Neach a bha steigte an uamh an Cataibh air an saoradh

Rinneadh cobhair air neach a bha glacte ann an lìonra de dh'uamhan ann an iar-thuath na Gàidhealtachd.

Chaidh Sgioba-Teasairginn Bheanntan Asainte, a bhios air an trèanadh airson daoine a thoirt a-mach à uamhan, a ghairm don uamh aig Allt nan Uamh na bu tràithe air an t-seachdain seo.

Tha grunn uamhan san sgìre timcheall air Innis nan Damh, nam measg Uamhan nan Cnàmh far an d'fhuaireadh fianais de bheathaichean ro-eachdraidheil san àm a dh'fhalbh.

Thuirt an luchd-teasairginn gun robh an neach air a dheagh uidheamachadh ach feumach air taic airson faighinn gu uachdar na talmhainn a-rithist.

Thachair e gun robh ball de Chomann Cobhair Uamhan na h-Alba san sgìre aig an àm agus chuidich iadsan leis a' phlana chobhair a' cleachdadh fàradh sùbailte agus ròpannan.

Thuirt an luchd-teasairginn gun deach an neach a bh' anns an uamh a thoirt a-mach aiste gu sàbhailte.

Thuirt iad gum feum daoine a tha am beachd a dhol a-steach do shiostam uamhan a bhith deiseil airson dèiligeadh ris an fhuachd agus làrach a dh'fhaodadh a bhith gu math iomallach.

Dh'iarr iad air daoine sùil a thoirt mus falbh iad feuch dè an t-sìde a bhios ann, agus gun a dhol siòs uamh leotha fhèin.

Chaidh na h-uamhan ann an Innis nan Damh a chruthachadh 200,000 bliadhna mus tug an linn deighe mu dheireadh cruth-atharrachadh air cruth na tìre bho chionn mu 15,000 bliadhna.