Abayisilamu basabye Kagame ko umuhamagaro wa mu gitondo usubizwaho, ati 'Ibyo biroroshye kubisuzuma'

Umwe mu bayisilamu bitabiriye inama Perezida w'u Rwanda Paul Kagame yagiranye na bo i Kigali ku wa gatatu yamugejejeho ikibazo avuga ko kibabaza cyuko babangamiwe no kuba uburyo bwo kubahamagarira isengesho rya mu gitondo bwarakuweho, Perezida amwizeza ko bigiye gukurikiranwa.

Uwo mugore yabajije ati: "...Rwose guhamagara kwa mu gitondo ko kujya gusenga [kwitwa 'adhan'] [b]iratubabaza kuba yaravuyeho."

Kagame yamusubije ati: "... Ibyo biroroshye kubisuzuma na byo..."

Kagame yahise ategeka minisitiri w'ubutegetsi bw'igihugu, na we wari uri muri iyo nama, ati: "Icyo kibazo muze kukiga, murebe ikibazo ni iki?"

Atebya, yongeyeho ati: "Mutinya ababakangura mu gitondo? Ni iki?

"Ubundi ariya masaha ni yo gukanguka nubundi."

Ayo magambo yashimishije cyane imbaga y'abayisilamu bari bari aho, bakoma amashyi y'urufaya.

Mu buryo buteruye Kagame asa n'uwatanze icyizere ko uyu muhamagaro ushobora gukomorerwa.

Umuhamagaro wa mu gitondo wahagaritswe mu 2020. Leta ivuga ko uyu muhamagaro wasakurizaga abantu bigahungabanya ituze ryabo.

Ibi kandi nyuma byabaye no mu nsengero z'ayandi madini yategetswe gushyira mu nyubako zabo uburyo bwo kubuza amajwi gusohoka kugira ngo atabangamira abaturage.

'Ntabwo dufite kaminuza idufasha kwiga nk'abavugabutumwa'

Icyemezo cya leta ku batanga inyigisho z'idini gitegeka ko uwigisha aba yaraminuje ibijyanye na tewolojiya. Abayoboke b'idini ya Isilamu babwiye Perezida Kagame ko bafite ikibazo cy'amashuri atanga izi nyigisho imbere mu gihugu.

Sheikh Nzeyimana Aboubakar uyobora umusigiti wa Rusizi, mu majyepfo ashyira uburengerazuba bw'u Rwanda, agaragaza ko iki ari ikibazo kibakomereye.

Yagize ati: "Ntabwo dufite kaminuza idufasha kwiga nk'abavugabutumwa. Bidusaba kujya mu bihugu bya kure kandi biratugora mu rwego rw'amikoro."

Kagame yabwiye abayisilamu ko iki kibazo acyumva kandi ko yiteguye kuba yabafasha muri uru rwego.

Avuga ku byemezo bikarishye leta yafatiye amadini, Kagame yumvikanye mu mvugo yoroheje bitandukanye n'uko yari asanzwe akivugaho.

Yavuze ko leta idafite gahunda yo kwibasira amadini nkuko ibishinjwa na bamwe.

"Hari ababifashe nabi ariko si benshi bavuga ngo turibasira amadini. Ntabwo leta igamije kwibasira amadini, nta n'uwo ishaka kubuza amahoro."

Gusa yongeye kuvuga ko leta itazihanganira abashinga amadini bagamije indonke no kurya imitungo y'abayoboke.