Comhairlichean a' tadhal air Fàn Eilean

Tha comhairlichean Gàidhealach gus tadhal an-diugh air làrach leasachaidh chonnspaidich faisg air a' Mhanachainn, an dèidh mar a chaidh ùine a bharrachd a thoirt dhaibh co-dhùnadh air cead-dealbhachaidh dha.

B' fheudar turas ris an robh dùil air an 8mh là den Fhaoilleach a chur dheth ri linn an t-sneachda.

Tha a' chompanaidh chumhachd SSEN ag iarraidh fo-stèisean mòr 400kV a thogail air còrr is 850 àcair de thalamh-àitich aig Fàn Eilean, ri taobh Abhainn na Manachainn, airson dealan à leasachaidhean ath-nuadhachail aig tuath a chur ris a' ghriod nàiseanta 's air falbh gu deas.

Dh'aontaich iad ùine a bharrachd a thoirt do chomhairlichean ri linn suidheachadh an t-sneachda.

Tha connspaid mhòr sa choimhearsnachd mun phlana.

Tha dùil gun nochd a' chùis air beulaibh comataidh dealbhachaidh a' chinn a deas a--rithist air a' 5mh là den Ghearran.