Impanuka 7 mbi z'indege zabayeho mu mateka y'isi

Impanuka ebyiri z'indege zabaye mu minsi ibiri ishize. Indege ya gisirikare ya C-130 Hercules yari itwaye abantu 125 yaguye muri Colombia, ihitana abantu 66 abandi benshi barakomereka.

I New York, indege ya Air Canada AC8646 yagonganye n'ikamyo izimya umuriro ku kibuga cy'indege cya LaGuardia mu ijoro ryo ku Cyumweru, ihitana abapilote babiri inakomeretsa abandi bantu benshi.

Izi nizo mpanuka nshya kandi za vuba aha zikurikiranye zahitanye abantu. Mu Buhinde habaye agahinda kenshi nyuma y'impanuka y'indege ya Air India, yerekezaga i Londres, itwaye abagenzi 242. Iyi ndege yaguye ku wa Kane tariki ya 12 Kamena(6) 2025, nyuma gato yo guhaguruka ku kibuga cy'indege cya Ahmedabad mu burengerazuba bw'u Buhinde.

Iyi mpanuka yahitanye abantu barenga 200, raporo za mbere zigaragaza ko imirambo 204 yabonetse. Umubare w'abarokotse n'abari ku butaka ubwo impanuka yabaga nturamenyekana, mu gihe iperereza rigikomeje kugira ngo hamenyekane neza ibyo iyi mpanuka yangije. Indege yagonze inyubako yakoreshwaga nk'icumbi n'ibitaro, inkuru zigaragaza ko bamwe mu barokotse basimbutse bava mu idirishya ry'igorofa (etage) ya kabiri.

Mu bagenzi, harimo abaturage b'Abahinde 169, Abongereza 53, Abanya-Porutugali 7, n'Umunya-Canada 1. Izi mpanuka ziheruka ziyongera ku rutonde rurerure rw'impanuka zikomeye mu mateka y'indege, zibutsa isi akaga kariho nubwo hari iterambere rikomeye muri ubu buryo bwo gutwara abantu n'ibintu

Uretse izi mpanuka za vuva, reka turebere hamwe izindi mpanuka eshanu mbi cyane z'indege zabaye mu mateka y'isi, nk'uko bitangazwa n'amakuru atandukanye arimo avugwa n'ibitangaza makuru -Cartoskills na PTC News.

1. Pan Am Flight 1736 na KLM Flight 4805 – impfu 583

Iyi mpanuka yibukwa nk'impanuka mbi cyane y'indege mu mateka, yabereye ahitwa Tenerife, mu birwa bya Canary tariki 27 Werurwe (3) 1977. Indege ebyiri zo mu bwoko bwa Boeing 747 zagonganye ku kibuga cy'indege cya Los Rodeos (ubu cyitwa Tenerife North Airport) ku kirwa cya Espagne cya Tenerife, mu birwa bya Canary.

Iyi mpanuka yahitanye abantu 583. Raporo yavuze ko iyi mpanuka yatewe n'imikorere mibi , ibyabaye biba urugero rwiza rwo gusuzuma inzira z'i ndege, ndetse binafasha mu kongera ubumenyi ku buryo iperereza ku mpanuka z'indege no gukumira impanuka bikorwa.

2. Impanuka y'indege ya Japan Airlines 123 - abapfuye 520

Indege ya kompanyi y'i ndege y'u Buyapani- Japan Airlines Flight 123 yari ivuye ku kibuga cy'indege cya Haneda, i Tokyo, yerekeza ku kibuga cy'indege mpuzamahanga cya Osaka, mu Buyapani. Ku wa mbere, tariki ya 12 Kanama (8), 1985, indege ya Boeing 747SR yari muri uru rugendo yaturikaga mu buryo butunguranye iminota 12 itangiye guhaguruka. Nyuma y'iminota 32, indege yaguye mu mpinga ebyiri z'umusozi wa Takamagahara muri Ueno, Intara ya Gunma, mu birometero 100 uvuye mu mujyi wa Tokyo, hafi y'umusozi wa Osutaka.

3. Saudi Arabian Flight 763 na Kazakhstan Airlines Flight 1907 – Abapfuye 349

Iyi ni yo mpanuka ikomeye cyane yabereye mu kirere hagati y'indege ebyiri. Yabereye mu mudugudu wa Charkhi Dadri, mu burengerazuba bwa New Delhi, mu Buhinde ku ya 12 Ugushyingo(11) 1996.

Indege ya Boeing 747-100B yo mu bwoko bwa Saudi Arabian Airlines yavaga i Delhi yerekeza i Dhahran muri Arabiya Sawudite, hamwe n'indi ndege ya Kazakhstan Ilyushin Il-76 yavaga i Chimkent muri Kazakisitani yerekeza i Delhi.

Iyi mpanuka yahitanye abantu bose 349 bari mu ndege zombi, ikaba ari yo mpanuka yahitanye abantu benshi ku isi mu kirere, impanuka y'indege yahitanye abantu benshi kurusha izindi zose zabaye mu Buhinde, ndetse ikaba ari iya gatatu mu mpanuka y'indege yahitanye abantu benshi mu mateka y'indege.

4. Turkish Airlines Flight 981 – Abapfuye 346

Urugendo rw'indege ya kompanyi ya Turkey - Turkish Airlines Flight 981 rwari ruteganyijwe kuba, kuva ku kibuga cy'indege cya Istanbul Yesilköy kugera ku kibuga cy'indege cya London Heathrow , aho iyi ndege yagombaga guhagarara hagati i Paris, ku kibuga cy'indege ca Orly. Tariki 3 Werurwe (3)1974, indege yo mu bwoko bwa McDonnell Douglas DC-10 yaguye mu ishyamba rya Ermenonville hanze ya Paris, abantu bose 346 bari muri iyo ndege barapfa.

Icyo gihe, yari imwe mu mpanuka mbi cyane mu mateka y'indege. Ikomeje kuba impanuka ya kane mbi cyane y'indege mu mateka y'indege kwisi, iya kabiri mbi cyane itararokotsemo abantu, n'impanuka ya kabiri mbi cyane y'indege mu yabaye mu mugabane w'i Burayi kugeza uyu munsi.

5. Air India Flight 182 – Abapfuye 329

Indege ya Air India Flight 182 yakoraga ingendo kuva Vancouver-Toronto-Montreal-London-Delhi. Tariki 23 Kamena (6), 1985, Boeing 747-237B yahanuwe n'igisasu ku butumburuke bwa metero 9.400. Yaguye mu Nyanja ya Atalantika inyuze mu kirere cya Irilande.

Ni yo ndege ya mbere ikomeye y'indege 747 yaturikijwe. Abantu 329 bose hamwe bapfuye, barimo Abanye Canada 268, Abongereza 27, n'Abahinde 24. Iyi ni yo mbunda yahitanye abantu benshi cyane mu mateka ya Canada.

Ni cyo gitero cy'iterabwoba cyishe cyane cyagabwe ku ndege kugeza ku bitero byo ku ya 11 Nzeri 2001. Kivugwa kandi ko ari cyo gitero ku ndege cyishe abantu cyane kurusha ibindi byose.

Igisasu cyaturikiye ku ndege ya Air India Flight 182 cyabereye rimwe n'igisasu cyaturikiye ku kibuga cy'indege cya Narita. Abashakashatsi bemeza ko hari isano iri hagati y'itegurwa ry'ibi bikorwa byombi.

6. Malaysia Airlines Flight MH17 - abapfuye 298

Indege ya Malaysia Airlines MH17 yarashwe mu 2014 ubwo yari yerekezaga i Amsterdam ivuye Kuala Lumpur, muri Malasyia. Iyi mpanuka yabereye hejuru ya Ukraine, ahari intambara hagati y'ingabo za leta n'inyeshyamba.

Iyo ndege yari irimo abantu 298, barimo abaturage b'Ubuholandi, Malasyia, Australia, Ubudage, Ubwongereza, n'ibindi bihugu, bahasize ubuzima.

Impanuka ya MH17 yabaye imwe mu mpanuka mbi cyane zo mu ndege zatejwe n'intambara, ikaba itangwa nk'urugero rw'akaga gashobora kuvuka mu ntambara.

7. Iran Air Flight 655 - abapfuye 290

Indege ya Iran Air Flight 655 yaguye mu 1988 mu kigobe cya Perse, ihitana abantu bari mu ndege bose nyuma yo kuraswa nabi na Leta Zunze Ubumwe za Amerika.

Iyi ndege yerekezaga mu mujyi wa Dubai ivuye mu mujyi wa Tehran muri Iran, ikaba yari itwaye abagenzi 290, bose bakaba bari abasivili, barimo abagore, abana n'imiryango itandukanye.

Iyi mpanuka yabaye kubera ikosa rya gisirikare ryateje agahinda n'uburakari hirya no hino ku isi, bituma habaho ibiganiro birambuye hagati ya Iran na Leta Zunze Ubumwe za Amerika.

Impanuka ya Iran Air 655 ifatwa nk'imwe mu mpanuka mbi cyane zo mu ndege zijyanye n'intambara, kandi yagaragaje uburyo amakosa ya gisirikare ashobora kugira ingaruka ku baturage b'inzirakarengane.