'ਜੋ ਅਸੰਭਵ ਲੱਗੇ ਉਸ ਨੂੰ ਟੀਚਾ ਬਣਾਉਣਾ ਹੀ ਪ੍ਰਾਪਤੀ ਦਾ ਮੂਲ ਮੰਤਰ'

ਜ਼ਿਲ੍ਹਾ ਬਰਨਾਲਾ ਦੇ ਪਿੰਡ ਵਜੀਦਕੇ ਖੁਰਦ ਦੀ ਰਹਿਣ ਵਾਲੀ ਤਰਨਪ੍ਰੀਤ ਕੌਰ ਨੇ ਸੀਬੀਐੱਸਸੀ ਦੇ ਦਸਵੀਂ ਦੇ ਇਮਤਿਹਾਨ 'ਚ ਪੂਰੇ ਭਾਰਤ ਵਿੱਚੋਂ ਤੀਜਾ ਸਥਾਨ ਹਾਸਲ ਕੀਤਾ।

ਬਰੌਡਵੇਅ ਪਬਲਿਕ ਸਕੂਲ ਮਨਾਲ ਦੀ ਇਸ ਵਿਦਿਆਰਥਣ ਨੇ 500 ਵਿੱਚੋਂ 497 ਅੰਕ ਹਾਸਲ ਕੀਤੇ ਹਨ। ਵੱਡੀ ਹੋ ਕੇ ਆਈਏਐੱਸ ਅਫ਼ਸਰ ਬਣਨ ਦੀ ਤਾਂਘ ਰੱਖਣ ਵਾਲੀ ਤਰਨਪ੍ਰੀਤ ਦੀ ਇਸ ਪ੍ਰਾਪਤੀ ਨੇ ਨਵੀਆਂ ਪ੍ਰਾਪਤੀਆਂ ਦਾ ਰਾਹ ਖੋਲ੍ਹ ਦਿੱਤਾ ਹੈ।

ਤਰਨਪ੍ਰੀਤ ਦੇ ਸਕੂਲ ਦੀ ਮੈਨੇਜਮੈਂਟ ਨੇ ਉਸ ਨੂੰ ਬਾਰ੍ਹਵੀਂ ਤੱਕ ਦੀ ਪੜ੍ਹਾਈ ਲਈ ਸਕਾਲਰਸ਼ਿਪ ਦੇਣ ਦਾ ਐਲਾਨ ਕੀਤਾ ਹੈ।

ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਟਵੀਟ ਕਰਕੇ ਤਰਨਪ੍ਰੀਤ ਨੂੰ ਉਸਦੀ ਇਸ ਪ੍ਰਾਪਤੀ ਲਈ ਵਧਾਈ ਦਿੱਤੀ ਹੈ।

ਤਰਨਪ੍ਰੀਤ ਦੀ ਪ੍ਰਾਪਤੀ ਇਸ ਕਰਕੇ ਵੀ ਅਹਿਮ ਹੈ ਕਿ ਉਸ ਨੇ ਬਿਨਾਂ ਕਿਸੇ ਟਿਊਸ਼ਨ ਜਾਂ ਹੋਰ ਸਹਾਇਤਾ ਦੇ ਆਪਣੇ ਬਲਬੂਤੇ ਇਹ ਮੁਕਾਮ ਹਾਸਲ ਕੀਤਾ ਹੈ।

ਤਰਨਪ੍ਰੀਤ ਦੀ ਪ੍ਰਾਪਤੀ ਦਾ ਮੂਲ ਮੰਤਰ

ਤਰਨਪ੍ਰੀਤ ਮੁਤਾਬਕ ਉਹ ਸਕੂਲ ਦੀ ਪੜ੍ਹਾਈ ਅਤੇ ਹੋਮਵਰਕ ਤੋਂ ਬਿਨਾਂ ਇਮਤਿਹਾਨਾਂ ਦੇ ਦਿਨਾਂ ਵਿੱਚ ਚਾਰ ਤੋਂ ਪੰਜ ਘੰਟੇ ਵਾਧੂ ਪੜ੍ਹਾਈ ਕਰਦੀ ਸੀ।

ਤਰਨਪ੍ਰੀਤ ਦੱਸਦੀ ਹੈ, "ਮੇਰੀਆਂ ਸਹੇਲੀਆਂ ਨੂੰ ਲਗਦਾ ਸੀ ਕਿ ਮੈਂ ਟੌਪ ਨਹੀਂ ਕਰ ਸਕਦੀ ਪਰ ਮੇਰਾ ਇਹ ਵਿਸ਼ਵਾਸ ਸੀ ਕਿ ਜੋ ਅਸੰਭਵ ਲੱਗੇ ਉਸ ਨੂੰ ਟੀਚਾ ਬਣਾ ਲੈਣਾ ਹੀ ਪ੍ਰਾਪਤੀ ਦਾ ਮੂਲ ਮੰਤਰ ਹੈ।"

ਭਵਿੱਖ ਦੀਆਂ ਯੋਜਨਾਵਾਂ ਬਾਰੇ ਉਹ ਦੱਸਦੀ ਹੈ, "ਮੈਂ ਜਾਂ ਤਾਂ ਆਈਏਐਸੱ ਅਫ਼ਸਰ ਬਣ ਕੇ ਸਮਾਜ ਦੀ ਸੇਵਾ ਕਰਾਂਗੀ ਜਾਂ ਮੈਥ ਟੀਚਰ ਬਣਾਂਗੀ ਤਾਂ ਜੋ ਗ਼ਰੀਬ ਬੱਚਿਆਂ ਦੀ ਪੜ੍ਹਾਈ ਲਈ ਕੁੱਝ ਕਰ ਸਕਾਂ ਕਿਉਂਕਿ ਸਿੱਖਿਆ ਹੀ ਤੁਹਾਨੂੰ ਗ਼ੁਰਬਤ ਵਿੱਚੋਂ ਕੱਢ ਸਕਦੀ ਹੈ।"

ਤਰਨਪ੍ਰੀਤ ਦੇ ਮਾਤਾ ਹਰਪ੍ਰੀਤ ਕੌਰ ਆਪਣੀਆਂ ਭਾਵਨਾਵਾਂ ਸਾਂਝੀਆਂ ਕਰਦੇ ਹੋਏ ਕਹਿੰਦੇ ਹਨ, "ਅਸੀਂ ਤਾਂ ਬਹੁਤਾ ਪੜ੍ਹ ਨਹੀਂ ਸਕੇ ਪਰ ਇਸਦੇ ਸੁਪਨੇ ਪੂਰੇ ਕਰਨਾ ਚਾਹੁੰਦੇ ਹਾਂ ਇਸ ਲਈ ਅਸੀਂ ਇਸ ਨੂੰ ਘਰੇਲੂ ਕੰਮਾਂ ਤੋਂ ਦੂਰ ਰੱਖਿਆ। ਜਦੋਂ ਇਹ ਛੋਟੀਆਂ ਕਲਾਸਾਂ ਵਿੱਚ ਸੀ ਇਸਦੀ ਚਾਚੀ ਇਸ ਨੂੰ ਪੜ੍ਹਾਉਂਦੀ ਸੀ ਮੈਂ ਘਰ ਦਾ ਕੰਮ ਕਰਦੀ ਸੀ।''

ਦਾਦੀ ਦੀਆਂ ਅਸੀਸਾਂ

ਤਰਨਪ੍ਰੀਤ ਦੇ ਦਾਦੀ ਸੁਖਵੰਤ ਕੌਰ ਮਾਣ ਨਾਲ ਕਹਿੰਦੇ ਹਨ ਤਾਂ ਦਾਦਾ ਦਲਜੀਤ ਸਿੰਘ ਦੀਆਂ ਅੱਖਾਂ ਖੁਸ਼ੀ ਦੇ ਹੰਝੂਆਂ ਨਾਲ ਭਰ ਜਾਂਦੀਆਂ ਹਨ, "ਜਦੋਂ ਇਹ ਮੇਰੀ ਸੇਵਾ ਕਰਦੀ ਹੈ ਤਾਂ ਮੈਨੂੰ ਹਮੇਸ਼ਾ ਪੁੱਛਦੀ ਹੈ ਬੀਬੀ ਮੈਨੂੰ ਕੀ ਅਸੀਸ ਦਿਓਗੇ ਤਾਂ ਮੇਰਾ ਹਰ ਵਾਰ ਇਹੀ ਜਵਾਬ ਹੁੰਦਾ ਸੀ ਕਿ ਤੂੰ ਜ਼ਿਲ੍ਹੇ ਵਿੱਚੋਂ ਪਹਿਲੇ ਨੰਬਰ 'ਤੇ ਆਵੇਂ ਇਹ ਤਾਂ ਸੁੱਖ ਨਾਲ ਉਸ ਤੋਂ ਵੀ ਵੱਧ ਕਰ ਗਈ।"

ਤਰਨਪ੍ਰੀਤ ਦੇ ਇੱਕ ਰਿਸ਼ਤੇਦਾਰ ਕਹਿੰਦੇ ਹਨ, "ਇਸਦੀ ਪੜ੍ਹਾਈ ਵਿੱਚ ਐਨੀ ਲਗਨ ਸੀ ਕਿ ਇਹ ਸਾਨੂੰ ਕਈ ਸਾਲ ਤੱਕ ਮਿਲਣ ਵੀ ਨਹੀਂ ਸੀ ਆਈ। ਜਦੋਂ ਇਸ ਨੇ ਫ਼ੋਨ 'ਤੇ ਆਪਣਾ ਨਤੀਜਾ ਸੁਣਾਇਆ ਤਾਂ ਬੇਹੱਦ ਖੁਸ਼ੀ ਹੋਈ। ਮੇਰੀ ਬੇਟੀ ਹਾਲੇ ਪਹਿਲੀ ਜਮਾਤ ਵਿੱਚ ਪੜ੍ਹਦੀ ਹੈ ਉਹ ਹੁਣੇ ਕਹਿਣ ਲੱਗ ਪਈ ਹੈ ਕਿ ਮੈਂ ਦੀਦੀ ਵਰਗੀ ਬਣਨਾ ਹੈ।"

ਸਕੂਲ ਵੱਲੋਂ ਇਨਾਮ ਅਤੇ ਸਕਾਲਰਸ਼ਿਪ

ਬਰੌਡਵੇਅ ਪਬਲਿਕ ਸਕੂਲ ਮਨਾਲ ਦੀ ਮੈਨੇਜਮੈਂਟ ਨੇ ਤਰਨਪ੍ਰੀਤ ਨੂੰ 5100 ਰੁਪਏ ਨਕਦ ਰਾਸ਼ੀ ਨਾਲ ਸਨਮਾਨਿਤ ਕੀਤਾ ਹੈ ਅਤੇ ਅਗਲੀ ਪੜ੍ਹਾਈ ਲਈ ਸਕਾਲਰਸ਼ਿਪ ਦੇਣ ਦਾ ਐਲਾਨ ਵੀ ਕੀਤਾ ਹੈ।

ਸਕੂਲ ਦੇ ਪ੍ਰਿੰਸੀਪਲ ਐਮ ਏ ਸੈਫ਼ੀ ਮੁਤਾਬਿਕ, "ਅਸੀਂ ਇਸ ਹੋਣਹਾਰ ਵਿਦਿਆਰਥਣ ਲਈ ਬਾਰ੍ਹਵੀਂ ਤੱਕ ਦੀ ਪੜ੍ਹਾਈ ਲਈ ਇਸ ਨੂੰ ਸਕਾਲਰਸ਼ਿਪ ਦੇਣ ਦਾ ਫ਼ੈਸਲਾ ਕੀਤਾ ਹੈ ਅਤੇ ਅਗਲੀ ਪੜ੍ਹਾਈ ਲਈ ਜਿੱਥੋਂ ਤੱਕ ਇਹ ਪੜ੍ਹਨਾ ਚਾਹੇਗੀ ਸਾਡੀ ਮਦਦ ਜਾਰੀ ਰਹੇਗੀ। ਅਸੀਂ ਇਸ ਲਈ ਵਿਸ਼ੇਸ਼ ਅਧਿਆਪਕਾਂ ਦਾ ਪ੍ਰਬੰਧ ਵੀ ਕਰ ਰਹੇ ਹਾਂ ਕਿਉਂਕਿ ਇਹ ਸਾਡੇ ਸਕੂਲ ਦਾ ਚਮਕਦਾ ਸਿਤਾਰਾ ਹੈ।"

(ਬੀਬੀਸੀ ਪੰਜਾਬੀ ਨਾਲ FACEBOOK, INSTAGRAM, TWITTERਅਤੇ YouTube 'ਤੇ ਜੁੜੋ।)