Campas ùr Bhaile Dhubhthaich an làmhan na Comhairle

Fhuair Comhairle na Gàidhealtachd iuchraichean campas sgoile ùr Bhaile Dubhthaich, le dùil gum bi clann ag ionnsachadh ann bho nas fhaide den earrach.

Tha an campas ùr, luach £72m, a' toirt a-steach Acadamaidh Rìoghail Bhaile Dhubhthaich, Bun-Sgoil ùr Bhaile Dhubhthaich - bun-sgoiltean Chnoc na Creige agus a' Chnuic Bhric air an cur còmhla - agus Sgoil Mo Dhubhthaich uile air an aon làraich.

Glèidhidh gach sgoil a fèin-aithne fhèin air an làraich ùir, le cuid de ghoireasan gan roinn eatorra.

Bidh aonad Gàidhlig Bhun-Sgoil Chnoc na Creige mar phàirt den bhun-sgoil ùir.

A thuilleadh air foghlam tràth-bhliadhnaichean, bun-sgoile agus àrd-sgoile, tha na h-uimhir de ghoireasan coimhearsnachd air an làraich ùir, le cothrom air goireasan spòrs an dèidh uairean na sgoile.

'S e a' chiad sgoil air Ghàidhealtachd le teisteanas Passivhaus, agus e air a thogail le tòrr insulachd, adhair-dhìonachd agus siostam gaothachaidh a ghlèidheas teas agus cumhachd.

Tha obair a-niste ga dhèanamh gus clann agus pàrantan ullachadh air thoiseach air a' ghluasad, agus àirneis, uidheamachd is eile gan cur a-steach.

Tòisichidh clann Bhun-Sgoil Bhaile Dhubhthaich agus Sgoil Mo Dhubhthaich air a' champas ùr Diciadain 22na là den Ghiblean, le sgoilearan Acadamaidh Rìoghail Bhaile Dhubhthaich a' gluasad a-steach Diciadain 3mh là den Ògmhios an dèidh nan deuchainnean.

"Bha e mìorbhaileach an campas ùr fhaicinn agus na goireasan air leth a chaidh a chruthachadh do sgoilearan agus luchd-obrach," thuirt cathraiche comataidh an fhoghlaim, an Comh Iain MacFhionnlaigh

"'S e clach-mhìle chudromach a tha seo dha coimhearsnachd Bhaile Dhubhthaich, agus tha mi misneachail gun toir an campas coimhearsnachd ùr seo taic ri àrainn ionnsachaidh aig àrd-ìre, le aonad Gàidhlig soirbheachail agus cothroman nas fharsainne air co-obrachadh eadar na trì sgoiltean agus a' choimhearsnachd airson bliadhnaichean ri teachd."

Thug Iain MacFhionnlaigh taing do phàrantan, sgoilearan agus luchd-obrach nan sgoiltean "airson an cuid foighidinn" fhad 's a tha am pròiseact ga chrìochnachadh.

Tha am pròiseact mar phàirt de ro-innleachd mhaoinichte a tha ag amas air ùrachadh a thoirt air sgoiltean, bun-structar agus seirbheisean air feadh na Gàidhealtachd, a chosgas £2.1bn thairis air 20 bliadhna.