تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
جعلي سعودي شاهزاده د ۸ میلیونو ډالرو ټګۍ برګۍ له کبله زنداني شو
انتوني ګیګناک تر کلونو پورې شاهزادګانو ته ورته ژوند کاوه. ده به ګران بیه ساعتونه او ګاڼه استعمالول، په شخصي جیټ الوتکو کې به یې سفر کاوه، د سفارتي نمبر پلیټونو ګاډي به یې ګرځول او پر شخصي کارت به یې د ځان لپاره د 'سلطان ' لقب لیکلی و.
خو د دغه تش په نامه شاهزاده دروغ بالاخره د جمعې پر ورځ رسوا شول چې د امریکا فلوریډا یوې محکمې له بېلا بېلو پانګوالو د ټګۍ برګۍ له لارې د اته میلیونه امریکايي ډالرو تروړلو په جرم په ۱۸ کلن زندان سزا محکوم کړ.
فلوریډا څارنواله فجاردو ورشان وايي:
''انتوني ګیګناک نژدې درې لسیزې خلکو ته د دې لپاره ځان د سعودي شاهزاده په حیث ورپېژانده چې د نړۍ لر او بر کې له بې شمېر پانګوالو د ټګۍ برګۍ له لارې پېسې تر لاسه کړي. ''
ګیګناک په کولمبیا کې زېږېدلی و او د امریکا مشي ګن ایالت یوې کورنۍ له اووه کلنۍ راهیسې پاله.
ویل کېږي نوموړي له ۱۷ کلنۍ راهیسې ځان دکاندارانو، کریډټ کارت کمپنیو او پانګه والو د سعودي شاهي کورنۍ د یوه غړي په توګه ورپېژانده.
د محکمې اسناد ښيي نوموړی تېرو دریو لسیزو کې ۱۱ ځله د شاهزاده جعلي شخصیت له لارې د ټګۍ برګۍ قضیو کې نیول شوی دی.
د څارنوالۍ چارواکو په وینا نوموړي تر ۲۰۱۵ کال پورې د شاهزاده 'خالد ابن عبدالعزیز ' په نامه خلک لوټل، جعلي دیپلوماتیک نمبر پلیټونه یې اخیستل، دودیز سعودي کالي یې اغوستل او ګران بیه لاسي ساعتونه یې کاروول.
چارواکي وايي، نوموړي به له پانګه والو سره د لیدو پر مهال د شاهی پروټوکول او ډالیو غوښتنه کوله او دغه راز به یې په داسې پروژو کې پانګونې ته بلل چې له سره یې شتون نه درلود.
چارواکي وايي، د ۲۰۱۷ کال په مې کې د نوموړي په اړه هغه مهال شکونه راپیدا شول چې میامي کې یې د یوه هوټل رانیولو پر مهال د خنزیز غوښې خوړلو غوښتنه وکړه.
د میامي هیرالډ رپوټ کې ویل شوي، د پلورل کېدونکي هوټل څښتنان سملاسي پوه شول چې دغه ډول غوښه خوړل د یوه مسلمان شهزاده د کولو چاره نه ده او دوی د معلوماتو لپاره د یوه شخصي امنیتي شرکت خدمتونه تر لاسه کړل چې وروسته خبره د فدرالي حکومت تر څېړنې ورسېده.
نوموړي د سږ کال لومړیو کې اعراف وکړ او د جمعې ورځې له پرېکړې وروسته اغلې ورشان وویل:
''په دغه پرېکړه کې د زیانمن شویو غږ شامل دی. ''