Kiiska saraakiil CIA ah oo la dilay iyo xogaha aan la shaacin ee ku hareeraysan

Subaxnimadii hore ee Axadda, kolonyo shan baabuur ayaa ku socdaalayay Sierra Tarahumara, oo ah dhul buuraley ah oo aad u ballaaran oo ku yaalla gobolka Chihuahua ee Mexico oo caan ku ah juqraafiga qallafsan iyo dembiyada abaabulan.

Markaas ayaa kolonyadu burburiyeen lix shaybaar oo daroogo ah oo casri ah, hawlgal ay ku lug lahaayeen boqol sarkaal, mid ka mid ah guulaha ugu muhiimsan ee sannado ay gaareen xafiiska dacwad oogaha Chihuahua iyo booliiska.

Meel dooxyo iyo kayn ah, baabuurkii ugu horreeyay ee kolonyada ayaa u muuqda inuu shil galay: wuu liicay, doox ku dhacay oo qarxay.

Afar qof ayaa dhintay: agaasimihii maxalliga ahaa ee wakaaladda baarista dawladda, Pedro Oseguera, ilaaladiisii, Manuel Méndez, iyo laba wakiil oo ka tirsan hay'adda sirdoonka Maraykanka ee CIA – sida ay sheegtay Washington Post iyo The New York Times – kuwaas oo aan magacyadooda la shaacin.

Dowladda Mareykanka iyo CIA-da midkoodna ma shaacin magacyada iyo in labada nin ay u shaqeynayeen hay'adda sirdoonka iyo in kale.

In kasta oo aysan ahayn markii ugu horreysay, dhimashada saraakiisha Mareykanka ee ciidda Mexico waxay dhalinaysaa su'aalo muhiim ah: Mexico ma waxay ku wareejisay qayb ka mid ah madax-bannaanideeda iyada oo u oggolaanaysa inay halkan ka shaqeeyaan? Maraykanku miyuu burburinayaa shaybaaradada Mexico ee daroogada, sida Donald Trump rabo? "iskaashiga" ay sheegeen masuuliyiinta Mexico ma ka qoto dheer yihiin sida ay caadiyan qirtaan?

Madaxweynaha Mexico Claudia Sheinbaum ayaa inta badan diida in ciidamada Mareykanka ay ku lug leeyihiin howlgallada Mexico.

"Ilaa hadda, xogta aan hayno ayaa ah inay si wadajir ah u wada shaqeynayeen," ayuu yiri Talaadadii. "Xafiiska Xeer Ilaaliyaha Guud ee Qaranka waa in uu baaritaan buuxa ku sameeyaa si loo ogaado in lagu xadgudbay Dastuurka ama sharciga Amniga Qaranka.

Sheinbaum waxay ku adkaysanaysaa,maalin kasta, in Mexico ay diyaar u tahay inay iskaashi la sameyso Mareykanka dagaalka ka dhanka ah ka ganacsiga daroogada, iyadoo shardi uga dhigtay madaxbanaanida Mexico - taasi waa, Sharciga Amniga Qaranka – waana in la ixtiraamaa.

Laakiin muddo tobanaan sano ah hoggaamiyeyaasha Mexico way dafireen waxa khubaro badani u arkaan caddayn: Wakiilada Maraykanku waxay ka shaqeeyaan Mexico iyaga oo haysta ogolaanshaha maamulka.

David Saucedo, oo ah lataliye dhanka ammaanka ah, ayaa sheegay in joogitaanka wakiilada Mareykanka ee Mexico la diiwaangeliyay tobanaan sano ka hor. Laakiin waxa uu intaa ku daray in farqiga hadda uu yahay in maamulka Trump uu diyaar u yahay inuu sidaas sameeyo iyadoo la raacayo hab yar iyo oo aan xamaasad badanayn.

"In muddo ah waxaa socday howlgalo qarsoodi ah oo ay fulinayeen wakiilo ka tirsan hay'adaha ammaanka Mareykanka sida FBI-da, CIA-da, DEA iyo Amniga gudaha, qaarna ay aqoon u leeyihiin Mexico iyo kuwo kale oo aan la socon.

"Waxay ka qaybqaataan juqraafi ahaan, xiritaanka dadka daroogada ka ganacsada, waa hubaysan yihiin, waxay fuliyaan hawlo dambi baaris ah iyo shaqada booliiska oo aragti ahaan aysan qaban karin."

"Waxay ku siin karaan talo ama xog ku biirin karaan, laakiin aragti ahaan ma lahaan doonaan awood ay ku xiraan, qabtaan ama ay hub ku qaataan; si kastaba ha ahaatee, tani waxay ka dhacaysay tobanaan sano gudaha Mexico," ayuu khabiirku tilmaamay.