnod rhwystredig iddo gydag anafiadau
Roedd Ramsey'n rhan o ganol-cae Cymru wrth i'r wlad fynd i Gwpan y Byd am y tro cyntaf mewn 64 mlynedd yn 2022
Bale a Ramsey, y bartneriaeth arbennig i Gymru am dros ddegawd
Yn cael ei ddilyn gan Lionel Messi tra'n chwarae dros OGC Nice yn 2022-23
Dychwelyd i ble gychwynnodd y cyfan. Rhwng 2023 ac 2025 roedd Ramsey yn ôl gyda'r Adar Gleision, ble chwaraeodd 23 gêm yn unig oherwydd anafiadau
Y cap olaf - buddugoliaeth oddi cartref yn erbyn Montenegro yn Niksic ar 9 Medi, 2024
Yn 2025 fe gymrodd Ramsey yr awenau gyda Chaerdydd am gyfnod yn dilyn ymddiswyddiad Omer Riza
Ar 1 Gorffennaf, 2025, arwyddodd dros glwb Pumas UNAM yn Coyoacán, Dinas Mecsico. Eto fe wnaeth anafiadau amharu ar ei berfformiadau, a dim ond chwe gwaith y gwnaeth chwarae i'r clwb
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.
Hefyd o ddiddordeb:
- Cyhoeddwyd3 awr yn ôl
- Cyhoeddwyd19 Ebrill 2025
