TOOS, Iran waxay sheegtay inay mas’uul ka noqon doonto Hormuz, Putin-na wuxuu yiri waxaan ka shaqaynayaa danaha Tehran iyo gobolka

Tebin toos ah

1. 23 Daqiiqadood ka horWar cusub oo ka soo kordhay xaaladda dalka Mali

   

   Xigashada Sawirka, AFP via Getty Images

   Wararka ka imanaya dalka Mali ayaa sheegaya in ciidamada dalkaas ay ka baxayaan magaalada Tessit ee waqooyi-bari, iyadoo kooxaha fallaagada ay sii xoojinayaan weerarradooda kadib hawlgal cusub oo ay bilaabeen dhammaadka toddobaadkii aan soo dhaafnay.

   Sida uu sheegay wariyaha BBC, waqooyiga magaalada Kidal iyo koonfurta gobolkaas ayaa ah meelaha ay si aad ah uga firfircoon yihiin kooxaha xagjirka ah ee ka hawlgala dalka Mali.

   Koox xiriir la leh Al-Qaacida ayaa sheegtay inay u oggolaatay askarta inay hubkooda dhigaan isla markaana si nabad ah uga baxaan aaggaas.

   Arrintan ayaa timid kadib markii ay sidoo kale ka baxeen magaalada Kidal ee waqooyiga dalka Mali ciidamo calooshood u shaqeystayaal Ruush ah oo ka hawlgali jiray Afrika, kuwaas oo la socday ciidamada Mali.

   Magaaladan Kidal waxaa ciidamada Mali ay qabsadeen saddex sano ka hor, iyagoo markaas taageero ka helayay Ruushka.

   Dowladda militariga ee Mali weli si rasmi ah ugama aysan hadlin dhacdooyinkan.

2. 35 Daqiiqadood ka horWar deg deg ah, Trump oo tallaabo cusub oo Iiraan ku saabsan qaaday

   

   Xigashada Sawirka, Getty Images

   Madaxweynaha Maraykanka Donald Trump ayaa Isniintii isugu yeeray la-taliyeyaashiisa sare ee amniga qaranka si ay uga wada hadlaan xog dhanka Iiraan laga soo weriyay oo sheegaysa in inay waddo qorshe lagu furayo Marinka Hormuz, xilli wada-hadallada ku saabsan xabbad-joojin iyo dib u bilaabidda maraakiibta maraya marin-biyoodkaas ay hakad galeen.

   Marka laga jawaabay su’aal ku saabsan soo jeedintaas oo la sheegay inay shuruud uga dhigeen in Maraykanku ka qaado xannibaadda dekedaha Iran si beddelkeeda loo furo marinka,.

   Afhayeenadda Aqalka Cad, Karoline Leavitt, ayaa shir jaraa’id ku sheegtay in “soo jeedintaasi ay weli ku jirto xaalad wada-hadal ah.”

   Waxay intaa ku dartay in “marka la xaqiijiyo wararka, waxaan xaqiijin karaa in madaxweynuhu uu saaka la kulmay kooxdiisa amniga qaranka,” iyada oo aan faahfaahin ka bixin in Trump uu aqbali doono soo jeedintaas iyo in kale.

   Wasiirka Arrimaha Dibadda ee Maraykanka, Marco Rubio, ayaa sheegay in mowqifka Iran ee ku aaddan marinka Hormuz, oo sida caadiga ah ay maraan qiyaastii shan meelood meel saliidda iyo gaaska dabiiciga ee dunida, uusan waafaqsanayn dalabaadka Maraykanka.

3. 53 Daqiiqadood ka horWar deg deg ah, Jarmalka oo madaxda Iiraan ugu yeeray kuwa "ceebeynaya Mareykanka"

   

   Xigashada Sawirka, Getty Images

   Ra’iisul Wasaaraha Jarmalka, Friedrich Merz, ayaa sheegay in hoggaanka Iran uu “ceebaynayo” Mareykanka, isagoo ku eedeeyay inay ergadooda u direen Pakistan kadibna ay ka soo laabteen iyagoo aan wax natiijo ah ka keenin.

   Wuxuu intaa ku daray in “Iraniyiintu ay yihiin khubaro ku xeel-dheer wada-hadallada.”

   Merz wuxuu sidoo kale sheegay inuusan “arkayn wax qorshe ah oo Mareykanka uu ka leeyhaya xaaladda hadda jirta.”

   Dhanka kale, Wasiirka Arrimaha Dibadda ee Iran, Cabbaas Caraqji, ayaa kula kulmay Madaxweynaha Ruushka Vladimir Putin magaalada St. Petersburg, isagoo u xaqiijiyay in xiriirka Ruushka iyo Iran uu sii xoogeysan doono, kuna tilmaamay inuu yahay “iskaashi istiraatiiji ah oo heerkiisu aad u sarreeyo.”

4. Saacad ka horFaransiiska oo canaan u diray Iiraan, Mareykanka iyo Israa'iil

   

   Xigashada Sawirka, Reuters

   Wasiirka Arrimaha Dibadda ee Faransiiska, Jean-Noël Barrot, ayaa Isniintii sheegay in Iran ay tahay inay muujiso rabitaan ay ku sameyso tanaasulaad waaweyn inta lagu jiro wadahadallada ay la leedahay Mareykanka, si loo soo afjaro dagaalka ka socda gobolka.

   Intii uu khudbad ka jeedinayay Golaha Ammaanka ee Qaramada Midoobay, Barrot wuxuu adkeeyay in “xal waara oo lagu gaaro xiisadda aysan suurtagal noqon karin ilaa Tehran ay ogolaato inay sameyso tanaasulaad muhiim ah oo ay la socoto ballanqaadyo la taaban karo.”

   Wuxuu intaa ku daray in “Iran ay tahay inay qaadato hab horseedaya wada-noolaansho nabadeed oo u uku jiro deegaanka ay ku noolyihiin iyo guudahaan gobolka, taasoo u oggolaanaysa shacabka Iran fursad ay si xor ah ugu dhistaan mustaqbalkooda.”

   Barrot sidoo kale wuxuu dhaleeceeyay Mareykanka iyo Israa’iil, isagoo sheegay inay dagaal ku qaadeen Iran “iyagoo aan lahayn ujeeddooyin cad oo ka baxsan qaabka sharciga caalamiga ah,” balse isla markaana wuxuu mas’uuliyadda ugu weyn ku eedeeyay “nidaamka Iran” sababo la xiriira barnaamijyadeeda nukliyeerka iyo gantaallada.

   Tani waxay timid intii lagu guda jiray kulan ay codsatay Bahrain, halkaas oo dalal badan ay ku baaqeen in Iran ay dib u furto Marinka Hormuz.

5. Saacad ka horShil diyaaradeed oo ka dhacay Koonfurta Suudaan iyo faahfaahin ka soo baxaysa

   

   Xigashada Sawirka, Supplied

   Diyaarad yar oo nooca rakaabka qaada ah ayaa ku burburtay dalka Koonfurta Suudaan, waxaana ku dhintay dhammaan dadkii saarnaa, sida ay sheegtay hay'adda duulista hawada ee dalkaas.

   Saraakiishu waxay koox u direen goobta shilku ka dhacay si ay baaritaanno ugu sameeyaan, balse warbixinadii ugu horeeyay waxay sheegayaan in diyaaradda laga yaabo inay u soo dhacday "xaalad cimilo xumo awgeed.

   Diyaaradda ayaa ku burburtay meel qiyaastii 20km koonfur-galbeed ka xigta magaalada caasimadda ah ee Juba, saaka oo Isniin ahayd. Waxay ka soo duushay Yei 09:15 wakhtiga maxaliga ah, maamulka hawadana waxa uu lumay xidhiidhkii ilaa 30 daqiiqo markii ay hawada ku jirtay.

   Sida ku qoran liiska rakaabka, saarnaa waxaa ay ahaayen 15- qof , duuliyaha iyo 14 rakaab ahaa, waxaa ka mid ahaa 13 u dhashay Koonfurta Suudaan iyo laba Kenyan ah.

   In ka badan 55 diyaaradood ayaa ku burburay dalka, taasoo sababtay dhimasho badan, tobankii sano ee ka dib xornimadii uu qaatay dalkaan sanadkii 2011-kii.

   Shilalka mararka qaarkood waxaa sabab u ahaa diyaarad duug ah iyo dhowris la'aanta sharciga . Culayska xad-dhaafka ah, cimilo-xumada iyo khaladaadka duuliyeyaasha ayaa sidoo kale lloo tiiriyaa shialalka mararka qaar dhaca.

   Si aad u akhrido sheekooyin kale:

   Ayraboorrada ugu wanaagsan dunida iyo sirta ka dambaysa guushooda

   Warar dheeraad ah oo ka soo kordhay markabka shidaalka qaada ee gacanta ugu jira burcad badeedda Soomaalida

   Maraykanka oo qorsheynaya in uu cunaqabteynta ka qaado Eritrea xiriirna la yeesho

6. 2 Saacadood ka horWar deg deg ah, Netanyahu oo isna hanjabay iyo tallaabada uu qaadayo

   

   Xigashada Sawirka, Getty Images

   Ra’iisul Wasaaraha Israa’iil Benjamin Netanyahu ayaa maanta sheegay in gantaallada iyo diyaaradaha aan duuliyaha lahayn ee ay Xisbullah ku soo weerartay Israa’iil iyo ciidamadeeda ku sugan koonfurta Lubnaan ay u baahan yihiin tallaabo milatari oo dheeraad ah.

   War-saxaafadeed ka soo baxay xafiiskiisa ayaa lagu sheegay in Netanyahu uu tilmaamay “laba khatarood oo waaweyn oo ka imanaya Xisbullah: gantaallo 122mm ah iyo diyaarado aan duuliye lahayn. Arrintani waxay u baahan tahay isku-dar hawlo hawlgal iyo farsamo ah” ayuu yiri.

7. 2 Saacadood ka horWar deg deg ah, Israa'iil oo ku dhawaaqday in sanadkaan uu noqon doono "sanad colaadeed"

   Taliyaha guud ee ciidanka Israa’iil, Eyal Zamir, ayaa maanta sheegay in “sanadkan 2026 ay u badan tahay inuu noqdo sanad dagaallo ay ka dhacaan jihooyin kala duwan.”

   War ka soo baxay milatariga ayaa lagu sheegay in Zamir uu kulanka saraakiisha ka yiri: “Tan iyo 7-da Oktoobar 2023, ciidanku wuxuu ku jiray hawlgal joogto ah oo ka socda dhowr jiho.

   Waxaanu diyaar u nahay oo feejignaan ugu jirnaa suurtagalnimada in dagaallo culus ay dib uga qarxaan dhammaan jihooyinkaas.” Wuxuu intaas ku daray, “2026 waxay noqon kartaa sanad dagaal ka dhaca meel kasta.”

8. 2 Saacadood ka horWar deg deg ah, Haddii lagu heli dembiga lagu soo oogay ninkaan maxaa dhacaya?

   

   Xigashada Sawirka, Reuters

   Garsoorka Maraykanka ayaa dacwad ku soo oogay ninkii hubaysnaa ee isku dayay inuu weeraro cashadii Ururka Saxafiyiinta Aqalka Cad, isaga oo lagu eedeeyay isku day dilka madaxweyne Donald Trump, iyo laba eed oo kale oo la xiriira hub.

   Cole Thomas Allen, oo 31 jir ah, waxa uu wajahayaa xabsi daa’in haddii lagu helo dambiga isku dayga dilka madaxweynaha intii lagu guda jiray casho Sabtidii lagu qabtay hoteel ku yaalla Washington.

9. 2 Saacadood ka horWar deg deg ah, Eedaymaha loo haysto oo hadda la shaaciyay ninkii weeraray goobtii Trump ku sugnaa

   Garsooruhu waxa uu akhriyey dhammaan eedeymaha lagu soo oogay Allen.

   Kuwaas waa:

   • Isku day dilka Madaxweynaha Maraykanka
   • Isticmaalka hub inta lagu guda jiro fal dembiyeed rabshad leh
   • Qaadista hub gobol ilaa gobol iyada oo ujeedadu tahay in lagu fuliyo dembi culus.

10. 3 Saacadood ka horWar deg deg ah, Degdeg: Aqalka Cad oo shaaciyay cidda ay ku tuhmayaan weerarlkii dhawaan la rabay in lagu beegsado Trump. Hoos ka akhri

    

    Xigashada Sawirka, Reuters

    Aqalka Cad ee Mareykanka ayaa ku eedeeyay waxa ay ugu yeertay “koox naceyb aaminsan oo bidix u janjeerta” inay ka dambeysay rasaastii dhacday intii lagu guda jiray cashadii Ururka Saxafiyiinta oo uu ka qeyb galay Madaxweyne Donald Trump.

    Afhayeenka Aqalka Cad, Caroline Leavitt, ayaa shir jaraa’id ku sheegtay in “kooxda naceybku biyo dhigay ee bidixda ee ka soo horjeeda madaxweynaha iyo dhammaan kuwa taageera ama u shaqeeya ay dhaawaceen oo dileen dad badan, ayna ku dhowaadeen inay mar kale sidaas sameeyaan dhammaadkii toddobaadka.”

    Ninkii hubeysnaa ee isku dayay inuu gudaha u galo goobtii cashada Ururka Saxafiyiinta ee ka dhacaysay hoteel ku yaalla Washington ayaa hadda maxkamad la soo taagayaa.

    Aqalka Cad ayaa Axaddii ku dhawaaqay in tuhmanaha, oo warbaahinta Mareykanka ku magacowday Cole Thomas Allen, 31 jir ah, uu qorsheynayay inuu dilo Trump iyo saraakiil sare oo ka tirsan maamulkiisa intii lagu guda jiray cashada sanadlaha ah ee Sabtidii la qabtay.

11. 4 Saacadood ka horBaxrayn oo 69 qof dhalashada kala laabatay sababahan owgeed

    

    Xigashada Sawirka, Getty Images

    Wasaaradda Arrimaha Gudaha ee dalka Baxrayn ayaa ku dhawaaqday inay dhalashada kala laabatay 69 qof, kuwaas oo dhammaantood asal ahaan aan u dhalan Baxrayn, sababo la xiriira inay muujiyeen "taageero loo samaynayo falalka gardarrada ah ee Iiraan, ama inay u basaasayeen hay'ado shisheeye," ama sababtoo ah inay ka dhasheen qoysaska dadka falalkaas ku kacay.

    Bayaan ka soo baxay wasaaradda ayaa lagu sharraxay in tallaabadani ay qayb ka tahay hirgelinta wax ay ugu yeertay awaamiir ka timid Boqor Hamad bin Isa Al Khalifa, oo ah "in la qaado tallaabooyinka lagama maarmaanka ah ee ka dhanka ah kuwa ku dhiirraday inay khiyaanaan dalka, ama wax u dhima ka bixitaanka ammaankiisa iyo xasiloonidiisa, iyo in dib u eegis lagu sameeyo cidda u qalanta dhalashada Baxrayn iyo cidda aan u qalmin," sida qoraalka lagu sheegay.

    Bayaanka ayaa sidoo kale tilmaamay in tallaabadan ay saldhig u tahay qoraalka Qodobka 10/3 ee Sharciga Dhalashada Baxrayn, kaas oo dhigaya in dhalashada lagala laaban karo qofka, "haddii ay dhacdo in waxyeello loo geysto danaha Boqortooyada ama haddii loo dhaqmo si ka horimanaysa waajibka daacadnimada ee dalka lagu leeyahay."

12. 4 Saacadood ka horMuxuu ahaa kaftan ay ka xanaaqday xaaska Trump ee uu sameeyey maajilaystahan

    

    Xigashada Sawirka, Getty Images

    Marwada kowaad ee Maraykanka Melania Trump ayaa dhaleeceysay barnaamij daadihiyaha ahna maajilayste immy Kimmel kadib kaftan uu ku sheegay inay tahay “haweeney sugaysa inay noqoto carmal”, maalmo yar ka hor dhacdo toogasho ah oo ka dhacday cashadii Wariyeyaasha Aqalka Cad oo ay iyadu la joogtay madaxweynaha.

    Marwada koowaad waxay hadallada Kimmel ku tilmaantay “nacayb iyo rabshad kicin”, waxayna ka codsatay telefishanka ABC inuu tallaabo ka qaado “dhaqankiisa aadka u xun”.

    Nin hubeysan ayaa rasaas furay la maqlay iyadoo cashada loo fadhiyey Sabtidii, weerar ay masuuliyiintu sheegeen inuu bartilmaameedsan karo xubno ka tirsan maamulka Trump. Kaftankaas waxaa la sii daayay Khamiistii, iyadoo Kimmel uu si majaajillo ah uga hadlayay cashada ka hor dhacdada.

    “Marwadayada koowaad, Melania, waa joogtaa. Eeg Melania, aad bay u qurux badan tahay. Mrs Trump, waxaad leedahay iftiin u eg haweeney sugaysa inay noqoto carmal,” ayuu yiri Kimmel.

    Qoraal ay ku daabacday barta X Isniintii, Melania Trump waxay sheegtay in “dadka sida Kimmel oo kale ah aysan ahayn inay fursad u helaan inay guryaha ka daawanao fiid kasta si ay u faafiyaan nacayb”, waxayna ku boorrisay ABC inay “tallaabo qaado”.

    “Hadalkiisa ku saabsan qoyskayga ma aha majaajillo, waa hadallo dhaawacaya oo sii xoojinaya xanuunka siyaasadeed ee gudaha Ameerika,” ayay tiri. “Imisa jeer ayay hoggaanka ABC u oggolaanayaan dhaqankiisa xun iyagoo ku khasaarinaya bulshada?”

    Warbaahinta BBC ayaa la xiriirtay ABC si ay uga hesho faallo.

13. 5 Saacadood ka horAgaasimaha FBI-da Maraykanka oo war la yaab leh soo saaray ka dib dhacdadii weerarka

    

    Xigashada Sawirka, AFP via Getty Images

    Agaasimaha FBI-da, Kash Patel, ayaa sheegay "inay si weyn u diyaargaroobi doonaan" ka qaybgalka Donald Trump ee cashada weriyayaasha (correspondents' dinner) ee dhici doonta 30-ka maalmood ee soo socda.

    Wuxuu u sheegay Fox News: "Hannaanka amniga, waxaan u malaynayaa, inuu noqon doono mid gabi ahaanba ka duwan sidii hore.

    "Waxaan la shaqayn doonaa Aqalka Cad, Waaxda Amniga Gudaha, Ciidanka Ilaalada Gaarka ah (Secret Service), iyo Waaxda Booliska ee Metropolitan-ka. FBI-du waxay heli doontaa agab iyo cudud dhamaystiran munaasabaddaas dartiis."

    Isagoo ka hadlayay shaqada FBI-da ee ka dambaysay dhacdadii toogashada, Patel wuxuu sheegay in xafiisku uu wareysiyo ka sameeyay "macno ahaan dalka oo dhan," isla markaana ay qaadeen caddeymo si degdeg ah loo falanqeeyo.

14. 5 Saacadood ka horXog dheeri ah oo laga helay halka ay ku xiran yihiin laba markab oo ciidamada Iiran qabsadeen

    

    Sawirro dayax-gacmeedka lagu qaaday oo ay aragtay qaybta BBC Verify, ayaa muujinaya in labadii markab ee toddobaadkii hore ay qabteen Ciidanka Ilaalada Kacaanka Islaamiga ah ee Iiraan (IRGC), ay hadda ku xiran yihiin meel ka baxsan jasiiradda Hormuz.

    Sawirro maanta la soo qaaday ayaa muujinaya maraakiibta — MSC-Francesca iyo Epaminondas — oo ku xiran masaafo qiyaastii 8 km (5 mayl) u jirta jasiiradda ku taal Marinka Hormuz.

    Labada markabba waxaa la sheegay inay rasaas kala kulmeen ciidamada IRGC Arbacadii la soo dhaafay, waxaana la sheegay inuu gaaray khasaare. Muuqaallo muujinaya xubno ka tirsan IRGC oo dusha uga baxaya labada markab ayaa toddobaadkii hore laga baahiyay warbaahinta qaranka Iiraan in kasta oo falanqayn ay samaysay BBC Verify ay muujinayso in qaybo ka mid ah muuqaalkaas la duubay ka dib markii maraakiibta la qabtay.

    Taliska Ciidanka Badda ee IRGC ayaa toddobaadkii hore sheegay in markabka Epaminondas oo laga leeyahay dalka Giriigga iyo markabka MSC-Francesca oo sita calanka Panama la qabtay ka dib markii ay "halis geliyeen" ammaanka marinnada badda, iyagoo "ku shaqaynayay fasax la'aan, isla markaana faragelin ku sameeyay nidaamyada hagidda badda."

15. 6 Saacadood ka horWar cusub oo ka soo yeeray wasiirka arrimaha dibadda Iiraan oo dhinac taagnaa Putin

    

    Xigashada Sawirka, DMITRI LOVETSKY/POOL/EPA/Shutterstock

    Waxaan hadda helaynaa faahfaahin dheeraad ah oo ku saabsan booqashada Wasiirka Arrimaha Dibadda ee Iiraan, Abbas Araghchi, uu ku joogo dalka Ruushka.

    Araghchi oo kula hadlayay weriyayaasha magaalada St. Petersburg, ayaa sheegay in Iiraan ay "hor istaagtay quwadda ugu weyn adduunka [Maraykanka]," isagoo raaciyay in Washington aysan "gaarin mid ka mid ah ujeeddooyinkoodii."

    "Taas ayaa keentay inay codsadaan wadahadallo, annaguna hadda waan ka fiirsanaynaa," ayuu hadalkiisa ku daray. Ilaa hadda wax war ah kama soo bixin dhanka Washington.

    Diblomaasiga ugu sarreeya Iiraan ayaa sheegay in dagaalku uu muujiyay in Iiraan ay "leedahay saaxiibbo iyo xulafo waaweyn sida Ruushka," isagoo u mahadceliyay Kremlin-ka taageeradooda.

16. 7 Saacadood ka horWasiirka arrimaha dibadda Iiraan oo ka haday xiririka Ruushka iyo Iiraan

    

    Xigashada Sawirka, EPA/Shutterstock

    Wasiirka Arrimaha Dibadda ee Iiraan ayaa sheegay in xiriirka u dhexeeya Mosko iyo Tehraan uu yahay "iskaashi istiraatiijiyadeed" kaas oo "sii xoogaysan doona," sida laga soo xigtay hadallo laga baahiyay telefiishanka qaranka ee Ruushka.

    Wafdiga Iiraan ee Putin kula kulmaya dalka Ruushka waxaa sidoo kale qayb ka ah Wasiir ku-xigeenka Arrimaha Dibadda Kazem Gharibabadi iyo danjiraha Iiraan u fadhiya Mosko, Kazem Jalali.

    Af-hayeenka Kremlin-ka, Dmitry Peskov, ayaa sheegay in Ruushku uu diyaar u yahay inuu bixiyo "niyad-sami ama adeegyo dhexdhexaadin ah oo ay aqbali karaan labada dhinac" wadahadallada mustaqbalka ee lagu raadinayo xal lala gaaro.

    "Waxaan diyaar u nahay inaan samayno wax kasta si aan u xaqiijino in nabadda, nabad dammaanad leh, ay ugu dambeyntii guulaysato, iyo inaan marnaba dib loogu laaban colaad," ayuu raaciyay.

17. 7 Saacadood ka horWasiirka arrimaha dibadda Iiraan oo la kulmay madaxweyna Ruushka

    

    Xigashada Sawirka, Abbas Araghchi/Telegram

    Wasiirka Arrimaha Dibadda ee Iiraan, Abbas Araghchi, ayaa dalka Ruushka kula kulmaya Madaxweynaha Ruushka, Vladimir Putin.

    Sawirro lagu baahiyay barta uu ku leeyahay Telegram-ka, ayaa laga dhex arki karay wasiirka arrimaha dibadda ee Iiraan oo gacan-qaadaya, lana hadlaya Putin iyaga oo fadhiya miis ay ku hareeraysan yihiin wefdi ka socda labada waddan.

    Putin waxaa kulanka ku weheliya Wasiirka Arrimaha Dibadda ee Ruushka, Sergei Lavrov, kaaliyaha Kremlin-ka Yuri Ushakov, iyo Igor Kostyukov oo ah madaxa hay’adda sirdoonka milatariga Ruushka ee GRU.

    

    Xigashada Sawirka, Abbas Araghchi/Telegram

18. 8 Saacadood ka horWar ka soo kordhay ninkii weeraray xafladii cashada ee Trump ku sugnaa

    Ninka looga shakinsan yahay toogashadii habeenkii Sabtida, ayaa la filayaa inuu ka soo muuqdo maxkamad Isniinta si uu u wajaho eedeymo dambiyeed.

    Cole Tomas Allen, oo 31 jir ah kana soo jeeda Torrance, California, ayaa lagu wadaa in muuqashadiisii ugu horreyeysay ee maxkamada qabsoonto taas oo ka dhacaysa maxkamadda federaalka ee Washington, laba maalmood kadib markii mas’uuliyiintu sheegeen inay fashiliyeen weerar la qorsheeyay oo ka dhici lahaa cashada wariyaashada Aqalka Cad, oo ah munaasabad sannadle ah oo ay ka qeyb galaan suxufiyiin iyo siyaasiyiin.

    Rasaas ayaa laga maqlay huteelka Washington Hilton, halkaas oo uu Donald Trump ka qaybgalayay casho-sharafta

19. 9 Saacadood ka horMadaxweynaha Lubnaan heshiis ‘Bahdil ah' ma rabno

    

    Xigashada Sawirka, Getty Images

    Madaxweynaha Lubnaan Joseph Aoun ayaa sheegay inuusan aqbali doonin in la gaaro “heshiis bahdil ah” dadaalladada lagu doonayo in lagu soo afjaro dagaalka u dhexeeya Israa’iil.

    Bayaan uu soo saaray ayuu ku sheegay inuu Maraykanka u sheegay tan iyo bilowgii wada-xaajoodyada in “xabbad-joojin ay tahay tallaabada koowaad ee lama huraanka ah.”

    Wuxuu intaas ku daray in koonfurta Lubnaan ay “bixinayso qiimaha dagaal oo ay dad kale ku wadaan dhulkeenna.”

    Xabbad-joojinta ay ku heshiiyeen Israa’iil iyo Lubnaan ayaa lagu kordhiyay saddex toddobaad, inkastoo weerarro u dhexeeya Israa’iil iyo kooxda Xisbullah ee ay Iiraan taageerto ay sii socdeen maalmihii u dambeeyay. Xisbullah kama mid ahayn wada-xaajoodyada lagu doonayay in nabad lagu gaaro gobolka.

    Aoun wuxuu sheegay in haddii dagaalku uu “u daneynayo Lubnaan” uu taageeri lahaa, balse wuxuu yiri, “marka ujeeddada dagaalku tahay in lagu gaaro danaha dad kale, si buuxda ayaan u diidanahay dagaalka.”

    Hadallo u muuqda weerar uu ku qaaday kooxda hubeysan ee Hezbollah, oo sheegtay inay xaq u leedahay inay ka jawaabto hanjabaadaha Israa’iil ayuu Aoun yiri: “Waxa aan sameyneyno khiyaano ma aha; balse khiyaanada waxaa sameeya kuwa dalkooda u gelinaya dagaal si ay u gaaraan danaha shisheeye.”

20. 9 Saacadood ka horXog cusub oo ka soo korortay xaaladda hoggaamiyaha sare ee Iran Mojtaba Khamenei

    

    Xigashada Sawirka, Getty Images

    Hoggaamiyaha cusub ee sare ee Iran, Mojtaba Khamenei, ayaa wali ka kabanaya dhaawacyo darran oo wejiga iyo lugaha ah oo ka soo gaaray weerarkii cirka ahaa ee lagu dilay aabbihii billowgii dagaalka, sida ay saddex qof oo u dhow saaxiibbadiisa gaarka ah u sheegeen wakaaladda wararka ee Reuters.

    Wejiga Khamenei ayaa ku doorsoomay weerarkii lagu qaaday xarunta hoggaamiyaha sare ee bartamaha Tehran, wuxuuna dhaawac weyn ka soo gaaray mid ama labada lugoodba, sida ay sheegeen dhammaan saddexda ilood.

    Si kastaba ha ahaatee, 56-jirkan ayaa ka kabanaya dhaawacyadiisii, maskaxdiisuna wali waa mid firfircoon, sida laga soo xigtay dadkan codsaday in aan magacyadooda la sheegin.

    Wuxuu ka qayb qaadanayaa kulamo uu la leeyahay mas'uuliyiinta sare isagoo adeegsanaya shirarka cod ahaan, wuxuuna ku lug leeyahay go'aan ka gaarista arrimaha waaweyn oo ay ka mid yihiin dagaalka iyo wada-xaajoodyada lala leeyahay Washington, sida ay sheegeen laba ka mid ah ilahaas.

    Su'aasha ku saabsan in caafimaadka Khamenei ee u oggolaanaysa inuu maamulo arrimaha dawladda ayaa timid xilli Iiraan ay ku jirto xilligii ugu xasaasisaneed muddo tobanaan sano ah, iyadoo wadahadallo nabadeed oo xasaasi ah ay Islamabad ugu soo dhammaadeen Maraykanka kuwaas oo furmay shalay.

    Halkan ka sii akhri sheekada oo dhamaystiran