"Conaltradh a dhìth" mu phlanaichean do Ghearastan nan Camshronach

Tha Comhairle na Gàidhealtachd ag iarraidh gun dèan Oifis na Dùthcha conaltradh leotha a thaobh nam planaichean aca Gearastan nan Camshronach a chleachdadh mar dhachaigh airson luchd-siridh comraich.

Tha seo a' tighinn às dèidh eas-aonta a thaobh a bheil cead HMO a dhìth gus an làrach a chleachdadh anns an dòigh seo.

Chan eil Oifis na Dùthcha a' gabhail ris gu bheil a leithid a dhìth, 's iad ag ràdh gun robh an làrach air a chleachdadh airson sgeama airson taic a thoirt do theaghlaichean Afganach far nach robh feum air cead HMO.

Thàinig na planaichean airson Gearastan nan Camshronach a chleachdadh airson luchd-siridh comraich am follais san Dàmhair an-uiridh.

Bha dùil gum biodh timcheall air 300 luchd-siridh comraich a' fuireach ann aig diofar amannan.

Ach, gu ruige seo, cha deach an làrach a chleachdadh airson luchd-siridh comraich.

Tha Oifis na Dùthcha ag ràdh gu bheil iad fhathast a' dèanamh measaidh air Gearastan nan Camshronach feuch dè cho freagarrach 's a bhiodh e airson cleachdadh den t-seòrsa seo.