تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د عمران خان روغتیا په اړه اندېښنې: ملاتړو یې بېلابېلو ښارونو کې د احتجاجونو غږ کړی
پاکستان کې د پخواني لومړي وزیر عمران خان تحریک انصاف ګوند پر خپلو غړو او پلویانو د دغه هېواد بېلابېلو ښارونو کې د احتجاجونو غږ کړی دی.
پيټيای پر خپله رسمي اېکس پاڼه لیکلي، چې د دغو احتجاجونو غوښتنه د عمران خان روغتیا په تړاو د اندېښنو له کبله شوې ده.
۷۳ کلن عمران خان چې په اډیاله زندان کې د بند شپې سبا کوي، په دې وروستیو کې شکایت کړی او ادعا کوي چې له درملنې سره سره یې د ښي سترګې یوازې "۱۵ سلنه" لید پاتې دی.
د پاکستان سترې محکمې د هغه تر دغه شکایت وروسته مرکزي حکومت ته امر کړی، چې تر دوشنبې (فبرورۍ ۱۶مې) پورې د عمران خان سترګې د متخصصو ډاکترانو په وسیله معاینه کړي.
د پيټيای پر اېکس پاڼه لیکل شوي، چې د دغه ګوند غړي او ملاتړي به نن د پلازمېنې اسلام اباد د ګاونډي ښار راولپنډۍ په فیض اباد کې سره راټول شي.
لاهور کې د مال روډ په جيپياو چوک او کراچۍ کې ماښام مهال د ګلستان جوهر ملینیم مال کې د راټولېدو ویل شوي دي.
د پاکستان د وکیلانو ټولنې هم د عمران د روغتیا په اړه اندېښنه ښودلې.
د دې ټولنې لخوا خپرې شوې اعلامیه کې راغلي، د عمران خان ناروغي "د حکومت، په ځانګړې توګه د زندان د مشر د ناغېړۍ له کبله ده، چې له اړوندو چارواکو یا د پخواني لومړي وزیر له کورنۍ سره یې [په دې تړاو] خبرې نه دي کړې."
په خیبرپښتونخوا کې بیا، چې د عمران خان ګوند پکې واکمن دی، وار له مخه دوو سیمو کې احتجاجي جلسې پیل شوې دي.
دغه ایالت لپاره د پيټيای مرستیال مشر اکرام کهتانه بيبيسي ته ویلي، چې دغه احتجاجونو صوابۍ کې پر موټروې ایمیو او ډېره اسماعیل کې بهکر پله ته نږدې د خیبرپښتونخوا او پنجاب پر نښلونکي سړک روان دی.
هغه زیاته کړې چې پر هزاره موټروې هم خلک د احتجاج پیلولو ته تیاری نیسي.
له دغو احتجاجونو سره هممهاله د خیبرپښتونخوا مشر وزیر سهیل اپريدي ویلي، چې ده ته "عمران خان تر سیاست لوړ دی" او چا ته به اجازه ورنه کړي چې د نوموړي پر روغتیا سیاست وکړي.
سهیل اپریدي پر خپله ایکس پاڼه لیکلي، عمران خان "معمولي" شخص نه دی.
"د هغه پر روغتیا ملنډې وهل شوې، چې د بخښلو نه دي. دمګړۍ، د هغه غوره درملنه زموږ لومړیتوب دی. تر هغې چې د عمران درملنه نه وي شوې، څوک دې هېڅکله دا فکر نه کوي، چې زه به ارام کښېنم."
د یادونې ده چې عمران خان سره د هغه ښځه بشرا بيبي هم زنداني ده.
د عمران خان کورنۍ او د ګوند غړي ادعا کوي، چې هغه او ښځه یې په زندان کې په ډېرو سختو شرایطو کې ساتل کېږي.
دوی دواړو ته د تېر ډسمبر وروستیو کې د یوې محکمې لخوا د دولتي ډالیو (توشهخانې) دویمه قضیه کې د ۱۷-۱۷ کاله زندان نوره سزا واورول شوه.
د پاکستان په څو ښارونو کې تېره ورځ هم د پخواني لومړي وزیر په ملاتړ ځینې کوچنۍ غونډې شوې وې.
د تحریک انصاف ګوند د ښځو له څانګې سرینا خان پرون کراچۍ ښار کې د احتجاجي غونډې په څنډه کې رویټرز خبري اژانس ته ویلي و، د درملنې ردول او زنداني مشر لپاره د رضایت ناسمه فورمه، د حکومت لخوا رامنځته شوې خطرناکې بېلګې دي.