ချီလီတောမီး - လူ ၁၂၀ ကျော်သေဆုံးပြီး အိမ်ထောင်ချီမီးလောင်ကျွမ်းထား

ဆယ်စုနှစ်များအတွင်း အဆိုးရွားဆုံးတောမီးဘေးနဲ့ ရင်ဆိုင်နေရတဲ့ ချီလီနိုင်ငံအလယ်ပိုင်း ဗယ်ပါရာဆို ဒေသမှာ အနည်းဆုံး လူ၁၂၂ ဦးထက်မနည်း သေဆုံးခဲ့ပါတယ်။

ထိခိုက်ပျက်စီးမှုတွေအဆိုးရွားဆုံးဖြစ်ပွားနေပြီး ကယ်ဆယ်ရေးဝန်ဆောင်မှုတွေ အဲဒီနေရာတွေကိုရောက်ဖို့ ခက်ခဲနေတယ်လို့ အာဏာပိုင်တွေကပြောပါတယ်။

သေဆုံးသူအရေအတွက်လည်း ပိုမိုများပြားလာတယ်လို့ ပြည်ထဲရေးဝန်ကြီး ကာရိုလိုင်းနားတိုဟာက ပြောပါတယ်။

လက်ရှိမှာလူ ၃၇၀ ကျော် ပျောက်ဆုံးနေပါတယ်။ အခုတောမီးကို ချီလီမှာ အသေအပျောက်အများဆုံး တောမီးအဖြစ်မှတ်တမ်းတင်ရတဲ့အထိ ဆိုးရွားပြင်းထန်နေပါတယ်။

သေဆုံးထိခိုက်ခံရသူအများစုဟာ နွေရာသီအားလပ်ရက်အတွင်း ကမ်းရိုးတန်းဒေသလည်ပတ်ကြချိန်မှာ အခုတောမီးနဲ့ ကြုံခဲ့ကြရတာပါ။

လူ ၅၀၀ ခန့်သေဆုံးခဲ့ရတဲ့ ချီလီ ငလျင်အပြီးမှာ အခုတောမီးက အဆိုးရွားဆုံး ဘေးဒုက္ခဖြစ်တယ်လို့ ချီလီအာဏာပိုင်တွေကပြောပါတယ်။

ချီလီသမ္မတ ဂါဗီရယ်ဘော်ရစ်ကတော့ နိုင်ငံကို အရေးပေါ် အခြေအနေ ကြေညာလိုက်ပါတယ်။

မီးလောင်မှုကြောင့် အိမ်ခြေ ၃,၀၀၀ ကနေ ၆,၀၀၀ ကြား မီးလောင်ကျွမ်းခဲ့တယ်လို့ ဒေသအာဏာပိုင်တွေရဲ့ စာရင်းတွေကဖော်ပြပါတယ်။

ဗယ်ပါရာဆို ဒေသအုပ်ချုပ်ရေးမှူး ရိုဒရီဂို မန်ဒါကာ ကတော့ မီးလောင်မှုက ရည်ရွယ်ချက်ရှိရှိလုပ်ဆောင်မှုကြောင့်ဖြစ်ပေါ်လာတယ်လို့ ယူဆပြောဆိုပါတယ်။

"ဒီမီးလောင်ကျွမ်းမှုလေးခုက တစ်ပြိုင်နက် ဖြစ်လာခဲ့တယ်" ရိုဒရီဂို မန်ဒါကာ ကပြောပါတယ်။

“အာဏာပိုင်တွေအနေနဲ့ ရှာဖွေဖော်ထုတ်ဖို့ ပြင်းပြင်းထန်ထန် လုပ်ဆောင်ရမှာ ဖြစ်ပါတယ်။ လို့ သူကဆိုပါတယ်။

ချီလီအစိုးရကတော့ ဒေသခံလူထုတွေအနေနဲ့ မီးဘေးဒဏ်သင့်တဲ့နေရာတွေဆီ မသွားဖို့ တောင်းဆိုတိုက်တွန်းနေပါတယ်။

အလယ်ပိုင်းဒေသက ရပ်ကွက်အများအပြားမှာလည်း ကယ်ဆယ်ရေးအဖွဲ့တွေဖြတ်သန်းသွားနိုင်ဖို့ ခွင့်ပြုပေမယ့် အရပ်သားလူထုတွေအတွက် ညမထွက်အမိန့်လည်းထုတ်ထားပါတယ်။

သဘာဝဘေးကြုံနေရချိန်မှာ ခိုးဆိုးလုယက်တွေမဖြစ်ဖို့အတွက် ကာဖျူးအမိန့်တွေလည်း ထုတ်ပြန်ထားပါတယ်။

မီးသတ်သမားတွေက မြို့တွင်းမှာရှိတဲ့ ရာနဲ့ ချီတဲ့ နေအိမ်နဲ့ စက်ရုံတွေက မီးလောင်ကျွမ်းနေတဲ့နေရာတွေကို ငြှိမ်းသတ်ဖို့ နာရီပေါင်းများစွာ ကြိုးပမ်းနေကြပါတယ်။