Poileasaidh ùr taigheadais do dhaoine a dh'fhuiling droch-dhìol taighe

Tha poileasaidh taigheadais ùr aig Comhairle na Gàidhealtachd do dhaoine a dh'fhuiling droch-dhìol san dachaigh.

Thuirt an t-ùghdarras ionadail gun deach 2,700 cùis de dhochann san dachaigh a chlàradh le na poilis ann an 2023-24.

'S e fòirneart agus droch-dhìol ann an càirdeas a bu choireach ri 12% de na cùisean cion-dachaigheachd a chaidh a chlàradh le Comhairle na Gàidhealtachd.

Fon phoileasaidh ùr, tha a' Chomhairle air gealltainn gum faigh daoine a tha a' fulang droch-dhìol taighe cuideachadh, fiosrachadh agus comhairle mu na roghainnean taigheadais a th' aca gu luath agus gu cunbhalach.

Gheibh luchd-obrach taigheadais trèanadh mun phoileasaidh sna 12 mìos air thoiseach oirnn.

Na measg, bidh an rùn gun obraich iad le buidhnean is seirbheisean eile, agus gun dèan iad cinnteach gu bheil fios aig daoine mar a gheibh iad seirbheisean speisealach.

'S e amas eile gun gabh iad gnothach ann an dòigh iomchaidh ri màladairean a tha ri droch-dhìol taighe.

Ann an aithisg, thuirt oifigich gun dèanadh am poileasaidh cinnteach gum biodh na seirbheisean taigheadais uile a' dèiligeadh gu cunbhalach ri daoine, agus gun cuireadh e ri obair na Comhairle lùghdachadh a thoirt air na tha de dhaoine a chailleas an dachaigh air sgàth droch-dhìol ann.

Thuirt an aithisg gur iad boireannaich a bha sa mhòr-chuid a bha san t-suidheachadh sin.

Tha am poileasaidh cuideachd a' buntainn ri fireannaich, leasbaich, daoine gèidh, dà-sheòrsach, tar-ghnèitheach agus neo-bhìnearaidh, cho math ri droch-dhìol air adhbaran "onair".